Yohane 20

Habung Skbrhuwan

(Mat 28:1-8. Mrk 16:2-8. Ruk 24:1-12)

1Prading ali 1 cenga sngayan, mgrebu bale ida kiya mnkuung nana we mosa habung ka Maria seediq Magdalene. Qtaan na wada hrigun peeyah habung hiya ka tasil da. 2Maanu so kiya de tmalang mosa mita Simon Petros ma 1 tnugsaan sgaalu ba Yesu: “Wada daha ngalun peeyah habung ka Bukung da. Ini nami klai wada daha psaun inu.” 3Kiya de meyah nganguc ka Petros ma taxa tnugsaan ma mosa habung. 4Msuupu tmalang ka 2 seediq. Rmabang beyax na tmalang Petros ka taxa tnugsaan ma knama dehuk habung ka heya. 5Kiya de mqiri qmita ckceka truma ma taan na ga hiya ka lukus tninun malu ware keguy. Kiya de ini teme hiya. 6Smnegul dehuk ka Simon Petros de mremux truma habung. Taan na ga hiya ka lukus tninun malu ware keguy. 7Taan na galiq qniri tunux na ini psuupu lukus tninun malu ware keguy ida kiya qnriyan ga icil. 8Kiya de mremux mosa truma ka tnugsaan pnlaale dehuk habung. Mita ka heya de asi snhii da. 9Ini daha klai nana ka kari pnatis Patis Mrtaso, asi ka muudus peeyah hnqilan ka Yesu. 10Kiya de mosa sapah daha ka 2 tnugsaan nii da.

Mtqita Maria Magdalene ka Yesu

(Mat 28:9-10. Mrk 16:9-11)

11Ga mheyu nganguc habung lmingis ka Maria. Tllingis mqiri mita habung ka heya, 12taan na ka mlukus bhege ka 2 snkgulan baro ga tleung pniqan heyi Yesu. Gaga tunux ka 1 ma gaga papak ka 1. 13Smiling heya ka dheya: “Maanu lngisan su?” Rmengo ka heya: “Ado wada daha hdilun ka Bukung mu da, ini mu klai gaga daha psaun inu.” 14Rmnengo so nii de mspgeriq quri bukuy ka heya duma taan na ga mheyu hiya ka Yesu. Kiya de ini na klai Yesu ka kiya. 15Smiling heya ka Yesu: “Maanu lngisan su? Ga su migin ima?” Ngalan so na seediq mpqlahang malu dxeral ga phmean phepah ma qhuni ka heya ma rmengo heya: “Nasi su wada hdilun ka heya we braho su tgsai ku, wada su psaun inu ho? Saun mu mangal ka heya.” 16Rmengo heya ka Yesu: “Maria!” Mspgeriq heyi na ka Maria ma mskari Hiburu rmengo: “Rabuni!” (Kiya we mptgesa kesun.) 17Rmengo heya ka Yesu: “Iya sdoi kenan, ado ini ku nkala baro mosa mita Tama mu na. Sai rmengo ka mtswai mu: Maha ku mkala baro mosa ku mita Tama mu, kiya ka Tama namu uri. Mosa ku mita Utux Baro mu ma Utux Baro namu uri.” 18Kiya de Maria seediq Magdalene we saan na rmengo ka tnugsaan na: “Ntaan mu ka Bukung da.” Wada na srengo dheya ka rnengo Bukung.

Mtqita Tnugsaan ka Yesu

(Mat 28:16-20. Mrk 16:14-18. Ruk 24:36-49)

19Prading ali 1 cenga sngayan keeman ida ali ciida, ado miicu seediq Yudaya ka tnugsaan ma leban kana ka rhengun ga daha niqan. Kiya de meyah mheyu ckceka daha ka Yesu ma rmengo dheya: “Tai namu so msbale lhebun namu.” 20Rmnengo nii ka Yesu de spqita na dheya ka baga na ma hwiras na. Kiya de taan daha ka Bukung de mqaras ka tnugsaan na. 21Kiya de Rmengo dheya dungal ka Yesu: “Tai namu so msbleyaq! Wada huwa mesa smnkagul kenan ka Tama mu. Mntena so nii skgulun maku ka yamu uri.” 22Rmnengo nii ka heya de yupan na hengak duma rmengo: “Ngali Bgihur Utux! 23Srwaan namu ka qnquwan ani ima we ida srwaun ka qnquwan na. Ini namu srwai ka qnquwan ani ima we ida uxe srwaun ka qnquwan na.”

Yesu ma Tomas

2412 tnugsaan na we niqan 1 ka Tomas kesun Tidumos. Meyah ka Yesu ciida we ini theyaq dheya hiya ka Tomas. 25Maanu so kiya de duma na tnugsaan na we rmengo heya: “Ntaan nami ka Bukung da.” Kiya de rmengo dheya ka Tomas: “Asi mu ka qtaan ka ariq pnttuwan baga na ma psaun mu tluding baga mu ka hwiras na. Uxe ku mpsnheyi.”

26Mk8 ali de meeniq dungal truma sapah ka tnugsaan Yesu ma mtheyaq dheya hiya ka Tomas uri. Ga leban ka rhengun we meyah mheyu ckceka daha ka Yesu ma rmengo: “Tai namu so msbale lhebun namu.” 27Kiya de rngagan na ka Tomas: “Peeyah hini ka tluding baga su, tai ka baga mu. Peeyah hini ka baga su ma ptqani hwiras mu. Iya tiiyax, asi snhii!” 28Cmiyuk heya ka Tomas: “Ah! Bukung mu ma Utux Baro mu!” 29Rmengo heya ka Yesu: “Ado Qnita su kenan de snhii su da ho? Ani ini qita ma snhii we mbleyaq.”

Dngusun Patis Nii

30Meniq berah tnugsaan naka Yesu, egu noda na pnskraya qneepah ini btasi patis nii. 31Kiya de wada spatis ka nii we maha namu ssnheyi Kiristo ka Yesu, kiya ka Laqi Utux Baro. Kiya uri we snhii namu heya mooda ngayan na so namu maangal knuudus.

Currently Selected:

Yohane 20: Stgdaya

Highlight

Copy