Matai 23

1Pwu UJesu akavavula avanu ikipuga kyoni navakongi va mwene akata: 2Pakitamilo kya Mose vatamile avamańakalata navapalisai. 3Tsoni itsu vikuvavula vita mukongage tsu itsi tsu tsiki, tsu mukongage muvombage vuvule. Itsene imbombo itsu vivomba avene tsu ndakongaga. Ulwakuva avene itsu vitsova tsili tsene, natsene itsu vivomba tsili tsene ponu. 4Ukukunga kwu vikunga imitsigo imitsito imideńavanu, gyu vikuvatwika pamavega avanu, ukugyabasa kwu avene navikugyabasa nulukonze lwa vene lupamato lwene. 5Tsoni imbombo tsa vene upwu vivomba, pwu vita mwu vatulolage avanu. Utwavakalata twa vene twa kwikumbuhitsa twelesu, navwene uvudika vwa silundwa sya vene kumalunde vutale vuvule. 6Upwu vibiha pakutama pakulya isinu, pwu vikihalila pavwimikivwa avene, nanńumba tsa kwisajilamwo mwu vita tutame pasitamilo sya vuvaha. 7Vanogilwe ukuta vavapembetsage avanu nduvanza, vavatsovage ilya mańisi ilitavwa. 8Uńe kwu bako ukuta vavatsovage ilya mańisi ilitavwa uńe avanu. Mańa ndi numańisi vińo mpamato mwene, uńe ndi vanamunu ńi voni umwu mbelye. 9Ndantsovaga nujyunge umunu ukuva vi dadajińo nkilunga umu, mańa ndi nudadajińo mpamato mwene, vi va kukyańa. 10Nilya ndongotsi valavatsovaga uńe avanu, mańa ndi nundongotsi vińo mpamato mwene, vi Kilisiti. 11Uvi avalutile uvuvaha ńi vanine umwu mbelye, vi avetsage va kuvavombela imbombo ńi vanine. 12Mańa uvi ikijimika mwene, vi ikwisivwa, uvi ikijisa mwene, vi ikwimikivwa. 13Muli viki ńi vamańakalata nańi vapalisai ńi vanwasi uńe, ńi mudinda kuludeva lwa kukyańa vwu vita twingilage avanu. Ulwakuva mutye uńe namukwingila, mutye avita twingilage mukuvakilivula. 14Muli viki ńi vamańakalata nańi vapalisai ńi vanwasi uńe, ńi mwilya vuvule ińumba tsa vadala avaswile, pwu mwi-luta pakwisaja ińisajo ińale itsa kuṅala. Tsu ndalutililivwa ukuvungwa vwu muhigwa. 15Muli viki ńi vamańakalata ṅani vapalisai ńi vanwasi uńe, mubitagila mwi-mala nisilunga syoni ningasi tsoni vwu mutye tundondage ujyunge uva kunkilivula. Vwu mumbwene pwu mukumpela ukuva vi ńalugengelwamwoto vuvule uvi alutile nuńe. 16Muli viki ńi valongotsi ńi vabosu unéńi mwita: Uvi ijiganika ita mańa nakuńumba imbalatse jya Tempeli, vwu ijiganika vuvule, mańa uvi ijiganika ita mańa nakwa sahabu va pańumba imbalatse jya Tempeli, vwu ajiganike ikungile vuvule. 17Vwu vutsimu vuki, vwu vubosu vuki uńe! kivaha kiki, nasahabu nińumba imbalatse jya Tempeli ijikumpa uvuvalatse usahabu? 18Mwita uvi ijiganika ita mańa nakukitekelelo kya kutekelapwo, vwu ajiganike vuvule, mańa uvi ijiganika ita mańa nakunekelo ijili pakyańa pakitekelelo, vwu ajiganike ikungile vuvule. 19Vwu vubosu vuki uńe! Kiki kivaha ninekelo nikitekelelo kya kutekelapwo ikikujipa uvuvalatse inekelo? 20Namwilola, mańa uvi ijigila kukitekelelo kya kutekelapwo, pwu vwu ajigye nakukyene nakusyoni isili pakyańa pakitekelelo. 21Uvi ijigila kuńumba imbalatse jya Tempeli, pwu vwu ajigye nakujyene naku uvi alimwo ngati. 22Uvi ijigila kukyańa, pwu vwu ajigye nakukitamilo kya Nguluve naku uvi atamile pakyańa pakitamilo. 23Muli viki ńi vamańakalata nańivapalisai ńi vanwasi uńe, ńi napambilipili napambwiga napańungu pwu mutola isya pandevulo, itsene imbaha musimilitso–nitsa kugolosa vuvule ukuhiga inongwa, nitsa kisa, nitsa lwidiko–tsu mutsilekile vuvule. Ngave mutetsaga itsinge itsi tsu tutsivombage, natsene inine tsilya tsu tulatsilekaga-pwu lweli. 24Ńi milongotsi ńi mibosu uńe! Imbwele tsu muhutsa, itsene ingamila tsu mumilila lunine vuvule. 25Muli viki ńi vamańakalata ṅani vapalisai ńi vanwasi uńe ńi muhutsuga kunzi isinwelo nindelema tsińo, ngati si sigomwa syene, vwu vupumu vwene vudigile mumwa vuvule. 26Vi mpalisai vi mbosu uve, uhutsuge tango vuvwa ngati nsińwelo namundelema, pwu navwene uvwa kunzi vuvalalage. 27Muli viki ńi vamańakalata nańi vapalisai ńi vanwasi uńe, ńi muli nduvuguli uvwu vabakile ingusi, uvwu kunzi vuvoneka ukuva vunnonu, vwu sidigile mumwa isitsege, vwu vudigile mumwa vu vuvosu vwene ngati. 28Vwu ngahile vuvule-vule nuńe, kunzi muvoneka ndi vagolosu vuvule upwu vikuvalola avanu, ngati mwu vudigile vwu vunwasi vwene, mwu ludigile nulumeno lwene. 29Muli viki ńi vamańakalata nańi vapalisai ńi vanwasi uńe, ńi mutsengela nuvuguli vwa vańamalago, ńi munotsa namaganga ga pavuguli vwa vagolosu.

30Mwita: Tungave twavetsaga kumwaka gulya ugwu valekwo avadada, pwu ndili natwave luninie navo pakududa unkisa gwa vańamalago ava. 31Pwu mwihendime ńivene ukuva ńi vana va vene avavabudile avańamalago. 32Pwu muditsa ikigelelo kya nongwa tsa vadadajińo valya. 33Ńi ńandalwe, ńi lukona lwa nato uńe, mupone ndeti kulugenge lwa mwoto umwu tsitsidumukila inongwa tsińo? 34Pwu ndita: Lola ndikuvasuṅila navańamalago navańaluhala navamańakalata. Avange ndavabudaga ndavatovelelaga pakidamiṅanye, avange ndavatovaga nisonzo nńumba tsińo tsa kwisajilamwo, ndavagatatsaga uvutsenge vwoni. 35Unkisa gwa vagolosu ugu vadudikye nkilunga umu pwu ukuta guvitsilage juńe gwoni vuvule ukuhuma pankisa gwa Heveli ungolosu ukutsisika pankisa gwa Sakalija uńa-Belekija, uvi mwambudilaga pagati napagati nńumba imbalatsa ija Tempeli nikitekelelo kya kutekelapwo. 36Jilweli-lweli ndikuvavula ndita: Tsoni tsitsitsi tsikuvavonaga avanu va lino ava vwu valikwo.

37Vi Jelusalemu, vi Jelusalemu vi vukuvabuda navańamalago, vi vukuvahoma namaganga avasuṅilwe kwave, napongosu lino upwu nditye ndivalundamanye avańa vako nduvwu inemba jilundamanya ivana mumapapatilo ga jyene–uńe mukabela. 38Lola ińumba jińo mulekwagwa ijivye ukuva ndunsitu vuvule. 39Lola ndikuvavula ndita: Nandambone lusiku ndatsisika lulwa ndatsovelaga: Mwalimi vi vukwitsila mwitavwa lya ntwa, lwu lweli lwu ndambonelaga lulwa uńe.

Currently Selected:

Matai 23: Kinga

Highlight

Copy