JÃ 14

Jeju i ɗob kaw ro Luwaht kɨ Bɔw

1Ot kadɨn kamsɨ dasɨ ta paa. I ndɨ adɨn kamsɨ Luwah a ne, admɨn kamsɨ tɔ. 2Kam ɓet lo Bɔwm kujg ĩn tit. Ĩla titbe al a ne, neni m'elsɨ ta 'nten al, kɨta m'ndɨ m'aw kɨ m'ɗago lo kɨtɔsɨ. 3Ĩla m'aw m'ɗago lo kɨtɔsɨ a ne, m'am m'tel m'ɗe m'ɔisɨ kɨ romt, kɨtakad lon m'ndɨt a ne, i ndɨnt tɔ. 4I gerɨn lo ĩn m'ndɨ m'awt, i gerɨn ɗoba tɔ. 5Tomas ela an: Bɨraɓe, kɨ ger lon i ndɨ awt al, titbãi hã j'asɨ ger ɗoba a? 6Jeju ela an: Mĩ ɗob, mĩ rota, mĩ kumkajin de mad kɨ asɨ ɗe ro Bɔwt goto, na kɨtakulɨm tã. 7Kan ĩla i germɨn a ne, a gerɨn Bɔwm ho. Na tajigla i gerɨna, oona tɔ. 8Pilip ela an: Bɨraɓe ɔj'j Bɔw ɗang a asɨj. 9Jeju ela an: M'ndɨ nat sesɨ maɗi nu ye la Pilip i gerɨm al yo? De'n oom a ne, oo Bɔw; titbãi i ndɨ el an: M'ɔjsɨ Bɔw a? 10I ger kɔikɔi kad m'ndɨ kam Bɔwt, na Bɔw ndɨ kammt ale? Tag'n m'ndɨ m'elsɨ ye, m'un kɨdɔm hã m'elsɨ al, na Bɔwɨn ndɨ kammt la ndɨ ɗa kɨla lon ye. 11I taan ta lom lon m'el m'an: Mĩ kam Bɔwt, na Bɔw i kammt ho, na ĩla i be al a ne adɨn kamsɨ kɨlag'n m'ɗa. 12Rota rota la m'ndɨ m'elsɨ ye, de'n ndɨ adɨm kamɨn a ne, a ɗakɨlag'n m'ndɨ ɗa nõ ho a ɗakɨlag kɨbo tɔi ĩgɨn non kɨta m'ndɨ m'aw ro Bɔwt. 13Nya ɗi a i kɔn Bɔw kam tɔmt a ne, m'a m'ɗa nyàa nõ, kɨtakad Bɔw ngahn kɔsɨgon kam ngont. 14Ĩla i kɔn nya mad kam tɔmt a ne, m'a m'ɗa nyàa nõ.

Jeju an: N'an la kɨ Ndil Kɨkunjɗang kad ɗa kɨ ngéndoog lon

(Oo Jã 16:5-15,33; Pili 4:6-7)

15Ĩla i tarmɨn a ne i ngomɨn go Mberkɨndag lom. 16Na mĩ m'am kɔ Bɔw, na a la kɨ Ngesɔlkam mad adsɨ kɨtakad ndɨ sesɨ nat mbãkɨnõt, 17i Ndil rota ĩn deg kɨ dɔningt asɨn hɔa kɨ rodt al, kɨta oona al, gerɨna al ho, na ĩn i gerɨna, ndɨ nat sesɨ, i kamsɨt tɔ. 18M'am nyasɨ nganhalgt al, na m'am tel m'ɗe rosɨt. 19Nãi kaglo sĩ ɓaitɔ kad deg kɨ dɔningt oomɨn al, na ĩn a oomɨn kɨta, m'ndɨ kumkajir na a i ndɨn kumkajir ho. 20Ndɔt'n non a i gerɨn kɔikɔi, m'ndɨ kam Bɔwmt, i ndɨn kammt, mĩ tɔ m'ndɨ kamsɨt. 21De'n ndɨ kɨ mberkɨndag lom, ndɨ ngomgod tɔ a ne, ĩ la ndɨ tarɨm ye. De'n ndɨ tarɨm a ne, a i ngetar lo Bɔwm, m'a m'tara, na m'a m'ada gerɨm. 22Judas, i Judas Iskariot al, ela an: Bɨraɓe ɗi ɗa nya ad kɨ geri na deg kɨ dɔningt gerɨn al a? 23Jeju tura an: Ĩla de mad ndɨ tarɨm a ne, a ngomgo ta lom na Bɔw a tara; mĩ kɨ Bɔwm j'a kɨ ɗe roat, j'a kɨ hɔ lo ndije roat. 24De'n ndɨ tarɨm al a ne, ndɨ ngom gotag lom al. Na ta'n i ndɨ oon dɔ i lom al, na i lo Bɔw kɨ ngelam. 25Tag'n non m'elsɨ lon m'ndɨn nat sesɨ ɓaitɔ. 26Na ngesɔlkam ad i Ndil Kɨkunjɗang'n Bɔw a lan kam tɔmt, ĩla a ndoosɨ nyag tube, a ga kamsɨ dɔ nyagt tube'n m'elsɨ ye. 27Kamsɔl lom la m'ndɨ nya m'adsɨ ye, m'adsɨ kamsɔl lomlom, m'ndɨ m'adsɨ tit'n dunia ndɨ adsɨn al. Ot kadɨn kamsɨ dasɨ ta paa, ot kadɨn kamsɨ gang man. 28Oon dɔ ta'n m'elsɨ m'an: M'ndɨ m'aw na m'am m'tel m'ɗe rosɨt nõ. Ĩla i tarmɨn a ne, ni a i ɗan ronel kɨta m'ndɨ m'aw ro Bɔwt. I kɨbo tɔim. 29Na tajigla m'elsɨ nyag 'nten kete tã kad nyag'n non ɗen, kɨtakad lon a ɗan nya a ne a i gerɨn ne kɔikɔi. 30M'a m'elsɨ ta mad gog al ta, kɨta ngekõɓe kɨ dɔningt'n ɗan ndɨ ɗe na aw kɨ tɔg dɔmt al; 31na kɨtakad deg kɨ dɔningt gerɨn kad m'ndɨ m'tar Bɔw na m'ndɨ m'ɗa kɨgo Mberkɨndat'n Bɔw adɨm ye, i ɓain dõ ad kɨ j'awɨn nu.

Currently Selected:

JÃ 14: MlL

Highlight

Copy