Matai 27

1Vavwene vwu vukye pavusiku pwu voni avateketsi avavaha navańivaha avenekivumbuko vakalundamana vakatsovana itsa kumbuda UJesu, 2Vakankunga vakambika pa-Pilate undolelakilunga. Vi vakatsikumpa. 3Lino UJuta uvi amendime, vwu ambwene ukuta vadumwe vatye tukumbuda, pwu inumbula jikatova, pwu akakilivula indalama itsu vampye itsa pesa imilevulo gidatu akatsihilika kuvateketsi avavaha nakuvańivaha avenekivumbuko 4akata: Nditulile inongwa upwu ndivapye unkisa untsilanongwa. Avene vakanda vakata: Tsu tuli viki natso tsitsitsi uvwe? Tsu tsako jyuve kukwa. 5Pwu umwene akatsitaga pasi nńumba imbalatse indalama itsu vampye akavuka akatsiluta pakwitulika. 6Pwu avateketsi avavaha vakahola indalama itsu atsitagile pasi vakata: Mwiko ukuvika mwivokosi lya ndalama tsa Tempeli, mańa tsa munkisa tsitsitsi. 7Vwu vatsovine pwu vakatsigula nave umbumbasivya ikilunga kya mwene, vakata kyu kivetsage kya kuvasilamwo avahenza. 8Pwu ikilunga kikyo “Kilunga-kya-nkisa” ilitavwa lya kyene nakulino kunu. 9Pwu tsitsile baho itsu atsovaga UJelemija upwu alagage upwu atetsage: Vatolile indalama tsa pesa tsitso imilevulo gidatu itsa ligutsi lya kungula ungulwa uvi vangulage kuvańa-Isilaeli, 10tsu vahombile pakilunga kya mbumbasivya nduvwu andagilaga unkuludeva.

11Umwene UJesu vi vakatsikumbika pa-Ndoma undolelakilunga. Pwu undolelakilunga akambutsa akata: Veve nkuludeva va va-Juta? Umwene UJesu akanda akata: Nduvwu vwitsova. 12Vwu vikumbulila avateketsi avavaha navańivaha avenekivumbuko, pwu umwene akaleka nukwanda ilinge. 13Pwu UPilate akambutsa akata: Nda navupulika tsoni itsu vikukutsova? 14Umwene akaleka nukumwanda ilinge ilimeńu. Pwu akadega sitso undolelakilunga.

15Sikutsoni palitsuva ilivalatse (lya Pasa) pwu undolelakilunga akava nulwiho lwa kuvavopolela mpamato uva pańololo uvi vahalaga avanu. 16Pamwaka ugu pwu pwale ujyunge pańololo unduti uvuvivi ilitavwa lya mwene ale vi Balaba. 17Avwene valundamine avanu, pwu akavavutsa akata: Ndivavopolelage aliku? Pange UBalaba, pange UJesu uvi vikuntsova nilya Kilisiti? 18Ulwakuva avamańile ukuta kwu kavini vuvule upwu vikumiga. 19Avwene vwu atamile pakitamilo kya kuhigila, pwu undala va mwene akasuṅa undomo ugwa kuta: Uvandikage uve ulansakaga umunu ungolosu uju, mańa angatitse vukye mmagonasivi. 20Avene avateketsi avavaha navańivaha avenekivumbuko vakavalutilila ṅani avanu ikipuga kyoni vakata: Mukatetsage utupetsage ju Balaba, umwene UJesu vi untovelele pakidamiṅanye. 21Undolelakilunga akavavutsa akata: Vwu vavili ava ndivavopolelage aliku? Avene vakata: Umbopole ju Balaba. 22UPilate akavavutsa akata: Ndigahe ndeti nave UJesu uvi vita vi Kilisiti? Voni vakambula vakata: Untovelelage pakidamiṅanye. 23Umwene undolelakilunga akavutsa akata: Atulile inongwa ńi? Avene vakongeletsa sitso ukuswanganya vakata: Untovelelage pakidamiṅanye. 24UPilate vwu avwene navikumwidika, vwu avwene vikwongeletsa vuvule nukuhambuka, pwu akatola amagasi akapuguha mmavoko vwu vilola avanu ikipuga kyoni akata: Une ndili mbalatse vuvule unkisa gwa munu ungolosu uju, tsińo uńe kukwa. 25Pwu vakanda avanu ikivumbuko kyoni vakata: Uguleke unkisa gwa mwene gutwitsilage uvwe navana vitu. 26Pwu akambopola UBalaba. Umwene UJesu akavapa avakutsikuntovelela pakidamiṅanye.

27Pwu avasikali va ndolelakilunga vakantola UJesu vakabiha nave nńumba jya mbembenuka vakangongolela ikipuga kyoni kya vajavo. 28Vakansula imisabwa gya mwene, vakanswika ugwańingilitsa unduṅu. 29Vakahona uludiṅulilo lwa mitwińo, lwu vakambika pantwe, vakampa nulugugu nkivoko ikyandyo, vakasugama pasi mbulongolo mmwene vakameka vakata: Tukukupembetsa vi nkuludeva va va-Juta. 30Vakambehela namati, vakatola nulugugu vakantova pantwe. 31Vwu vamalile ukumovela vuvule-vule, pwu vakanswika imisabwa gya mwene. Pwu vakabiha nave kukuntovelela pakidamiṅanye.

32Vwu vihuma nave pwu vakaganila numunu va mu-Kilene, uvi ilitavwa lya mwene ale vi Simoni, vi vakamwumilitsa ukuta ampimbile ikidamiṅanye kya mwene. 33Vwu vatsisike nave upwu vita pwu pa-Goligata, kwu kuta pwu palińalalyantwe, 34pwu vakata tunwese amasilu ugwu vahanzitse nińongo. Umwene vwu notsanzitse mundomo, pwu akabela ukuńwa. 35Vwu vantovelye pakidamińanye, pwu vakalagulila pakugavana imisabwa gya mwene. 36Pwu vakatama baho vakandolela. 37Pakyańa pantwe vakatovela nuvuvige uvwu vavigile inongwa tsa mwene itsu vambudilaga uvwa kuta: UJU VI JESU, VI NKULUDEVA VA VA-JUTA. 38Vakavatovelela luninie nave pasidamiṅanye sya vene navabudi vavili, ujyunge vakambika kukivoko kya mwene ikyandyo, ujyunge kukivoko ikyaṅigi, umwene akava pagati. 39Mańa voni avalutaga baho vakammelula vakatiga imitwe gya vene 40vakata: Vi ulumańile ukumamula ińumba imbalatse, utsenge amatsuva gadatu vuvule pakujitsusa, pwu uli nakiki lino ukwipoka vimwene? Kiki ukwika pakidamiṅanye, humbe jilweli uli nswambe va Nguluve! 41Navene navateketsi avavaha navamańakalata navańivaha avenekivumbuko vuvule-vule vakammelula vakata: 42Avange avapokaga sikutsoni, ali nakiki ukwipoka mwene lino? Ikaga pakidamiṅanye humbe jilweli nkuludeva va Isilaeli, pwu nuvwe tukumwidikaga! 43Ahuvilaga kwa Nguluve sikutsoni, vi ali nakiki ukumbanga lino, humbe jilweli anganile! Mańa sikutsoni atetsaga: Nene nswambe va Nguluve. 44Navene navabudi avatovelilwe lunine nave pakidamiṅanye, navene vakanduka tsitso.

45Pwu iṅisi jikagwa ikilunga kyoni jikahuma pakavalilo kantanato jikatsisika pakavalilo ka budikakupamato. 46Akavona pakavalilo ka budikakupamato UJesu pwu akakuta ilimeńu ilivaha akata: Eli, Eli lama sebakatani! Kwu kuta: Vi Nguluve vango, vi Nguluve vango undekile kiki! 47Avange avale baho vwu vipulika ilimeńu ili, pwu vakata: Ikumwilanga Elija. 48Pwu ujyunge akanila ṅani-ṅani akatola akasabwa akatsaba mwa asiki, akavika palugugu akanwesa. 49Avene avanine vakata: Leka tulole vwu itsile kukumpoka Elija. 50Umwene UJesu akavuja akakuta ilimeńu ilivaha pwu akatsilika. 51Pwu nilivalika ilyu vapindile nńumba imbalatse likalenduka, likahuma kukyańa likatsisika pasi gakipela gavili vuvule. 52Nikilunga kikalindima ninalavwe tsikabatsuka nuvuguli vukadinduka nimihana gya vavalatse avagonile itulu gikatsuka myongosu vuvule. 53Vakavona atsukile umwene, pwu navene vakahuma mbuguli vakatsikwingila mbutsenge uvuvalatse vakavavonekela va vongosu. 54Avene undongotsi navasikali avandolelaga UJesu vwu vakuvwene ukulindima vwu vatsivwene tsoni nitsinge itsipelaga, pwu lukavavona uludwado lwongosu sitso, vakidika vakata: Jilweli vi nswambe va Nguluve umunu uju! 55Pwuvale baho navadala, vwu vakandola pavutale. Vwu avankongaga UJesu ukuhuma mu-Galilai, avakata tumbombelage imbombo. 56Vali nu-Malija va mu-Magatala nu-Malija uvańina va Jakobu nu-Josepu, nuvańina va vańa-Sebetai.

57Vwu vuhwe kumihe pwu akavoneka ujyunge umunu umosu va mu-Alimatai, uvi ale vi Josepu ilitavwa lya mwene, uvi ipelile ukuva nkongi va Jesu. 58Vi akabiha kwa Pilate, akatsidova ummana gwa Jesu. Pwu UPilate akidika akata: Mumpetsage. 59Pwu UJosepu akagutola ummana gwa mwene akagubinila mmisabwa imivalasu imipya. 60Akatsikuguvika mbuguli vwa mwene uvupya vuvule, uvwu vapunzile mulunalavwe. Akabilusa iliganga ilivaha pandyango gwa vuguli. Pwu akaluta. 61Avene va-Malija va mu-Magatala nu-Malija ujyunge vwu vakatama baho tango vakalolana nuvuguli.

62Ndakilavo palitsuva ilikongile pa lya kwinotsehetsa, pwu vakalundamana voni va-Pilate navateketsi avavaha navapalisai, 63vakatsova nave vakata: Nkuludeva tukumbuhitse ilimeńu ilinge lya vunwasi ulya atsovile vwu pwale tango. Mańa atye ndilatsukaga palitsuva lya datu. 64Uvalagilage avange avakulolela uvuguli amatsuva gadatu. Lola pange avakongi va mwene vakamitsage, nakuvanu vatsovage ilyakuta atsukile umwu aswe. Pwu itsa vunwasi tsa mumbele tsitsitsi pwu tsivetsaga mbaha nakundongotsi tsilya. 65Umwene UPilate akidika akata: Vwu ava avasikali. Mbihage nkalolele nduvwu mwisagye uńe. 66Pwu vakatsikuvavika avasikali va kulolela uvuguli, vakaviga nuvuvige vwa nkuludeva paliganga baho.

Currently Selected:

Matai 27: Kinga

Highlight

Copy