JÃ 15

Jeju i dĩ nduu kɨ jeje

(Oo Luk 13:6-9)

1Mĩ dĩ nduu kɨ jeje. Bɔw i ngendɔɔ nduu. 2Dɔj kɨɗen kɨ ɓa kadɨmt, na ndɨ tee kɨ kandɨn al a ne, a ga ganga kɔ; na dɔj kɨden'n ndɨ tee kɨ kandɨn a ne, a ja takõna kɨtakad tee kɨ kandɨn kɨ tɔi kɨ dɔt. 3Ĩn kɨkar woi kɨtakul ta'n m'elsɨ. 4I ndɨn kɨ kammt. Na mĩ m'a m'ndɨ kɨ kamsɨt ho. Tit'n dɔj nduu asɨ kand kɨ dɔn al, na ɗa kɨ dɔ dĩ nduut tã ye, titbe ĩn kaa asɨn tee kɨ kand al, ĩla i ndɨn kɨ kammt al. 5Mĩ dĩ nduu, ĩn dɔjiag. De'n ndɨ kɨ kammt, na mĩ m'ndɨ kɨ kamat ho a ne, ndɨ tee kɨ kandɨn ngãi, kɨta kɨkanjɨm asɨn ɗa nya mad al. 6Ĩla de mad ndɨ kɨ kammt al a ne, a lana kɨ tɨga, tit dɔj kag kɨ gang be, ad tut; kamla ɔin dɔj kagg, ũn horro ad õ rio. 7Ĩla i ndɨn kɨ kammt, na tag lom ton kɨ kamsɨt ho a ne, i kɔn nya'n i geen, na Luwah a adsɨ. 8Ĩla i teen kɨ kand ngãi a ne, i titbe la Bɔwm a ngahn tɔko, na a ĩn ne ngéndoog lom ho ye. 9Tit'n Bɔwm tarmɨn ye, m'tarsɨ titbe ho. I ndɨn kɨ kam tart lom. 10Ĩla i ndɨ i ngomɨn go Mberkɨndag lom a ne, a i ndɨn kɨ kam tart lom, tit'n m'ngomɨn go Mberkɨndag lo Bɔwm, na m'ndɨn kɨ kam tart loa ye be. 11M'elsɨ tag 'nten kad ronel lom ndɨn kɨ kamsɨt, kad ronel losɨ asɨnatap.

12Mberkɨnda lom la ten: I tarɨn na, tit'n m'tarsɨn nõ. 13Tar kɨbo tɔi 'nten goto: Kad de ad ron kɨta namɨng. 14Ĩn namg ĩla i ɗan nya'n m'ndasɨ mbera. 15M'ndɨ m'kunsɨ ɓerg al ta, kɨta ɓer ger nya'n ngea ndɨ ɗa al; na m'kunsɨ namg kɨta mad i gerɨn nyag tube'n m'oo dɔ ro Bɔwmt. 16Ĩn hã i kɔtɨmɨn al: Na mĩ la m'kɔtsɨ, na m'ndasɨ kad awɨn, kɨ andɨn, na kɨ kandsɨ tokɨnõt, kɨtakad nya'n a i kɔ'n Bɔw kam tɔmt a ne, kɨ adsɨ. 17Nya'n m'ndɨ m'ndasɨ mbera la ten: Kɨ i tarɨn na.

Deg kɨ dɔningt a ɔsɨnta ngéndoog lo Jeju

(Oo Mat 10:22-33; Jã 16:1-3; Jã 3:18-19)

18Ĩla deg kɨ dɔningt ndɨ ɔsɨsɨn taa ne, kɨ i gerɨn ɔsɨmɨn ta kete nõsɨt. 19Ni ĩn lo deg kɨ dɔningt a ne, deg kɨ dɔningt a tarɨn kɨlodg, na kɨta ĩn lo deg kɨ dɔningt al, na m'kɔtsɨ ku degt kɨ dɔningt, kɨta 'nten la deg kɨ dɔningt ndɨ ɔsɨsɨn ne ta. 20I gan kamsɨ dɔ tat'n m'elsɨ m'an ɓer i kɨbo tɔi ngeen al nõ. Ĩla dan rom ndo a ne, a dan rosɨ ndo ho ĩla ngomɨn go ta lom a ne, a ngomɨn go losɨ ho. 21Na a ɗan sesɨ nyag'n non tube kɨtatɔm, kɨta gerɨn ngelam al. 22Neni m'ɗe al, ad m'eld ta al a ne, a ndɨn kɨ majal dɔdt al; na tajigla taa a nya'n go majal lod al. 23De'n ndɨ ɔsɨmta a ne, ndɨ ɔsɨ ta Bɔwm ho. 24Neni m'ɗakɨlag'n de kɨɗang mad ɗa kudt al a ne, majal lod goto. Na tajigla, oon kɨlag lom na ɔsɨjɨn ta, mĩ kɨ Bɔwm tu. 25Nya 'nten ɗa nya kad tɔlɨn ne ta ta'n ndangɨn kam Mberkɨndat lod anan: Ɔsɨmɨn ta kɨkanj ta.

26Na lon ngesɔlkam'n m'a m'laa kɨrosɨt kokɨro Bɔwt, ad i Ndil rota'n ndɨ tee kokɨro Bɔwt ye, ɗe woi a ne, a manaj dɔmt. 27Na ĩn kaa a i mamɨn naj, kɨta ĩn nat sem lo yaɓoodat nu.

Currently Selected:

JÃ 15: MlL

Highlight

Copy