Seemthawhnak 49

A Tiapale hemih Jakob Aanka Netatleng

1Cuhnukah Jakob ni a tiapale a ko hngai ih, “Khawmtia hnik uh, hinhnuk ah nan cungih a tlung leimi itu a ii ti a tan sim hngai taw’ng,” tiah a ti hngai.

2“Khawmtia u la ngai uh,

Maw Jakob ih tiapale hngai;

Nan pa Israel ih thusim hi

ngai hnik uh.

3Reuben, nang hi ka tia peitleng,

ka dihcahnak leh Ka thaṭhatnak ih

vuang peitleng na ii, nang cu

diinhmun ah iseh, huham ah iseh,

na hleih hngai.

4Ti mang a riingreenglomi na ii,

na pa ih metnak tiang ah na lut;

cuhnukah na hnomtamsak— ka ihkhun tiangah

na kai—curuangah na hleih hngai ti thok lo!

5Simeon leh Levi cu keeukawm an ii;

an ralreenle cu kutthlakraunak hriamhrei an ii.

6An thurel thupnak ah

ka tah duh dah lei lo;

an khawmtiaknak ah

ka tel duh dah lei lo—

icatile an hehhar in mi an that hngai,

cun nom dawt men ah

cawpetuum kapza tha an sat.

7An hehharnak cu ṭihṭha a ik ruangah,

cun an thinsiatnak cu

naktiahngeilo a ik ruangah

camkhaatmi ii seh!

Jakob ih ram sungah ka ṭheek hngai thok,

cun Israel ih ram sungah

ka parcaksak hngai thok.

8Judah cu na unaule ni

an tan lawm thok;

na kut cu

na ralle hngawng parah na sia thok;

na pa ih tiapale cu

na hmaiah an kuum thok.

9Judah cu kiosa no dik,

a sakawh a awk uh hnukah

a omnak ah a kirmi mang,

ka tiapa cu a ii.

Kiosa mangin a bok,

a doktia, kiosa pinu mang a ii—

ahu ngai ni hi lei a ṭhang ngam?

10Ngunkhuai a hem a phat tiang,

cun mi ni a thu an ngaih tiang,

Siangphahrang teileng cu Judah hemin,

cun uktu ih teileng cu a ke lakkar in,

a tawn dah lei lo.

11A saisuan cu sabithri ah,

a laaksuan cu sabithri ṭhatleng parah a saam,

a partlaipawl cu sabitti sungah,

a angkitual cu sabit thisan sungah a hlau hngai;

12a mitpawl cu sabit vanin an sansawn,

cun a hapawl cu cawhnawi vanin

an raangsawn.

13Zebulun cu rilikap ah

omhmun a khuar thok;

tilawngpawl diintiaknak a i thok,

cun a unaule cu Sidon ah an i thok.

14Issakhar cu a dikmi laak a ii,

tukawmpawl lakkarah a kual;

15diindaihnak hmun a ṭha,

cun khurram cu a nuam, ti a hmu;

curuangah a liang cu

thilrit taang dingah a tun hngai,

cun ceengkalhmi rian khung ṭuantu

sal ah a cang.

16Dan cu Israel hrinpawl lakih

pakhat diinhmun in a mipawl

thu a ṭhen hngai thok.

17Dan cu lam kap ih rul,

a ciitiatu cu dunglaah thalih tla dingin

sai tawbong acu tu lamlak ih

rul sivaingei, a i thok.

18Na runnak hngak ing ee, Maw Bawipa.

19Gad cu rokhmangrual ni

an vong do thok, ihmansela

dola hngai in an dung te in

a dawi hngai thok.

20Asher ih cawsuak cu caw ṭha an i thok,

cun siangphahrang ca-ih

caw tuitui an i thok.

21Naftali cu a bualleng hluahhlomi,

dawtkopmi suanle hring tu

neeng pinu a ii.

22Josef cu a vuang vuaimi sabit ṭeek,

cirh kap ih a vuang vuaimi sabit ṭeek a ii;

a tleengpawl cu a ruang parah an zaam.

23Thalkah thiamle ni ṭihṭhangaiin an vong do;

an saai ih rauhngaiin an nor;

24Acuhmanah Jakob ih

Pathian Dik kut thawngin,

cun Tukhal, Israel ih Lungpi min in,

a li cu a ṭhawngkau,

cun a baan cu khuivaiṭha an ii.

25A tan bawn thok tu,

na pa ih Pathian thawngin,

cungla ih van khin thluasuahpawl rum,

tangla ih ti thuk khin thluasuahpawl rum,

tianau tampi leh sumhnam tampi,

tan burh seh.

26Na pa ih thluasuahpawl cu

kumkhua tlangpawl ih thluasuahpawl vanin,

kumkhua mualpawl ih

lenṭhatnakpawl vanin

an ṭhawngṭhasawn;

acupawl cu Josef lu parah,

a ule hemin thiatcemi pa ih cal parah

om u seh.

27Benjamin cu sase hraang paak a ii,

a sakawhmi cu mawla ah a aw,

cun siimla ah a misuhmi cu

a ṭhen ciamco,” tiah a ti.

28Hile an zate hi Israel ih hrinpawl cu an ii, cun hihi an pa ni pakhat vek cu a hoihtiami thluasuahnak rum a thluasuah hngai tikih a ti hngaimi a ii.

Jakob Thihnak leh Vuinak

29Cuhnukah thu a cah hngai ih, “Kei cu ka mipawl rum hmunkhatih tum ka i vel thok. Ka pupale hem Hit mi Efron ih lo sungih thlaan ah, 30Kanaan ram ih Mamre hrial Makpelah ih ommi lo sungih thlaan ah, Abraham ni Hit mi Efron hemin vuitiaknak hmun ca-ih a leimi lo sungah ma vui lei ci. 31Acuna’hcun Abraham leh a nupi Sarah cu vui an ita; cun acunang ahcun Isaak leh a nupi Rebekah cu vui an ita; cun acunang ahcun Leah ka vui. 32Lo leh a sungih ommi lungkuak cu Hit mile hemin lei a ita,” tiah a cah. 33Jakob ni a tiapale hemih a thucah a netsak tikah a ke cu ihkhun ah a con ih a thaw netatleng a thaw, culeh a mipawl hemah tum a ii.

Currently Selected:

Seemthawhnak 49: KHBF

Highlight

Copy