Seemthawhnak 50

1Cutikah Josef cu a pa ih hmalaah a kuum ih ṭapin a pa ih hmai cu a hnam. 2Josef ni a tungsau sibawile cu a pa ruak sihnulh a torh hngai. Curuangah sibawile ni Israel cu si an hnulh; 3acu tinak ah ni sawmli an raau, icatile miruak si hnulh nakding ca-ih caan ṭul zet timi a ii. Culeh Izipt mipawl ni amah cu ni sawmsarih sung an ṭah.

4Israel ca-ih ṭahnak nipawl an liam tikah Josef ni Faraoh ih innsang cu, “Nan mithmaiṭha ka co a ik a’cun naktiahtein Faraoh hemah: 5Ka pa ni thu ma khaamsak in, ‘Ka thi vel thok. Kanaan ram sungih kamah ca’h thlaan ka kertiakmi ah a ma vui thok henakhawh’ tiah a ti. Curuangah atu hang tat lang, cun ka pa a vui taw’ng; cuhnukah ka kirṭhan kau thok’ a ti tiah ma sim piak uh,” tiah a cah hngai. 6Faraoh ni, “Hang tat kau la, ti dingih thu a tan khaamsak mangcun na pa cu vui kau tu,” tiah a let.

7Curuangah Josef cu a pa vui dingah a hang tat. Faraoh ih tungsaule an zate, a innsang ih upale, cun Izipt ram ih upale an zate, 8Josef ih innsang an zate, a ule, cun a pa ih innsang khaw Josef rum an tat. Goshen ram ahcun an tepangpawl, an tuu leh merunpawl, cawperunle ceu mattaak an ii. 9Saileengpawl leh a mawngtupawl cu amah rum an tat. Mibuur hnem vuai an ii. 10Jordan lon ih Atat ih talaang an phat tikah a rauh ngaimi leh ngaihsiami thiṭahnak an hmang; culeh Josef ni a pa caah ni sarih sung zuuntuarnak a hmang. 11Kanaan mipawl ni Atad ih talaang ah mithi zuunngaihnak an vuak an hmuh tikah, “Izipt mipawl caah ninghangngai ih zuuntuarnak a ii hi maw!” tiah an ti. Curuangah a hmun cu Abel-mizraim#50:11 Abel-mizraim ti cu Izipt mipawl ca-ih Ṭahnak tican. tiih vawh a ii; Jordan lon ah a om. 12Cuticun a tiapale ni a sim taak hngai mangin an vuak piak. 13A ruak cu Kanaan ram ah an zawn ih, Abraham ni Hit mi Efron hemin vuitiaknak hmun ca-ih a leimi lo, Mamre hrialih ommi Makpelah lo sungih lungkuak ah an vui. 14A pa a vui hnukah Josef cu a ulepawl leh amah rum a pa vui dingih a hang tat tu an zate rum Izipt ah an kir.

Josef ni a Ule a Ngaidam hngai

15An pa a thih an tiahngah tikah Josef ih ule ni, “Josef ni kan parah lungunnak ngei rih in, a parih kan titaakmi zate ca’h man lehrul sela khawti’n hi lei maw?” tiah an ti. 16Curuangah Josef cu an pan ih, “Na pa ni a thih hlanah hitihin a man cah ta, 17‘Josef hemah: na ule ih thihtlak sualnak le harnak an tan piakmi palhnak cu ngaidam hngai law, tiah sim uh’ a ti. Curuangah atu hi na pa ih Pathian ih tungsaule ih thihtlak sualnak hi man ngaidam hram,” tiah an ti. Josef ni an simmi a zak tikah a ṭap. 18Cutikah a ule khaw an ṭap, a hmaiahcun an bok ih, “Keimi cu na salle kan ikau hi,” tiah an ti. 19Ihmansela Josef ni an hemah, “Nan thin phang hlah uh! Kei cu Pathian diinhmun ah ka om hmen maw? 20Nangmi ni harnak ma piak khaai ta hman u la, Pathian ni cu nihinni ih a thilti manghin mi tampi zuah hngai dingah thilṭha ca’h a tumtah hekhawh. 21Curuangah hrul hlah uh; kamah rori ni nanmah leh nan tiale tete cu ka tan cawm hngai kau thok,” tiah a ti hngai. Ahitihin ṭhatein a bia hngai ih an thin a daihsak hngai.

Josef ih a Netatleng Nipawl leh Thihnak

22Curuangah Josef cu amah leh a pa ih innsang rum Izipt ah an omcih dah. Culeh Josef cu za leh kum hra a nung. 23Josef ni Efraim ih tiale san thumnak tiang a hmuta hngai; Manasseh ih tiapa Makhir ih tianaule khaw amah ih tianaule ah a la hngai.

24Cuhnukah Josef ni a ule cu, “Kei cu ka thi vel thok; ihmansela Pathian cu a tan veh hngai hrimhrim thok, cun hi ram hin a tan suah hngai thok ih, Abraham hem, Isaak hem leh Jakob hemih a khaam hngaimi ram ah a tan hruai hngai thok,” tiah a ti hngai. 25Curuangah Josef ni Israel ih tiale cu thukhaamsak hngai hratin, “Pathian a tan veh hngai tikah, ka ruhpawl cu hinang hin han thiar lei cu,” tiah a ti. 26Culeh Josef cu a thi, kum 110 a ii; si an hnulh ih ruakkuang sungah, Izipt ram ahcun an sia.

Currently Selected:

Seemthawhnak 50: KHBF

Highlight

Copy