Luka 5

1Pwu ulunge vwu avanu ikipuga vuvule vamińine nave vita tupulikage ilimeńu lya Nguluve. Umwene vwu imile pakimwambo pańanza jya mu-Genesaleti, 2pwu akavona amaboti gavili vakwegye pakimwambo. Avene avalovi avenenago vatogile pakimwambo vihutsuga ińelo tsa vene. 3Pwu akingila mwiboti lya Simoni akata: Kuluga vudandamale padebe pakimwambo. Pwu akatama mwiboti akavavula avanu inongwa. 4Lino vwu amalile ukutsova inongwa pwu akambula USimoni akata: Lino bihaga pańanza pagati pwu nkalahe ińelo tsińo nkonze isomba. 5Akanda USimoni akata: Nkuludeva twijumilitse vukye natukavili kinu, lola ulwakuva utsovile uve, pwu ndilaha ulwelo. 6Lino vwu valahile nduvwu avavulaga, pwu vakavona valundaminye isomba ńongosu sitso nulwelo lwa vene lukadumuka. 7Pwu vakavilanga avajavo ava mwiboti ilinge vakata: Mwitse ntutange. Avene vakatsikuvatanga. Pwu tsikadiga gwu gavili amaboti, gakapona nukutwivila. 8Lino vwu atsivwene tsitsitsi USimoni Petele pwu akangwila mmalunde UJesu akata: Huma mwane umu nkuludeva, mańa ndili munu ndili ntulanongwa. 9Mańa lwavavwene uludwado najujwa navale nave voni, ulwakuva tsale ńongosu isomba itsu vonzile. 10Vuvule-vule nava-Jakobu nava-Johani avańa-Sebetai avanine va Simoni, navene uludwado lukavavona. UJesu akambula USimoni akata: Kwu bako ukudwada, mańa vutengula lino vulovaga avanu. 11Pwu vakagakwegela pakimwambo amaboti ga vene vakasileka baho syoni vakankonga jujwa.

12Ulunge vwu ali mbutsenge uvunge pwu akambona ujyunge umunu va buba umamna gwoni. Vi akavona ambwene UJesu pwu akagundama pasi akantekelesa akata: Nkuludeva ungave unogilwe pwu ulumańile ukumonya. 13Pwu umwene akagolosa ikivoko akamwabasa mumana akata: Ndinogilwe uponage. Pwu ibuba jikajaga ṅani-ṅani. 14Umwene UJesu akambula akata: ulambulaga ujyunge umunu bihaga ukivonye kunteketsi ukagege isya kwivalatsa isya pakuponela uve, isyu alagye UMose, syu sive sya kumańilamwo avene. 15Pwu inongwa tsa mwene tsitsitsi tsikapulikika mwoni-mwoni. Pwu vakalundamana avanu ikipuga avakupulihitsa ilimeńu navakuponela uvutamu vwa vene. 16Mańa umwene akuva ndukungu akisaja.

17Ulunge umwene vwu ikuvavula inongwa vwu vatamile baho navene avapalisai navamańisandagilo avahumile mbutsenge vwoni vwa mu-Galilai nuvwa mu-Jutai namu-Jelusalemu pwu amaka ga nkuludeva gakava nave aga kuvaponya avanu. 18Pwu avagosi vampimbile pavusaga unjavo uvi ale namasusa vakata: Tumwingitsage tukambike mbulongolo mmwene. 19Vavwene lino navapili apakumwingitsa, mańa vale vongosuno avanu, pwu vakatoga pakyańa pańumba vakaswikula amaswikilo, vakamwisa lunine nuvusaga vwa mwene, vakambika pagati mbulongolo mwa Jesu. 20Umwene vwu aluvwene ulwidiko lwa vene pwu akambula untamu akata: Vimunu ndikusyikye inongwa tsako. 21Pwu avamańakalata navapalisai vakisagila mwitumbu vakata: Vi veni uvi ikumelula Unguluve? Twi vanu nda pwale ujyunge umunu uvakunsyikila inongwa umunu unine? Mańa mwene Unguluve vi isyikila inongwa. 22Umwene UJesu vwu atsivwene itsu visagilaga mwitumbu pwu akavanda akata: Mukisagila kiki munumbula tsińo? 23Lyu lyebepe liliku ukutsova nilyakuta: Ndikusyikye inongwa tsako nilyakuta: Ima gendaga? 24Lola pwu ndita mummańe Uńamunu ukuta isyikila inongwa nkilunga umu, pwu ndikukuvula uve ndita: Ima pimbaga uvusaga vwako, uvujage kuńumga jyako. Lyu akatsova kuva vutamu vwa masusa ili. 25Pwu umwene akima ṅani-ṅani vwu vilola voni, akapimba ukwu agonilepwo akavuja kuńumba jya mwene akanginya Unguluve. 26Pwu vakadetema voni vakanginya Unguluve. Lukavagwila uludwado vakata: Itsu tutsivwene ilelo iji tsu tsili ponu.

27Pambele vwu igenda pwu akambona ujyunge unsangutsi uvi vita vi Levi ilitavwa. Akavona atamile pavusangulilo amasango. Vi akamwilanga akata: Tsuvula uṅongage. 28Pwu umwene akasileka baho syoni akima vuvule akankonga. 29Pwu ULevi akantelekela isinu, akilanga ululyo uluvaha nńumba jya mwene. Vakabiha kwilya navo navasangutsi navange vuvule ikipuga ki kyongosu sitso. 30Avene avapalisai navamańakalata vakavatanila navakongi va mwene vakata: Kiki mwilya nukuńwa navasangutsi navatulanongwa? 31Pwu akanda UJesu akata: Avadulusu vwu navikundonda untuṅanya, va vatamu lweli vwu vikundonda. 32Nanditsili kukuvilanga va vagolosu ukuta nkilivukage, bako va vatulanongwa lweli vwu ndikuvilanga ndita nkilivukage.

33Avene vakambutsa vakata: Lola avakongi va Johani vita nukusileka kavili-kavili isinu vita nukwisaja, navene avakongi va vapalisai vwu vigaha vuvule-vule, avako vwu vita nukulya nukuńwa vuvule. Kyu kinu kiki? 34Umwene akanda akata: Avalyasinu sya pavutegulane pwu veni ate avumilitsage ukuta vasileke isinu vwu tango vali nave untegulandala? 35Mańa likwitsa ilitsuva lyavene ilyu valavona untegulandala ajagile, pwu valasilekaga isinu ilitsuva ili. 36Akavavula ikihwanihitso akata: Nakuli ujyunge uvi ilenga unsabwa umpya vwu ali pakupabikila ikipabikilo pansabwa undala. Mańa angave ate vwu ndigahe vuvule-vule, pwu ivona numpya gwiswa, ivona nagwene undala naguhwanana nikipabikilo kya nsabwa umpya. 37Nakuli nujyunge uvi iduda unńeke gwa masilu mmipako imilala gya masilu. Mańa angave umunu adudilemwo, pwu uńeke gulendula imipako gya masilu pwu namasilu gidudika nagyene nimipako givejangika. 38Bako unńeke gwa masilu upita umunu adudage mmipako imipya, pwu syoni sipona. 39Nakuli nujyunge uvi anogilwe ukuńwa unńeke gangave gadigile amalala amasilu. Mańa ita bako galutile uvunnonu ga malala.

Currently Selected:

Luka 5: Kinga

Highlight

Copy