Matai 25

1Pwu uludeva lwa kukyańa luvetsaga ndavahinza kitsigo avatolaga ińale na vene tsa maviga, vakabiha kukumwupilila untegulandala. 2Lola vahano vale vapelwa, vahano vale vańaluhala, 3Avapelwa ava ińale tsu vakatola, lola amaviga gwu vakilekelwa ukugega. 4Avene avańaluhala vwu vakakoleṅanya vakata nińale tsa vene vakata namaviga ga vene nsihava sya vene. 5Vwu vavwene asuvye untegulandala, pwu vakatengula ukukutila vakagonelela itulu voni. 6Lino pakilo pagati pwu jikakolwa ija kuta: Lola itsile untegulandala, mbihage kukumwupilila. 7Pwu vakasisimuka voni avahinza ava, vakagaha ińale tsa vene. 8Pwu avapelwa vakatsova kuvajyavo avańaluhala vakata: Mutupetsage agange agińo amaviga, mańa ińale tsitu tsiva pakutsima. 9Avańaluhala vakanda vakata: Bako pange pwu tudumukilwagwa twivoni nuvwe nuńe. Mbihage kuvańaligutsi mukagule. 10Lino vwu vabye kwigula, pwu untegulandala akasika. Avene avisavulye ṅani vwu vakingila nave nkulya isya pavutegulane, kundyango vakadinda. 11Pambele pwu vakitsa navene avange avahinza valya vakakuta vakata: Nkuludeva, nkuludeva ungatudindulila. 12Umwene akanda akata: nandivamańili uńe. 13Pwu ndita: Mbetsage miho, mańa ilyene ilitsuva namulimańili, nakene akavalilo nankamańili.

14Ulwakuva tsigahile nditsa munu uvi alondile ukugenda inzila, pwu akavilanga avakivaga va mwene akavalekela ikyuma kya mwene. 15Ujyunge akampa indalama ihano, ujyunge akampa ivili, ujyunge akampa lupamato lwene. Akavapela umwu vavelye uluhala. Pwu akalutila ṅani inzila jya mwene. 16Umwene uvi upilye indalama ihano akabiha pakwolosa, pwu akakava itsinge indalama ihano. 17Vuvule-vule uvi upilye ivili, namwene akakava itsinge ivili. 18Umwene uvi upilye lupamato lwene, vi akabiha nalwo akatsijava iliguli pasi, akalusila ulutalama lwa nkuludeva va mwene. 19Vwu pagonile sitso, pwu akatsikwitsa unkuludeva va vakivaga akata: Mumbalilage. 20Pwu akahegelela uvi upilye indalama ihano akatsivikila luninie nindalama itsinge ihano inine akata: Nkuludeva vwamye indalama ihano, lola ndikavile itsinge indalama inine ihano. 21Pwu unkuludeva va mwene akata: Ena vi nkivaga vi nnonu, vi ngolosu. Vwale ngolosu pavudebe pwu ndikukuvika pavuvaha. Ingilaga nkukina nunkuludeva vako mbunnonu. 22Namwene uvi upilye indalama ivili akahegelela akata: Nkuludeva vwamye indalama ivili, lola ndikavile itsinge ivili indalama inine. 23Pwu unkuludeva va mwene akata: Ena vi nkivaga unnonu, vi ngolosu. Vwale ngolosu pavudebe, pwu ndikukuvika pavuvaha. Ingilaga nkukina nunkuludeva vako mbunnonu. 24Namwene uvi upilye ulutalama lupamato lwene akatsitsova akata: Nkuludeva ulwakuva ndakumańile ukuva vi munu vi ntalamu, wibena umwu nulahili, vulundamanihitsa nsyanga umwu nulagahitsi, 25pwu ndikadwada, ndikatsisila ulutalama lwako. Kwiki ikyuma kyako. 26Umwene unkuludeva va mwene akanda akata: Vi nkivaga vi mbivi uve, vi mwolo! O, vwalumańile ukuta ndibena umwu nalahili uńe, ilundamanihitsa nsyanga umwu nandilagalitsi. 27Pwu vwale nakiki ukuvapa ikyuma kyango avikwolosa?. Lino vwu nditsile, pwu ndili nditolela luninie nivana. 28Pwu akata: Mutole ulutalama lwa mwene ulu, mumpetsage uvi ali nindalama kitsigo. 29Mańa voni avali nasyo isinge vwu vikwongeletsivwa ukupevwa nisinge vwu silesukaga vuvule. Avene uvwu navali nako akange, vwu vipokivwagwa nakene ukwu vangave vali nako. 30Umwene unkivaga umbivi uju vi muntage muṅisi jya mumbale. Mwu tsilava ngolo tsene, lulava lwu lugadutso lwene lwa mino.

31Mańa lungave lusiku Uńamunu vwu ikwitsa mbuvaha vwa mwene navasuṅwa va mwene voni pwu alatama pakitamilo kya mwene ikya vuvaha. 32Pwu avanu isivumbuko syoni valalundamana mbulongolo mwene, pwu umwene alavapatulanya nduvwu undimi ipatulanya iṅolo nimene. 33Pwu iṅolo alatsivika kukivoko kya mwene ikyandyo, itsene imene alatsivika kukyaṅigi. 34Pwu alatsova unkuludeva kuva kukivoko kya mwene ikyandyo alata: Mwitsage kunu ńi vasajivwa va dada uńe, mwingilage ndudeva ukuta vuhale uvwu Unguluve avagahye uńe, akatengula upwu kyapelwagwa ikilunga. 35Mańa upwu javavaga inzala une, pwu nkasugila isinu une, upwu ndumilwagwa amagasi une, pwu nkanwesa amagasi une, upwu ndale ngendanzila une, pwu nkańupilila nńumba tsińo uńe, 36upwu ndagendaga vuvule imisabwa une, pwu nkaswalitsa uńe, upwu ndatamwagwa une, pwu nkitsa kukundola, upwu ndale nńumba jya vańololo, pwu nkitsa kwane,. 37Pwu valatsova avagolosu valata: Nkuludeva tukuvwene ndali vwu uli ninzala, tukusugye ndali isinu? Tukuvwene ndali vwu vwumilwe amagasi, tukuńwesitse amagasi ndali? 38Tukuvwene uli ngendanzila ndali, tukwupilye ndali nńumba tsitu? Tukuvwene ndali vugenda vuvule imisabwa, tukuswalitse ndali? 39Tukuvwene utamilwe ndali, tukuvwene ndali uli nńumba jya vańololo, twitsile ndali kukukulola? 40Pwu umwene unkuludeva alanda alata: Jilweli-lweli ndikuvavula ndita: Tsoni itsu mumbombye ujyunge unjango ndave ndebe vuvule, tsu mumbombye une. 41Pwu navene ava kukivoko ikyaṅigi alatsova navo alata: Vuki pane apa ńi ndi va lukoto uńe, mbihage kumwoto gwa sikutsoni ugwu vakotsivwe nu-Setano navasuńwa va mwene. 42Mańa upwu javavaga inzala une, pwu nkańima isya kulya une, upwu ndumilwagwa amagasi, pwu nkańima amagasi, 43upwu ndale ngendanzila une, pwu nkabela ukuńupilila nńumba tsińo, upwu ndagendaga vuvule imisabwa, pwu nkabela ukunswalitsa, upwu ndatamilwe, upwu ndale nńumba jya vańololo, pwu nkabela kukundola. 44Pwu navene valanda valata: Nkuludeva natwitsili ndali kukukuvombela vwu tukuvwene uli ninzala, nupwu vwumilwe amagasi, nupwu vwale ngendanzila, nupwu vwagendile vuvule imisabwa, nupwu vwatamilwe, nupwu vwale nńumba jya vańololo–natwitsili ndali? 45Pwu umwene alanda alata: Jilweli-lweli ndikuvavula ndita, sikutsoni upwu nkaleka ukumbombela ujyunge unjango undebe sitso, pwu nkaleka ukumbombela une. 46Pwu avene ava valabihaga kukuvilwa sikutsoni, avene avagolosu vwu valabihaga kuvwumi vwa sikutsoni.

Currently Selected:

Matai 25: Kinga

Highlight

Copy