Matai 26

1Pwu UJesu vwu amalile ukutsova goni amameńu aga, pwu akavavula avakongi va mwene akata: 2Nuńe ndumańile ukuta lino gasigye amatsuva gavili vuvule ukwitsa UPasa, pwu Uńamunu vitsikuvapa avakuntovelela pakidamiṅanye. 3Palitsuva ili pwu avateketsi avavaha navańivaha avenekivumbuko vakalundamana nńumba jya nteketsi umbaha, uvi vatetsaga vi Kajipa ilitavwa. 4Vakatsovana vakata: Tumwibate tumbude UJesu, mańa uluhala luvekwovwu tukumwibata. 5Vakata: Mańa tulamwibataga pamatsuva amavalatse, pwu vikutuhambukila avanu.

6UJesu vwu atsisike mu-Betanija vwu ali nńumba jya Simoni uńabuba, 7pwu akahegelela kumwene undala ujyunge uvi agegile ikibake kya mono inalamu sitso. Tsu akandudilila pantwe vwu atamile pakulya. 8Avene avakongi va mwene vwu vambwene, pwu gukavipa vakata: Itaga kyiki ikyuma? 9Vali nakiki ukugutsa imono itsi nindalama ńongosu vuvule itsa kuvapa avagatsu? 10Umwene UJesu akavamańa akata: Mukuntanila kiki undala uju? Mańa imbombo itsu ambombye une tsu nnonu. 11Mańa avagatsu vwu ndi navo sikutsoni, lola une nandivamwo mwańe umu sikutsoni. 12Mańa upwu ambakaga imono itsi mumana, pwu ambakye ṅani itsa kusilila. 13Jilweli-lweli ndikuvavula ndita: Mwoni umwu inongwa innonu tsitsitsi tsilapulikikaga ikilunga kyoni, mwu tsilatsovelivwagwa lunine natsene itsu avombile undala uju, tsivetsaga tsa kunkumbuhitsa jujwa.

14Pwu ujyunge uva kitsigo navavili uvi ale vi Juta va mu-Kalyoti ilitavwa lya mwene, akabiha kuvateketsi avavaha 15akatsita: Mukuma kiki ndingave ndikuvavula apakumwibatila? Avene vakangelela indalama tsa pesa imilevulo gidatu (30). 16Pwu akatengula baho akalonda ukumilika pavunnonu.

17Pwu palitsuva ililongotsi lya sivanda isitsilansabe, pwu avakongi vakahegelela kwa Jesu vakambutsa vakata: Vwatye tukagahe ndaku pavulilo uve akakolo ka Pasa? 18Umwene akata: Mbihage mbutsenge mulya, mwu mukatsovage kwa nongi mukatetsage, umańisi atye mukatetsage, akavalilo kango kitsile. UPasa nditye tulilaga pave nune navakongi vango. 19Pwu avakongi vakatsivomba nduvwu avalagye UJesu vakatsigaha UPasa.

20Vwu vuhwe kukimihe pwu akatama pakulya navakongi va mwene kitsigo navavili. 21Vwu vali pakulya pwu akavavula akata: Jilweli-lweli ndikuvavula ndita, umwu mbelye uńe ujyunge alańendama. 22Pwu vakasusuvala sitso, vakambutsa mpamato-mpamato vakata: Nda ndivetsage nene nkuludeva? 23Umwene akanda akata: Uvi tutsabana nave nune pakulya nkihava vi ikuńendama. 24Umwene Uńamunu vi viki, iluta nduvwu likuntsova mwa kalata. Uli viki lweli vi munu vi vukumendama Uńamunu. Pavetsaga pannonu kitaholwa lusiku vi munu uve! 25Akanda UJuta uvi amendamage akata: Nda ndivetsage nene vi mańisi? Umwene akata: Ugolwise veve. 26Vwu vali pakulya pwu UJesu akatola ikivanda akasana akameńulanya akavapa avakongi akata: Koti, mulitsage ugu gwu mmana gwango ugu. 27Akata nikinwelo akatola akasana, nakyene akavapa akata: Kyu munwetsage ńivoni, 28Ulwakuva gwu nkisa gwango gwa lwidiṅano ugukuvadudikilaga va vongosu ugwa vusyikilo vwa nongwa. 29Ukwi ndivavule: Ndihumaga ilelo iji nandilavuje ukuńwa uvwa seke tsa masilu uvu, ndilatsisikaga palitsuva ilyu tulańwelanilaga uvupya vuvule twivoni nuńe kuludeva lwa dada. 30Pwu vakimba ulwa kunginya Unguluve. Pwu vakahuma panzi vakabiha kukidugala kya mono.

31Pwu UJesu akavavula akata: Ikilo iji ńivoni indatetsaga: Ipelile va kutwambutsa uńe. Ulwakuva livigilwe mwa kalata ilita: Ndilantovaga undimi, pwu iṅolo tsa ndimo pwu tsihambaga. 32Vwu nditsukile pwu ndilalongola mbulongolo ukubiha mu-Galilai, 33Umwene UPetele akamwanda akata: Nupwu voni vita ipelile va kutwambutsa uve, bako nandilatsove ipelile va kunambutsa uńe uve. 34Akanda UJesu akata: Jilweli-lweli ndikukuvula ndita, ikilo jijiji vwu iṅongove jikanale ukuvika, pwu vwu vwibelile kadatu kwane vwu utye nandimmańili une. 35Umwene UPetele akanda akata: Napene nupwu tungave twavetsaga kuswa twivoni, napene nandila bele kwave ukuta nandimmańili uve. Vwu vakatsova vuvule-vule voni navakongi avanine.

36Pwu UJesu akatsisika navo paluvanza ulunge ulwu vatetsaga mwu mu-Getisemani ilitavwa. Pwu akatsitsova navakongi va mwene akata: Mutamage apa uńe, une tango ndibiha pakwisaja palya. 37Akavatola va-Petele navańa-Sebetai vwu vavili, vwu akabiha navo. Pwu akatetema akasusuvala nukuva nkyańa vuvule inumbula. 38Pwu akavavula akata: Umwuja gwango ukususuvala ulususuvalo lwa kwoni nakwoni ndiviuta ndili pakuswa vuvule. Mbetsage apa, munange ukuva miho twivoni nuńe. 39Umwene akaluta padebe akatsibiluka pasi akisaja akata: Vi dada, pangave pavonekaga pakuluta pane ikinwelo iki! Mańa nene viki itsu ndinogilwe une, ńage jyuve tsitsu ungave unogilwe uve. 40Akatsikwitsa upwu vale avakongi va mwene, akavona vagonelye itulu. Pwu akatsova nu-Petele akata: Napene napakavalilo kapamato kene pavalemile ukuva miho twivoni nuńe? 41Mbetsage miho mwisaje ulugelo ukuta lulavavonaga. Umwuja gwu gwiki gwu gwidike, ugwene gu mmana gwu ndekedeke. 42Akavuja akabiha akatsikisaja akata: Vi dada, kingave ikinwelo iki nakikupavona pakunge pakuluta, upita ndinwetsage une–pwu ńage jyuve tsitsu ungave unogilwe uve. 43Vwu itsile pwu akatsivona vavujile vagonelye itulu ulwakuva itulu tsavalemile. 44Akavaleka, akavuja akabiha akatsikisaja ulwa datu amameńu ndaga gwu atsovaga ululongotsi. 45Pwu akavuja akatsikwitsa upwu vali avakongi va mwene akata: Piki, mugonelelage pasigye, mugatalukage. Lola akavalilo kitsile. Uńamunu viva pakuvapa mmavoko avatulanongwa. 46Musisimuke tuvuke, itsile uvakuvapa une.

47Vwu ali pakutsova amameńu aga pwu itsile UJuta uva kitsigo navavili agegile navanu ikipuga vuvule, vakolye ninuvwo nisonzo, vahumile kuvateketsi avavaha nakuvańivaha avenekivumbuko. 48Umwene uvi avapetsaga avavulile ikimańilo kya kumańilamwo ukuta vi jujwa, atye: Uvi ndikuntsiba kundomo vwu vi jujwa, vi mukamwibatage. 49Pwu akańilila mumana UJesu akata: Ndikukupembetsa vi mańisi. Pwu akantsiba kundomo. 50Umwene UJesu akata: Vi njango, vombaga itsu vwitsile kuvomba! Pwu vakahegelela vakamwibata UJesu. 51Avene avale nu-Jesu ujyunge akagolosa ikivoko kya mwene akaswekula ulwuvo lwa mwene akamenga unkivaga va nteketsi umbaha, akampyatula imbulukutu mamato. 52Pwu UJesu akata: Kilivula ulwuvo lwako uluvike upwu lwale. Mańa voni aviswekula ulwuvo, vwu viswitsaga luluvo. 53Uve pange vwita pandemile ukudova avakunanga kwa dada, vwita umwene pwu abelage ukunsuṅila avasuṅwa isipuga sya ligoha isilutile nakukitsigo nasivili uvwongosu? 54Ulwakuva ndita tsitsage itsa kalata uvi atsovye ṅani atye vwu upita tsitsage vuvule-vule tsoni. 55Pwu akatsova navo baho avanu ikipuga akata: Upwu mwitsile kukuńibata une, pwu mutye tutsikumwibata umitsi, mukolye nińuvu nisonzo. Sikutsoni upwu twavetsaga mwa Tempeli twivoni, nupwu ndavavulaga inongwa sikutsoni, namuńibiti kiki? 56Tsoni tsitsitsi upwu tsikipela vuvule-vule, pwu tsikipela ukuta mwu tsitsilage mumwa itsu vatsovye ṅani avakalata va vańamalago. Pwu vakandekela voni avakongi vakakimbila.

57Avene avamwibite UJesu vwu vakabiha nave kwa Kajipa kunteketsi umbaha. Ulwakuva kwu valundamine navamańakalata navańivaha avenekivumbuko. 58Umwene UPetele akankonga pavutale, akatsisika navo nńumba jya nteketsi umbaha. Akingila akatsitama navakivaga. Akata ndilole ukwu tsisililaga. 59Avene avateketsi avavaha navańivaha avenekivumbuko nululundamano lwoni lwa vatsovanongwa, vwu vakalonda itsinge itsa vunwasi itsa kundema UJesu, itsa kumbudila. 60Vakalemwa. Nupwu vimaga vongosu avakutsova itsa vunwasi, vakavona valemilwe. Pambele pwu vakavoneka vavili, 61vwu vakata: Umunu uju tukavona ita: Ndilumańile ukumamula ińumba imbalatse jya Nguluve iji, nditsenga amatsuva gadatu vuvule pakujitsusa. 62Pwu akima unteketsi umbaha akimabaho akambutsa akata: Tsoni itsu vikukutsova ava, nda navukwanda ilinge uve? 63Umwene UJesu akava mye vuvule. Pwu unteketsi umbaha akavuja akata: Lino jyigaga ku kwa Nguluve uvi alikwo, utuvule ungave veve vi Kilisiti, ungave veve nswambe va Nguluve. 64Umwene UJesu akata: Nduvwu vwitsova. Ino ndivavule: Mutengulaga lino pwu muvonaga Uńamunu atamile kukivoko ikyandyo kya Mwenemaka, ndatsivonaga igendela mmavingo ga kukyańa ukwitsa. 65Pwu unteketsi akalendulanya imisabwa gya mwene akata: Andukile amadusi Unguluve. Pwu tuvalondage viki avange avakuntsova? Lola ńivoni mpulike vwu ikunduka amadusi Unguluve lino vuvule-vule. 66Ndeti uńe? Pwu avene vakanda vakata: Bako vi va kubudwa vuvule. 67Pwu vakambehela amati kumiho, vakangumba niṅonde, vakantova amapi 68vakata: Ukwa, lagaga vi Kilisiti veni uvi akutovige?

69Umwene UPetele vi akatama panzi nduvanza. Pwu akavona ujyunge umunu va vene undala ihegelela kumwene ita: Nuve uvetsige nu-Jesu va mu-Galilai. 70Umwene UPetele akabela vwu vipulika voni akata: Mańa nanditsimańili itsu vwitsova. 71Vwu ita ndihuma pandyango, pwu akambona ujyunge undala, namwene akavavula avale baho akata: Namwene uju avetsaga nu-Jesu va mu-Nasaleti. 72Umwene akabela akongeletsa nalilya kujiganika akata: Nandimmańili lusiku uvi vukuntsova. 73Vwu valindile padebe pwu vakahegelela kwa Petele avene avimile baho vakata: Jilweli nuve vwu vanino valya, mańa jikuhendime inzovele jyako. 74Pwu umwene akikotola akata nukujiganika akajiganika akata: Une nandimmańili lusiku umunu uvi mukuntsova. Pwu jikavika inongove, 75Pwu UPetele akakumbuhitsa ilimeńu ilyu UJesu ambulile ilyu atye: Vwu niṅongove jikanale ukuvika, vwu vwibelile kadatu kwane vwu utye nandimmańili une. Pwu akahuma panzi, akatsilila ulwihotsi uludindila nakunsingo.

Currently Selected:

Matai 26: Kinga

Highlight

Copy