Luka 7

1UJesu vwu amalile ukuvavula avanu tsoni itswu avavulaga pwu akabiha mu-Kapelinaumu. 2Lola mbutsenge umwu ale umunu va ndongotsi va vasikali, ungane sitso kuntwa va mwene, vi atamilwe sitso akata ndiva pakuswa. 3Umwene undongotsi vwu apulike itsa Jesu, pwu akavasuṅa kumwene avańivaha va va-Juta akata: Nkatekelese kumwene mumbule itsage kunu amponyage umunu vango. 4Avene vwu vavye kusika upwu alipwo UJesu, pwu vakamwumilitsa vakatekelesa vakata: Anogye ukuta untange vuvule-vule. 5Mańa vamńine nikivumbuko kitu, najyene ińumba jya kwisajilamwo atutsengye. 6Pwu UJesu akabiha navo. Lino vwu pasigye padebe ukusika pańumba jya ndongotsi, pwu umwene akasuṅa avanine akata: Mbihage nkatetsage: uligatatsaga vi nkuludeva, mańa nandinogili ukuta vwingilage nńumba jyango. 7Tsu tsitso nditye nandinogili ukwitsa kwave kukwa. Bako tsovaga li limeńu lyene, pwu ipona umunu vango uju. 8Mańa ndili munu vuvule nuńe, ndivikilwe mmalunde ga vavaha, nuńe ndili navasikali mmalunde gane, ndingave nditsova kujyunge ndita: Ubihage kuvutunga, pwu ibiha vuvule, kujyunge ndingave ndita: Vwitsage kunu, pwu ikwitsa vuvule, kumunu vango ndingave ndita: Vombaga akatunga pwu ivomba vuvule. 9Umwene UJesu vwu apulike tsitsitsi, pwu akadega, akavakilivukila avene avankongaga ikipuga kyoni akavavula akata: Lweli ulwidiko ndulu lwu nandiluvweni mwa Isilaeli umu. 10Vwu vavye kusika kuvutsenge avene uvwu avasuṅile undongotsi, pwu vakatsivona umunu aponile.

11Ndakilavo pwu akabiha mbutsenge uvwu vita mu-Najini. Vakagenda nave avakongi va mwene navanu ikipuga ikyongosu. 12Lola vwu vasike pavwipi pavumongolo vwa mbutsenge, pwu vakaganila navanu, vibiha pakunsila undume uvi aswe, umwana ludiga va vańina. Umwene uvańina uju vi ale nswile. Vakavona navanu va mbutsenge ikipuga ikivaha vigenda nave undala. 13Umwene unkuludeva vwu ambwene undala uju, pwu ikisa kikambona mwitumbu akata: Kwu bako ukulila. 14Pwu akahegelela akibata uvusaga, pwu vakima avampimbile. Pwu umwene akata: Ndume ndikukuvula ndita sisimukaga. 15Pwu akatama uvi aswe akatsova. Pwu umwene akampa uvańina. 16Pwu uludwado lukavavona voni, vakanginya Unguluve vakata: Avonike uńamalago umbaha mwavwe umu. Unguluve atulolile twi vanu va mwene. 17Pwu inongwa tsa mwene tsitsitsi tsikakwila mwoni namu-Jutai nankilunga kya mbwipi mwoni-mwoni.

18Pwu UJohani avakongi va mwene vakatsikumbula tsoni tsitsitsi. 19Pwu umwene UJohani akavilanga avakongi va mwene vavili akavasuṅa kunkuludeva akata: Mbihage nkambutsage nkatetsage: Nda veve vi vatetsaga ikwitsa, pange tumpulikilage ujyunge kwale? 20Pwu vakatsisika upwu alipwo avanu ava, vakambutsa vakata: Atusuṅile UJohani umwotsi atye: Nkambutsage nkatetsage: Nda veve vi vatetsaga ikwitsa, pange tumpulikilage ujyunge kwale? 21Lola pwu vakatsikumbona vwu ikuvaponya avongosu nimungu tsoni nuvutamu nimepo imbivi, vwu navabosu avongosu ikuvapa ukulola. 22Umwene UJesu akanda akata: Mbihage nkambule UJohani nitsu mwilola nitsu mupulika nkatetsage: Avabosu vwu vilola, avańavulema vwu vigenda, avańabuba vwu vavalatse mumana, avatsivye vwu vipulika, avaswe vwu vitsuka, avagatsu vwu vikutsimańa inongwa innonu. 23Vi va ndugataluko uvi nikutsivona itsinge itsa kumwambutsa mwane.

24Avwene vwu vivuka avene uvwu avasuṅile UJohani pwu akatengula baho UJesu akantsova UJohani kuvene avalundamine baho ikipuga akata: Mwabihaga kwilola kiki ndukungu? Mwabihaga kwilola ulugugu uludepanika kumepo? 25Mwabihaga kwilola kiki? Mwabihaga kwilola umunu uvi aswalile imisabwa imińogotasu? Lola aviswala imisabwa imińogotasu, avilya nisidekedeke syoni vwu viva nńumba tsa vakuludeva. 26Mwabihaga kwilola kiki? Mwabihaga kwilola uńamalago? Ena jilweli ndikuvavula ndita: Umwene mbaha nakuvańamalago. 27Mańa vi, uvi atsovilwe mwa kalata upwu ita: Lola ndikukusuṅilaga unsuṅwa vango uva kulongola mbulongolo kwave, vi alagahaga inzila jya kugendamwo uve. 28Ndikuvavula ndita: Mwu voni avaholilwe kuvadala navoniki ujyunge umbaha kwa Johani umwotsi. Mańa undebe kuvoni ndudeva lwa kukyańa, vi andutile uvuvaha. 29Pwu voni avanu avapulikaga tsitsitsi navasangutsi vakamwidika uvugolosu Unguluve, vakabiha nukwotsivwa kwa Johani. 30Mańa navene avapalisai navamańandagilo vakagilila uvugolosu vwa Nguluve vakata: Kwu bako uvwe ukwotsivwa umwene. 31Umwene UJesu akatsova akata: Ndivahwanihitsage ndikiki avanu va lino ava, vali ndikiki? 32Vali ndavana avatamile paluvanza avikwilangilanila vita: Tuvakuvye ulukelema, mańa uńe namunemili, tuvakutye mańa uńe namulilili. 33Mańa itsile UJohani akabela nukulya syoni vuvule, akabela nukuńwa amasilu pwu vita ali nimepo imbivi. 34Itsile Uńamunu ilya vuvule syoni, ińwa vuvule amasilu, pwu avene vita: E, mudege lino, umunu va kusyota uju, va kinwelo kya masilu uju, unjavo navasangutsi navatulanongwa. 35Ulwene uluhala lwa Nguluve lweli lwu luvonekela muvana va mwene voni ukuva lugolosu vuvule.

36Pwu ujyunge umpalisai akamwilanga akata: Tuvuke tukalitsage twivoni isinu kwane. Pwu akatsikwingila nńumba jya mpalisai akatama pakulya. 37Mańa alemwo mbutsenge mumwa ujyunge undala umbivi. Vi akapulika ukuta ilya isinu nńumba jya mpalisai. Pwu akagega ikibake kya mono imala. 38Akatsikwina kumalunde kumbele akalila ulwihotsi. Ulwihotsi pwu lukandońolela mmalunde ga mwene. Pwu akampulusa mmalunde ninzwili tsa mwene, akagatsiba akagabaka nimono. 39Umwene umpalisai uvi ambikye vwu ambwene pwu akisagila mwitumbu mmwene akata: Umunu angave namalago lweli, pwu ndili ammańile undala uvi ikumwabasa mumana ukuta vi tunga umbivi. 40Pwu UJesu akamwanda akata: Vi Simoni ndili nutunongwa twa kukuvula. Umwene akata: Ukwa tsovaga vi mańisi. 41Umwene akata: Alekwo ujyunge untanilandalama ali navatani vavili. Ujyunge atanile indalama vamia vahano (500), unine atanile imilevulo gihano (50) vuvule. 42Mańa vwu avwene tsijagile avene itsa kunkilivulila, pwu akavavula vwu vavili akata: Nditsilekile ndivapye. Ukwa lino vwu vavili ava vi aliku uvi alangana sitso? 43Akanda USimoni akata: Ndita uvi ampye tsińongosu indalama vi ikunganaga sitso. Pwu umwene akata: Uhigile ugolwise vuvule, 44Pwu akankilivukila akandola akambula USimoni akata: Umbwene undala uju? Mańa nditsile nńumba jyako umu, uve numili amagasi ga kwihutsuga amalunde, umwene lweli andońolitse ulwihotsi mmalunde amulwise ninzwili tsa mwene. 45Uve nunzibili kundomo uńe. Umwene atengwe upwu ndingilige nńumba umu nilekilwi ukutsiba amalunde gango. 46Uve numbakili untwe nimono. Umwene lweli ambakile amalunde nimono imala. 47Pwu ndikukuvula ndita: Inongwa tsa mwene tsisyikilivwe tsińongosu mańa anganile nulugano lu lwongosu. Lweli uvi asyikilivwe tsindebe vi ikunganaga ulugano uludebe. 48Pwu akambula undala akata: Ndikusyikye inongwa tsako. 49Pwu avene avatamile nave pakulya vakisagila mwitumbu mbene vakata: Vi munu nki uju ita natsinongwa isyikila? 50Pwu umwene akambula undala akata: Lukuponitse lwu lwidiko lwako. Bihaga nulunotsehetso.

Currently Selected:

Luka 7: Kinga

Highlight

Copy