JÃ 16

Jeju el kɨlong kete kad deg a ndorɨnd

(Oo Jã 15:18-25; Luk 6:22-23)

1M'elsɨ nyag 'nten kete kad lon ndoorsɨn a ne i nyan ta kad'm kamsɨ kɔ al. 2A tuɓasɨn kɔ kam kuj kawnat lo Juipg. Kaglo'n a ɗe nõ, dekɨɗen a tɔlsɨ a ne, a oo an: N'ndɨ n'ɗa kɨla n'ad Luwah. 3A ɗan titbe kɨta gerɨn Bɔw al ho, germɨn al ho. 4M'elsɨ nyag 'nten, kad lon dɔkàda asɨ a ne, i gan kamsɨ dɔ tat'n m'elsɨ kete nõ. M'elsɨ tag 'nten lo yaɓoodat nu al, kɨta mĩ nat sesɨ.

Ndil Luwah ɗa kɨla kɨta deg kɨ dɔningt

(Oo Jã 14:16,17-26)

5Tajigla m'ndɨ m'aw ro Ngelamt. Na de mad kusɨt kɨ ndɨjem ke m'ndɨ m'aw ɗah kaa goto. 6Na kamkil ɗoosɨ kamsɨ kɨta kelɨn m'elsɨ tag 'nten. 7M'ndɨ m'elsɨ rota, maj kɨ tɔsɨ kad m'aw; na ĩla m'aw al a ne, Ngesɔlkam a ɗe rosɨt al; na ĩla m'aw a ne, m'a m'laa kɨrosɨt. 8Lon a ɗe a ne, a hɔ deg kɨ dɔningt kɨ ta dɔ majalt lod, dɔ ɗadenesewt, dɔ takɨgangt tɔ. 9A hɔd kɨta dɔ majalt kɨta ndɨ admɨn kamd al. 10Dɔ ɗa da ne, sewt kɨta m'ndɨ m'aw ro Bɔwt na a oomɨn gog al. 11Dɔ takɨgangt tɔ kɨta Luwah gangta dɔ ngekõɓet kɨ dɔningt'n ɗan woi. 12M'ndɨ kɨ ta madg la ngãibe kad m'elsɨ ɓaitɔ na asɨn kund dɔsɨt tajigla al. 13Na lon Ndil rota a ɗe a ne, a ɔrrsɨ ta ɗob kɨ kam rotat tube kɨta a un ta kɨ dɔn el al, na a el nyag tube'n a oo dɔ, a ɔjsɨ nyag'n ndɨ ɗen. 14Ndil rota'n non a ad tɔm ko, kɨta a ɔi kam lomt la a ɔjsɨ ye. 15Nyag tube'n ĩn lo Bɔw ĩn lom, kɨta 'nten la m'elɨn m'an: Ndɨ ɔi kam kɨlomt la ɔjsɨ ye.

Jeju elta dɔ kamkilt kɨ ronel

(Oo Jã 14:18-19)

16Nãi kaglo tẽbe a ne, a i lan kumsɨ dɔmt gog al; kamla kaglo tẽbe gog tɔ a oomɨn. 17Kɨtɔ 'nten kɨmadg ku ngéndoogt loa elɨna anan ta ɗi ndɨ elj an: Nãi kaglo tẽbe a ne, j'a kɨ la kumj dɔnt gog al kamla kaglo tẽbe gog tɔ a ne, j'a j'oon kɨta ndɨ n'aw ro Bɔwt a? 18Elɨn anan: Ta'n el an: Nãi kaglo tẽbe ye girra i ɗi a? Kɨ ger ta'n el nõ al. 19Jeju ger kad ngéndoog lon ndigɨn ndɨjea ta kɨta 'nten eldɨn an: I ndɨ ndɨjen na ta dɔ tat'n m'elsɨ m'an: Nãi kaglo tẽbe a ne, a i lan kumsɨ dɔmt gog al; kamla kaglo tẽbe tɔ a oomɨn yo? 20Rota rota la m'ndɨ m'elsɨ ye, a i non, a i ton ɗusɨ ɗusɨ na dunia a ɗa ronel, a i ɗan kamkil, na kamkil losɨ a tel ronel. 21Lon dekɨdẽ ndɨ tõ ngon a ne, ndɨ kɨ kamkil kɨta ndɔa asɨ, na lon ooj ngon woi ye, kama woi dɔ kamkil loa kɨta ronel kɨbo ɗaa dɔ koojt'n ooj ngon kɨ dɔningt. 22Ĩn tɔ, tajigla i ndɨn kɨ kamkil na m'a m'oosɨ gog, kamla rosɨ a nelsɨ, de mad kɨ a ta ronel losɨ goto. 23Ndɔt'n non a i ndɨjemɨn ta mad al. Rota rota la m'ndɨ m'elsɨ ye, nya ɗi kɨ a i kɔn Bɔw kam tɔmt a ne, a adsɨ. 24Mbã tajigla i kɔn nya mad kam tɔmt al. I kɔn, na a i ngahn kad ronel losɨ asɨn na tap.

Jeju tetɗɔɔ dunia

25M'elsɨ ta nyag 'nten kɨ terrtag. Dɔkàd ndɨ ɗe nõ, ĩn m'a m'elsɨ ta kɨ terrtag gog al, na m'a m'elsɨ ta lo Bɔw kɨ tɨga wakɨsɨ. 26Ndɔt'n non a i kɔn kam tɔmt, na m'elsɨ m'an: M'am kɔ Bɔw kɨtɔsɨ al. 27Kɨtɔ Bɔw kɨdɔn ndɨ tarsɨ, kɨta i tarmɨn, na i gerɨn kɔikɔi m'tee kam Bɔwt. 28M'tee kam Bɔwt, m'ɗe dɔningt, tajigla m'ndɨ m'nya dɔning, na m'ndɨ m'aw ro Bɔwt. 29Ngéndoog loa elɨna anan: Oo tajigla kɨ ger i ndɨ elta kɨ tɨga wakɨsɨ, i kɨ terrta hã i ndɨ elɨn ta al ta. 30Tajigla kɨ ger, i ger nyag tube, i ge kad de mad ndɨjei ta al kɨta 'nten kɨ gerɨn kɔikɔi i tee kokɨro Luwaht. 31Jeju turd an: Tajigla adɨn kamsɨ a? 32Dɔkàd ndɨ ɗe, tajigla ɗe woi, a i tĩn na, dekɨɗen a aw lo lon, a i nyàmɨn kɨ kɨɗambe do, na mĩ kɨ kɨɗam al, kɨta Bɔw i nat sem. 33M'elsɨ tag 'nten kad i ngahn ne kamsɔllom kammt. Kam dɔningt ne a i ndɨn kɨ kamkɔl, na iren kamsɨ ndang, m'tetɗɔɔ dunia.

Currently Selected:

JÃ 16: MlL

Highlight

Copy