Matai 22

1Akavanda UJesu akavuja ukutsova nsihwanihitso akata: 2Uludeva lwa kukukyańa luli ndunkuludeva uvi atelike isinu vwu vikunkwela undala unswambe. 3Akavasuṅa avakivaga va mwene akata: Bihagi nkavatole valya uvwu tukavilangile vitsage kwilya isya pakukwa. Avene vakabela ukubiha kwilya. 4Akavuja akavasuṅa avange avakivaga akata: Nkatsove navo tukavilangile mukate: Lola nisinu sya mwene atelike, niṅambako tsa mwene nigida atemile, syoni agahile vuvule. Tsukwi tuvuke kusinu sya pakukwa. 5Avene vakabela nukusivikila untima, vakakwila ujyunge akaluta kukilimila kya mwene, ujyunge akabiha kumbombo tsa mwene. 6Avange vakavibata avakivaga va mwene vakavakinila vakavabuda. 7Umwene unkuludeva vwu apulike tsitsitsi gukavipa, akasuṅa isipuga sya mwene isya ligoha akavabuda avabudi ava, uvwene uvutsenge vwa vene akańańa, 8Pwu akatsova navakivaga va mwene akata: Isyene isinu sya pakukwa syu ndigahile, mańa avanu uvwu ngavilangile vwu navanogili. 9Mbihage mwoni munzila mmalikano nkavagege kusinu sya pakukwa kunu voni uvwu mukuvavona. 10Pwu vakaluta avakivaga munzila tsoni vakatsikuvalundamanya voni avikuvavona avavivi navannonu. Vakadiga nńumba jya kulila isya pakukwa avatamile pakulya. 11Lola unkuludeva vwu ingye nkuvalola avatamile pakulya, pwu akambona mumwa ujyunge umunu uvi naswalili unsabwa ugwa pakukwa. 12Akambutsa akata: Vi njango uve, vwingye ndeti umu vwu nuswalili unsabwa ugwa pakukwa? Umwene akava mye vuvule. 13Pwu unkuludeva akavavula avahegeletsasima akata: Munkunge amalunde namavoko muntage muṅisi imbaha. Mwu lulava ulukuto lwene, lulava nulugadutso lwa mino. 14Mańa avilangwa vwu vongosu, avahalilwe vwu vadebe.

15Pwu vakabiha navapalisai vakatsilundamana vakatsovana vakata: Tulonde itsa kumbutsambutsa ilimeńu mundomo. 16Vakansuṅila avakongi va vene navańa-Heloti. Vwu vakatsitsova nave vakatsita: Vi mańisi tukuvwene vwitsova tsitsa jilweli vuvule upwu vwitsova, ninzila jya Nguluve avanu vukuvavula ija jilweli, nisoni nulinatso kuvanu, mańa nujyunge umunu navukumalila mbunonu kumiho. 17Pwu tuvutsa kwave twita: Ndeti uve, ndapannonu ukusangula amasango kwa Kesali, pange mwiko? 18Umwene UJesu akavamańa uvugalagala pwu akanda akata: Mukungela kiki ńi vanwasi uńe? 19Ukwa ulutalama lwa masango ndilole. Pwu vakampa undenali. 20Umwene akavavutsa akata: ikihwanihitso iki kyani? Nuvuvige uvu vavigile vwani? 21Vakambula va kata: Vwa Kesali. Pwu umwene akata: E mumpetsage UKesisya pavu-Kesali vwa mwene, namwene Unguluve mumpetsage isya pavu-Nguluve vwa mwene, 22Vwu vapulike ili pwu vakadega vuvule, vakandeka vakaluta.

23Palitsuva ili pwu vakahegelela kumwene navasatukai avibela nukutsuka nujyunge nitsuka lusiku. Navene vakambutsa ilinge 24vakata: Vi mańisi, lola UMose alagye atye: Angave umunu untegulandala iswa untsilamwana vuvule pwu upita ulukololwe amwi ngilage undala amolelage avana ulukololwe. 25Ulole uvwe twale! navanamunu lekelakupamato apa. Pwu umbaha va mwene akategula undala, akaluta pakuswa, akandekela ulukololwe undala untsilamwana vuvule, 26Vuvule-vule uva vili, namwene uva datu vuvule-vule. Voni vuvule vwu lekelakupamato vuvule-vule. 27Kumbele kuvoni pwu namwene undala akavakonga ukuswa. 28Lungave lusiku vwu vatsukule voni avanu pwu alava ndala valiku? Mańa voni vantolile vwu lekelakupamato. 29Pwu umwene UJesu akanda akata: Ulu mujagile, lwu ulu mutye nakalata namummańili, mutye namaka ga Nguluve namugamańili. 30Mańa pakutsuka vwu vatsukile avanu pwu nukutegula navalategule nukute gulwa navalategulwe. Bako valava ndavasunwa va Nguluve kukyańa. 31Ukwene ukutsuka avaswe namulivweni mwa kalata ilimeńu ilyu avavulile Unguluve upwu atye: 32Nene ndili Nguluve va Abulahamu, ndili Nguluve va Isikaka, ndili Nguluve va Jakobu–lyu nda namulivweni? Umwene Unguluve nda vi Nguluve va vaswe? Bako va vumi. 33Avene avanu ikipuga kyoni vwu vapulike ili, pwu vakadega vuvule vakata: Kwu kumańisa kuki inongwa!

34Avene avapalisai vwu vavwene tsivalemile avasatukai pwu vakalundamana navene. 35Pwu ujyunge unjavo umańandagilo akata ndingele akambutsa akata: 36Vi mańisi, ululagilo ululuti uvuvaha kutsinge musimilitso tsa Mose lwu luliku? 37Umwene akata: Ulwita Unguluve untwa vako unganage ninumbula jyako jyoni nuntima gwako gwoni nukwisagila kwako kwoni. 38Lwu lulagilo ululutile uvuvaha kunine lwu lulongotsi. 39Ulunge ulunine ululiṅanile nalwo ulwita: Namwene unnino ungane nduvwu vwiganile vimwene. 40Mańa mwu tsitotike nisimilitso tsa Mose tsoni, mwu vitotike navene avańamalago voni pandagilo tswivili tsitsitsi.

41Avwene UJesu valundamine avapalisai pwu akavavutsa akata: 42uńe ndeti upwu mukisagila, UKilisiti ńa veni? Avene vakata: Ńa-Ndaviti. 43Umwene akanda akata: Umwene UNdaviti ikuntsova kiki ukuva vi nkuludeva va mwene upwu itsovela mwa Mepo upwu ita: 44Unkuludeva atsovile kunkuludeva vango atye: Tama kukivoko kyango ikyandyo usike upwu avatavangwa vako ndikuvapelela katamilo ka kuvika amalunde gako uve. 45Ino angave umwene UNdaviti ikuntsova ukuva vi nkuludeva va mwene, pwu iva nswambe va mwene ndeti? 46Pange avepwo ujyunge uva kwanda ilinge ilimeńu. Nakwene ukuvutsa vuvule vakatengula palitsuva lilyo vakadwada ukumbutsa itsinge.

Currently Selected:

Matai 22: Kinga

Highlight

Copy