Matai 24

1Pwu UJesu akahuma mwa Tempeli akaluta. Pwu avakongi va mwene vakahegelela kumwene vakambonya ińumba jya Tempeli. 2Umwene akanda akata: Mutsivwene tsoni tsitsitsi umwu tsivelye? Jilweli-lweli ndikuvavula ndita: Nilinge iliganga nalilalekivwe palinine ilitsilakupangulivwa. 3Vwu atsitamile pakidugala kya mono, pwu avakongi va mwene vakahegelela kumwene vwu vijekye nave vakata: Utuvulage, ilitsuva lya kwitsila tsitsitsi lyu liliku? Nikimańilo kya kutsimańila ukwitsa uve, nikya kutsimańila ukusila ikilunga kyu kiliku? 4Pwu UJesu akanda akata: Mbandikage, mulole nujyunge alavatekaga. 5Mańa valitsila mwitavwa lyango avanu vongosu valata: Nene Kilisiti. Valavalusanya avanu vongosu. 6Ndapulika iligoha ningolo jya ligoha. Mbandikage, ndakeńemukaga, mańa tsu upita tsilongolage ukuvoneka tsitsitsi, itsene itsa kuvusililo vwu tsikanale tango. 7Ulwakuva nikivumbuko ikinge kya vanu kilakihambukila ikivumbuko ikinine, nunkuludeva va kilunga ikinge alamambukila unkuludeva unine uva kilunga ikinge. Jilagwa inzala nsilunga-nsilunga, nikilunga kilalindima nsilunga-nsilunga. 8Tsoni tsitsitsi lola vwu vutengulilo vwa vusumbe. 9Pwu valavakinila, valavabuda uńe. Nda vasulwa kuvanu voni ulwakuva ndi nilitavwa lyane. 10Pwu tsilavambutsa vongosu tsitsitsi. Valata nukuhendamanila avene vene. 11Navene navańamalago va vunwasi valima va vongosu avalavalusa avanu vongosu. 12Pwu ulumeno lulavaala lulakwila mwoni, pwu ulwene ulugano lwa vongosu lulatsitsima. 13Uvi ikijumilitsa isika nakuvusililo vi alapona. 14Inongwa innonu tsa ludeva tsilapulikika mwoni nkilunga umwu vatsengile avanu, voni avapanzi ukuta vatsimańage, pwu tsilitsa itsa kuvusililo.

15Lungave lusiku mbwene vapalaṅine pavuvalatse, vimike itsili mwiko (uvi angave pakalata ikutsivona tsitsitsi, vi alolage vunnonu), 16pwu vakańilage nsidugala voni avali mu-Jutai. 17Uvi ali pakyańa pańumba, vi alikaga nkutola ikinge nńumba jya mwene. 18Nuvi ali pakulima nkilimila kya mwene, vi alakilivukaga kumbele nkutola ikilundwa kya mwene. 19Muliviki ńi vadala ilitsuva lilyo ńi vańimali, ńi mukwosa avana! 20Mwisajage itsa kukimbilila uńe ukuta tsilavitsilaga nammakya napasabati. 21Uvusumbe vwa litsuva lilyo vulava vwongosu vuvule, uvutavakwo nuvunine umwu kitengulye ikilunga ukutsisika nakulino kunu, uvutsilakuvakwo nuvunine nakumbele. 22Lingave ilitsuva lilyo lyalekaga ukudumulanivwa, pwu ndili nakuli ujyunge umunu uvi ipona. Lola liladumulanivwagwa ilitsuva lilyo avahalilwe ukuta vaponage. 23Ilitsuva ilyu ngave mbwene ujyunge ikuvavula ita: Lola UKilisiti uju kunu, pange ulya uku, pwu mulidikaga. 24Mańa valasisimuka nava-Kilisiti va vunwasi navańamalago va vunwasi, valapelaga isya kudega isivaha nisipelwa isya kugetsa ukuvajatsa navahalilwe. 25Lola ndilongolye ṅani ukuvavula. 26Lola ngave mbwene vikuvavula vita: Lola uju ndukungu umu, kwu bako ukubiha uńe. Vangave vita: Uju nkajumba ka kugati umu, kwu bako ukwidika uńe, 27Mańa nduvwu inzasi jihuma kuvuhumo vwa litsuva jitsisika nakuvusemo ukumulika, vwu alagahaga vuvule-vule namwene Uńamunu ukwitsa. 28Upwu gungave pwugule unsimba pwu tsilundamana ingasimula.

29Ṅani-ṅani vuvule vwu avanu vahumile pakukuvilwa uvukuvilwa vwa mwaka ugu, pwu nilitsuva lilasisivalaga numwetsi gulalekaga ukuvala, ninondwe tsilatumbukaga kukyańa, navene navamaka ava kukyańa valajuganikaga. 30Pwu kilavonekaga baho ikimaṅlo kya Ńamunu kukyańa. Pwu valalilaga ava nkilunga isivumbuko syoni, valambonaga Uńamunu ukwitsa vwu atamile pamavingo ga kukyańa, vwu ikwitsa namaka nuvudwadwa vu vwongosu. 31Pwu alavasuṅaga avasuṅwa va mwene avakuvangalape imbaha, vwu valavalundamanyaga avahalwa va mwene, valahumaga navo kumakuluguta goni gwu gani, voni vuvule ukuhuma kuluvasu lupamato lwa kuvutandatse ukutsisika kulunine.

32Mutolele munkuju ikihwanihitso. Upwu amapagika ga gwene muvwene gali nuvwigu galembile ukulemba amani, pwu mukukimańila baho ikisuku ukuta kihegelye. 33Vuvule-vule nuńe ngave mutsivwene tsoni tsitsitsi ukwitsa, pwu mutsimańilage baho ukuta itsile ali pandyango. 34Jilweli-lweli ndikuvavula ndita: Avanu va lino ava navalajage voni vwu natsipelilwi tango tsoni tsitsitsi. 35Nikya kukyańa nikya pasi ikilunga syu silajagaga, amameńu gango gwu nagalajage lusiku. 36Ilyene ilitsuva lilya nakavalilo kalya kwu nujyunge umunu nakamańili, navene navasuṅwa va kukyańa navakamańili, nunswambe nakamańili, akamańile ju dada mwene.

37Itsa pakwitsila Uńamunu natsene tsilava ndatsilya itsa pamwaka gwa Nwaka. 38Palya, mmatsuva galya ulwongometso luvetsage pakwitsa, pwu avene avanu sikutsoni vuvule vakata nukulya isinu vakata nukuńwa uvugimbi, vakata nukutola avadala, vakata nukuvavika kuvagosi va vene, vakatsisika palitsuva ilyu UNwaka ingilage mungalava. 39Vakabela ukwisagila itsinge vakatsisika upwu ulwongometso lwitsile luvambulinye vuvule voni. Vwu valagahaga vuvule-vule upwu ikwitsa Uńamunu. 40Palitsuva lilya valalima vavili pakilimila kipamato kyene, ujyunge alatolwa, unine vi alalekivwa baho. 41Pwu avadala vavili valaheveta palwala lupamato lwene, ujyunge alatolwa, unine vi alalekivwa baho.

42Pwu ndita: Mbetsage miho, mańa namukamańili akavalilo ka kwitsila unkuludeva vińo. 43Tsu mukumbuhitsage tsitsitsi: Angave umweneńumba ammańaga umitsi ukuta ikwitsa pakavalilo akatunga pakilo pwu ndili iva miho, pwu ndili ikunswima vwu ita ndijave ińumba jya mwene. 44Pwu ndita vwu mwisavulage vuvule-vule nuńe, mańa Uńamunu ndavona itsile pakilo ukwu uńe mwita pange akanale. 45Nda avekwo unkivaga umugu uva luhala, uvi unkuludeva va mwene ikumwimika ukuta itse avapetsage isya kulya ava nńumba jya mwene, vwukitsile akavalilo ka kulila. 46Vi vandugataluko unkivaga uju angave unkuludeva va mwene ikwitsa ivona ivomba itsu andagye. 47Jilweli-lweli ndikuvavula ndita: Alamwimika ukuta avetsage va kulolela ikyuma kya mwene kyoni. 48Lola angave unkivaga jujwa mbivi, munumbula jya mwene angave ita: Unkuludeva vango akanale isuvila ukwitsa, 49pwu ime pakuvatova avakivaga avanine atetsage nukusyota isinu, atetsage nukuńwa uvugimbi navakińwelo, 50pwu unkivaga jujwa akakeńemuka ilitsuva ilinge unkuludeva va mwene itsile vwu umwene ita akanale, itsile pakavalilo ukwu umwene nisagili. 51Pwu umwene aladumulanya nisonzo, alangavila lunine navanwasi iligavo lya mwene. Mwu tsilava ngolo, lulava lwu lugadutso lwene lwa mino.

Currently Selected:

Matai 24: Kinga

Highlight

Copy