Luka 6

1Ulunge pasabati (pandongotsi va vuvili) vwu igenda panzila jya nsilimila sya ngano, pwu avakongi va mwene vakasulubula isisotso vakasigijya mmavoko vakalya. 2Pwu avange avapalisai vakata: Kwu muvomba kiki akalimwiko ukuvomba pasabati? 3Umwene UJesu akanda akata: Nantsivweni mwa kalata ilyu avombile UNdaviti upwu jivavage inzala najujwa navale nave? 4Upwu ingilaga nńumba jya Nguluve akatola isivanda isivalatse akalya, akavapa navene avale nave, isyu sikutsoni nalili lusiku ujyunge, isyu valitsaga vene va vateketsi? 5Akavavula akata: Mańa namwene nusabati Uńamunu nkuludeva va mwene.

6Lino pwu pasabati ujyunge pwu akatsikwingila nńumba jya kwisajilamwo akavavula inongwa. Mwu akambona ujyunge umunu uvi ikivoko kya mwene ikyandyo kyumile. 7Avene avamańakalata navapalisai vakantegela vakata: Tulole vwu amponitse pasabati vakata pwu tutsivone itsa kunswikila inongwa. 8Umwene akatsimańa itsu visagilaga pwu akatsova kumunu va kivoko ikyumu akata: Sisimukaga vwime pavuvalasu apa. Umwene akasisimuka akima pavuvalasu. 9Pwu UJesu akavavutsa akata: Mumbulage uńe kinogye kiki pasabati nukuvomba innonu nukuvomba imbivi nukuvuponehetsa uvwumi nukuvujatsa? 10Akalolesa akavalola voni. Pwu akambula untamu akata: Golosa ikivoko kyako. Umwene akakigolosa. Pwu kikanduka ikivoko kya mwene kikava ndikinine. 11Pwu gukavipa, vale ndavańalukwale, pwu vakatsitsovana itsa kungahila UJesu.

12Mmwaka gugwa pwu ilitsuva ilinge akatoga pakidugala kukisaja. Akisaja vukye. 13Akavona vukye pwu akavilanga avakongi va mwene, akavahala kitsigo navavili. Vwu akavapa nilya vapositili ilitavwa. 14Vwu va-Simoni uvi ampye nilya Petele, nu-Andileja ununave, nu-Jakobu nu-Johani nu-Pilipo nu-Balitolomai. 15nu-Matai nu-Toma nu-Jakobu uńa-Alipai nu-Simoni uvi vatetsage vi Mwipukuluni 16nu-Juta uńa-Jakobu nu-Juta uvi amendamaga.

17Pwu akika navo avanu akatsikwima navo pantelamo. Vakava baho navene navakongi ikipuga vuvule navanu va vongosu sitso. Vwu vahumile mwoni mu-Jutai namu-Jelusalemu nikya pańanza ikya mu-Tili namu-Sitoni. Voni vitsile kupulika inongwa itsu atsovaga nakukupona uvutamu vwa vene. 18Navene uvwu tsavagatatsaga imepo imbivi voni vakapona. 19Mańa voni ikipuga kyoni vakata: Tumwabasage mumana umwene. Mańa vavwene amaka gihuma mumwene gikuvaponya voni.

20Pwu akavinamukila amiho avakongi va mwene akavalola akata: Nndivandugataluko ńyi vagatsu, mańa uludeva lwa Nguluve lwińo uńye. 21Nndivandugataluko ńyi inzala jivava mańa nndigutaga. Nndivandugataluko ńyi mwilila ulwihotsi lino, mańa ndahekaga. 22Nndivandugataluko vangave avanu vavasulile, vangave vikuvahumya namumpelela, vangave vikuvaduka, vangave ilitavwa lińo vitaga panzi vita livivi ulwakuva ndi vanu va Ńamunu. 23Pwu nkahekelage ilitsuva lilyo nkakinage, mańa pwu isya kuvahomba silava syongosu kukyańa. Mańa avadadajyavo vwu vagahile vuvule-vule ukuvakinila avańamalago.

24Muli viki ńyi vamosu, mańa mwitolye ṅani itsa kuvatsesa uńye. 25Muli viki ńyi mupakile lino, mańa jilavavaga inzala uńe, Muli viki ńyi mwiheka lino, mańa pwu ndasusuvalaga ndalilaga ulwihotsi. 26Muli viki vangave voni avanu vikuvatsova innonu, mańa avadadajyavo vwu vagahile vuvule-vule ukuvatsova innonu avańamalago va vunwasi.

27Lola uńe ńyi mupulihitsa itsu nditsova, ndikuvavula ndita: Mbaganage avatavangwa vińo, mbavombelage innonu avene avavasulile, 28mbasaje avikuvakotola, mbimile pakwisaja avikuvasaka. 29Uvi ikukutova ilipi palitama ilinge, vi umpetsage nilinine nalyene atovage. Uvi ipoka ikilundwa kyako, vi ulambelelaga nugwańingilitsa gwako. 30Voni avidova isya kudova kwave, vwu uvapetsage. Uvi ipoka isyako, vi ulantsigilaga. 31Tsoni itsu mulonda ukuta avanu vavavombelage uńe, tsu navene mbavombelage tsitso nuńe. 32Upwu ngave mbaganile avene avavaganile nuńe, pwu veni ate asane kwańe? Mańa navene navatulanongwa viganana avene vene. 33Ngave mukuvavombela innonu avene avikuvavombela innonu uńe, pwu veni ate asane kwańe? Mańa navene navatulanongwa vwu vigaha vuvule-vule. 34Ngave avanu mukuvatanila vwu muhuvila ndavuja mutola, pwu veni ate asane kwańe? Mańa navene navatulanongwa vikuvatanila avatulanongwa avajavo, vihuvila ukuta tutsitolaga umwu syavelye isitu. 35Pwu ndita: Mbaganage avatavangwa vińo, mbavombelage ninnonu, mbatanilage isya kuvatanila kitahuvila ukuta valavutsaga isinge, pwu nisya kuvahomba uńe silavetsaga syongosu vuvule, mbetsage vana va ju Nduti, ulwakuva umwene ndekedeke vuvule nakuvene uvwu navisana kumwene nakuvagalo. 36Mbetsage nikisa nduvwu umwene udadajińo ali nikisa. 37Kwu bako ukumiga umunu ujyunge, pwu nuńe nalavahige nujyunge. Kwu bako ukuntsova uvuvivi ujyunge umunu, pwu nuńe nujyunge nalavatsove uvuvivi. Mbaleke avanongwa tsińo, pwu nuńe valavaleka uvwu ndi ninongwa kuvene. 38Mbape isya kuvapa avanu, pwu valavapa sinine nuńe, Ndapevwa pavwambilo vwa nsabwa gwińo isya kigelelo ikinnonu ikisokele ikikiṅine ikiheleleka vuvule. Mańa ikegelelo ikyu mukuvagelela uńe avange kyu mugelelwa kikyo najyune.

39Akavavula ikihwanihitso akata: Ujyunge umbosu nda andongolelage mbulongolo umbosu ujyunge unine, navalagwe mwiguli vwu vavili? 40Nakuli unkongi uvi ikunduta uvuvaha umańisi va mwene. Uvi amalile ukugalavanika vwu ali ndumańisi va mwene vuvule. 41Vwilola kiki akalagalila akali ndiho lya nino vwu iṅotsi ijili ndiho lyako uve navwilola? 42Nda pwu utsovage ndeti kunnino pakuta: Vi njango leka ndivuse akalagalila akali ndiho lyako, vwu uve iṅotsi ijili ndiho lyako uve navwilola? Vi nwasi uve ngukwivusa tango iṅotsi ijili ndiho lyako uve, neke pwu ugelage humbe ukuvusa namwene unnino akalagalila aka ndiho lya mwene.

43Nagukuli umbiki unnonu ugwa kuhupa uluseke uluvivi. Nagukuli numbiki umbivi ugwa kuhupa uluseke ulunnonu. 44Gyoni imibiki mpamato-mpamato gimańivwa ugu paseke tsa gwene ugu paseke tsa gwene. Mańa iseke tsa nkuju umunu nitungula pantula, nagene namasilu umunu nitungula pandovo. 45Umunu unnonu isakula tsi nnonu umwu alundike vwu vunnonu munumbula jya mwene. Umwene umunu umbivi isakula tsi mbivi umwu alundike vwu vuvivi munumbula jya mwene. Mańa mundomo mwu itsova umunu itsilesuka munumbula jya mwene.

46Pwu mukunzova kiki mwita, nkuludeva nkuludeva kwane vwu namukonga itsu ndikuvavula? 47Uvi ikwitsa kwane ita nukupulika amameńu ugwu nditsova ita nukugamańa ukwi ndivavonyage uvi ndita ahwanine nave. 48Ali ndumunu uvi atsengaga ińumba, pwu akajava akaholonga sitso, ikikotsi akavika palunalavwe. Lino pwu vwu ludekile ulwongometso pwu nulugasi lukadudika pańumba iji nalukajihusanya napadebe, mańa jitsengilwe palunalavwe. 49Mańa uvi ibela ukukonga vwu apulike vi ali ndumunu uvi atsengaga ińumba pamanga vuvule kitatsenga pasi. Lino vwu ludekile ulugasi pwu jikagwa ṅani-ṅani, Pwu jikabatsuka vuvule.

Currently Selected:

Luka 6: Kinga

Highlight

Copy