JÃ 13

Jeju tugo nja ngéndoog lon

(Oo Mat 26:19-20; Mrk 14:17; Luk 22:14-18)

1Kete nõ ɗa nah Pakɨt, Jeju ger kad kaglo lon asɨ kad'n tee kam duniat'n ɗan kɔ, kɨ n'aw ro Bɔwt, na Jeju tar kɨ long'n ndɨn dɔningt mbã ad tard kɨ tar kɨ tɔitakɔl. 2Jeju kɨ ngéndoog lon ndɨn ta nyasat kɨ lokɨsɔle ɓaitɔ la, Sɨtan ndah ngarkam Judas Iskariot't kɨ ngon Simõ woi kad laa ji mad ngétaagt. 3Na Jeju'n ger kad Bɔw la nyag tube jint, ger kad n'tee kokɨro Luwaht, ndɨn tel n'aw ro Luwaht gog ye, 4ɓai ta nyasat tɔrr kubg lon ũ, na un ta kub mad dɔɔn ɓon. 5Goot gog urr man tasat, na mba girr tugo nja ngéndoog lon, na bɔrrd kɨ ta kub'n dɔɔn ɓon. 6Kamla tee dɔ Simõ Pierrt na Pierr ela an: Bɨraɓe kɨ i tugo njam a? 7Jeju tura an: Nyan m'ndɨ m'ɗa ye, i ger tajigla al, na a i ger kamɓai.

8Pierr ela an: A i tugo njam kɨ njakɨɗa al bat.

Jeju tura an: Ĩla m'tugoi al a ne, nya mad kɨ goi nat sem goto.

9Simõ Pierr ela an: Bɨraɓe i tugo njam hã kɨɗabe al, na jim kɨ dɔm tɔ ho.

10Jeju ela an: De'n ndog man woi a ne, a ge kɨ'n tugo njan la koon, kɨta i kɨ kar nyang kɨtaagbe woi. Na ĩn taa ne, ĩn kɨkar nyang, na ĩn tube al. 11Jeju ger de kɨ ngelan ji madngétaangt kɔi. Kɨtɔ 'nten la elɨn an: ĩn kɨkar nyang tube al ye. 12Lon tugo nja ngéndoog lon woi ye, ɔi kubg lon la ront gog, kamla tel aw ndɨ ta nyasat gog, eld an: I gerɨn nya'n m'ɗa sesɨ yo?

13I ndɨ i kunmɨn ngendoo deg kɨ Bɨraɓe; i ndɨ elɨn goɗobat kɨta mĩ titbe. 14Ĩla mĩ kɨ Bɨraɓe kɨ ngendoo deg m'tugo njasɨ a ne, maj kad i tugon njana ho. 15M'adsɨ nyandaj kɨtakad i ɗan tit'n m'ɗan sesɨ ye be. 16Rota, rota la m'ndɨ m'elsɨ ye. Ɓer i kɨbo tɔi ngen al, ngombangkɨla i kɨbo tɔi ngelan al ho. 17Ĩla i gerɨn nyag 'nten, na i hɔn ɗa got a ne, ĩn ngeronel. 18M'ndɨ m'elta losɨ tube al, m'ger ĩgɨn m'mbed'd, na kɨtakad tɔlɨn ne ta ta kɨndang kam Maktubt: De'n ndɨ sa sem bɨna la tel ngendorɨm. 19Labekɨnõt m'ndɨ m'elsɨ kete lon nya ɗan nya al ɓaitɔ kɨtakad lon ɗa nya woi a ne i gerɨn kɔikɔi mĩ la i mĩ. 20Rota rota la m'ndɨ m'elsɨ ye, dekɨɗen ndɨ hɔ de'n m'laa kɨ ront a ne, ndɨ hɔm mĩ kɨɓe la kɨront ye; de'n ndɨ hɔm kɨ ront a ne ndɨ hɔ ngelam la kɨ ront ye.

Judas a la Jeju ji degt

(Oo Mat 26:31-35; Mrk 14:18-21; Luk 22:21-34)

21Lon Jeju elta 'nten ye, kama gang ngalang ad elta kɨ tɨga an: Rota rota la m'ndɨ m'elsɨ ye, kɨkɨɗa kusɨt a lam ji degt. 22Ngéndoog oon kumna mbet't kɨta gerɨn de'n Jeju ndɨ elta loa al. 23Kɨkɨɗa ku ngéndoogt loa, ĩn Jeju tara ngãi ndɨna ron kad Jejut. 24Simõ Pierr la jin kɨdɔ ngendɨna ron kad Jejut kad ndɨjea ke nõ Jeju ndɨ elta loa a? 25Ngendoo'n non norr kɨ dɔ Jejut ndɨjea an: Bɨraɓe i nõ a?

26Jeju tur an: Ĩla i de'n ɓet m'a m'la ngon gaj bɨna kam tãt m'ada ye.

Titbe lon la ngon gaj bɨna kam tãt woi ye ad Judas ngon Simõ Iskariot. 27Go ngon gaj bɨnat'n non la Sɨtan and kam Judast. Jeju ela an: Nya'n i ndɨ ɗa, i ɗa kanangbe. 28Ku ngéndoogt'n ndɨn ta nyasat, de mad kɨ ger kɨtɔɗi Jeju elɨn ta 'nten goto. 29Ɓɔlnar i ji Judast kɨta 'nten kɨmadg oon a anan Jeju ela kɨ aw ndugo nyag'n ge kɨta ɗa nah, ke kɨ ad nya mad ngéndog. 30Lon Judas ta ngon gaj bɨna woi ye tee kanangbe, lo diw.

Mberkɨnda kɨ kij lo Jeju

(Oo Jã 17:1-5; Jã 11:12-14; 1 Jã 3:10-19)

31Lon Judas tee woi ye, Jeju el an: Tajigla Ngon de ngah kɔsɨgon, Luwah tɔ ngah kɔsɨgon kamat.

32Ĩla Luwah ngah kɔsɨgon kamat a ne, Luwah tɔ a ada kɔsɨgon kamɨnt ĩ kɨɓe kɨdɔn; na tentenbe a ada kɔsɨgon tɔ. 33Nganɨm, mĩ sesɨ nat ngonsĩ ɓaitɔ. A i sahmɨn, na tit'n m'elɨn Juipg m'an: lon m'a m'awt a asɨn kawt al, titbe tɔ la m'ndɨ m'elsɨn tajigla ho ye. 34M'adsɨ mberkɨnda kɨkij, sumba kad i tarɨn na, tit'n m'tarsɨn ye be, 35kɨ i tarɨn na titbe tɔ. Kɨgot 'nten deg tube a gerɨn ne ĩn ngéndoog lom, ad i dɔ tart kɨ i ndɨ tarɨn na.

Jeju elta maj'n Pierr a maj ta gerɨn

(Oo Mat 26:31-35; Mrk 14:27-31; Luk 22:31-34)

36Simõ Pierr ela an: Bɨraɓe I ndɨ aw ɗa. Jeju tura an: Lon m'ndɨ m'awt, asɨ ndulo gom tajigla al, na a i ndulo gom ɓai. 37Pierr ela an: Bɨraɓe kɨtɔɗi m'asɨ ndulon goi tajigla al a? Mĩ nderbe kad mad rom kɨtɔi. 38Jeju tur an: A ad roi kɨ tɔm a? Rota rota la m'ndɨ m'eli ye, kɨnja a ko al ɓaitɔ, na a i maj ta gerɨm nja mɨta.

Currently Selected:

JÃ 13: MlL

Highlight

Copy