Luka 4

1Umwene UJesu vwu adigile UMepo umbalatse, pwu akahuma mwa Jolitani, UMepo akatsikumbika ndukungu. 2Mwu akalinda amatsuva imilevulo gini. Pwu uńaliluso akangela. Ulwakuva nalitsage isinu amatsuva goni aga. Lino vwu galutile pwu jikavava inzala. 3Pwu uńaliluso akatsova nave akata: Ungave uli mwana va Nguluve jilweli, pwu utsove niliganga ili sive sinu. 4Pwu UJesu akanda akata: Umunu niva mwumi si sinu syene. 5Pwu uńaliluso akatoga nave pakidugala ikitale, akambonya nkasige kapamato kene isilunga sya vakuludeva voni nkilunga umu. 6Akambula uńaliluso akata: Ndikukupetsaga ukuva vi mwenenasyo syoni isi, ndikukupetsaga navu vudwadwa vwa syene vwoni, mańa vwango juńe ndikumpa vuvule uvi ndinogilwe ndimwene. 7Vwisajage lino kwane, pwu sivetsaga syako syoni. 8Pwu akanda UJesu akata: Livigilwe ilita: Vukisajaga ku kwa Nguluve unkuludeva vako, vukumbombelaga jujwa mwene. 9Pwu akabiha nave mu-Jelusalemu. Mwu akatsikumbika pakyańa pa Tempeli akatsova nave akata: Ungave uli mwana va Nguluve jilweli pwu utsumbilage pasi. 10Mańa livigilwe ilita: Alakulagililaga avasuṅwa va mwene ukuta vakwupililage, 11valakupimbaga mmavoko ukuta ulitovaga piganga ikilunde kyako. 12Pwu akanda UJesu akata: Nalyene livigilwe nilya kuta: Kwu bako ukungela Unguluve untwa vako. 13Umwene uńaliluso vwu amalile lwoni ulugelo lwa kungela ulu, pwu akandeka akata lungave lusiku.

14Pwu amaka ga Mepo gakankilivula UJesu ukuta avuje abihe mu-Galilai. Pwu akatsipulikika ikilunga kyoni umwu kitsungutye. 15Pwu umwene akavavula inongwa nńumba tsa vene tsa kwisajilamwo, voni vakanginya.

16Akatsisika namu-Nasaleti umwu akulye. Akingila nńumba jya kwisajila, vwu agahaga sikutsoni palitsuva lya sabati, akima pakutsova pakalata. 17Vakampa kalata va Jesaja uńamalago, Lola vwu igubukula kalata pwu akavona upwu livigilwe ilita: 18UMepo va nkuludeva ali pane, mańa ambakile ukuvavula inongwa innonu avagatsu. Ansuṅile nakuvibitwe ukuta ndivavule ukuta vavangwe, nakuvaboswe ukuta ndivavule ukuta valolage, nakuvabańilitsivwe ukuta ndivavopole, 19asuṅile atye katsove numwaka gwa nkuludeva unnonu ukuta gwitsile. 20Pwu akagubika kalata, akampa undoleli akatama. Pwu amiho ga voni nńumba jya kwisajila gakandungamila jujwa. 21Pwu umwene akatengula akata: Itsivigilwe apa tsitsile vuvule vwu mupulika ilelo iji. 22Pwu voni vakidika vakata, bako itsova, vakadega amameńu amadekedeke agahumaga mndomo mmwene vakata: Nda namwana va Josepu uju? 23Akavavula akata: Uńe pange mukuṅumbuhitsaga akamenu akita: Vi ntuṅanya vwiponyage vimwene. Pange mwita utupelelage itsinge natwi va umwu vwaponye vwu tsitso tupulike ukuta apelile namu-Kapelinaumu. 24Umwene akavavula akata: Jilweli-lweli ndikuva vula ndita: Ujyunge uńamalago nikuvakelamwo avanu mmyave umwu akulye. 25Nditsova itsa jilweli ndita: Vale vongosu avadala avaswile mwa Isilaeli umu mmwaka gulya gwa Elija, upwu kukyańa kuvetsage kudinde vuvule imyaka gidatu nimyetsi ntanato, upwu inzala jigwitsage ńongosu ikilunga kyoni. 26Mańa nansuṅili kujyunge va umu Elija, bako akansuṅa mu-Salepita nkilunga kya Sitonija akata mwu ubihage kundala unswile va mumwa. 27Navene avańabuba vwu vale vongosu mmwaka gulya alekwo Elisa uńamalago. Mańa naponili ujyunge uvumwu. Mmwene ju Nahamani va mu-Sili vi akapona. 28Pwu gukavipa voni avale nńumba jya kwisajila vwu vapulike tsitsitsi. 29Pwu vakasisimuka vakamumya mbutsenge vakatsikumbika palugima lwa kidugala ikyu vatsengile uvutsenge vwa vene vakata: Tumbiluse ndugenge. 30Mańa umwene akatupa pagati pavene akabiha vuvule.

31Pwu akika ukubiha mu-Kapelinaumu mbutsenge uvunge vwa mu-Galilai, mwu akatsikuvavula inongwa sikutsoni pasabati. 32Pwu vakadega itsu avavulaga ulwakuva avonekaga vwu itsova ukuva vi vi mwenenatso jujwa. 33Mańa alemwo nńumba jya kwisajilamwo ujyunge umunu va mepo imbivi jya Setano. Vi akilanga ilimeńu ilivaha akata: 34Hi, tuli vuki nuvwe nuve vi Jesu va mu-Nasaleti! Vwitsile nkutujatsa! Ndikumańile mańa vi mbalatse va Nguluve uve. 35Umwene UJesu akatanila akata: Nunala uhume mmunu uju. Pwu imepo imbivi jikambamitsa vuvule pagati pakipuga umunu jujwa, jikahuma kitandematsa napange. 36Pwu uludwado lukavavona voni umwu vavelye, vakavutsanya vakata: Lyu limeńu liki ili? Mańa imepo imbivi ikutsilagila ilya vutwa ilya maka, itsene pwu tsihuma vuvule. 37Pwu umwene akapulikika ikilunga kyoni kya mbwipi umu.

38Pwu akahuma nńumba jya kwisajilamwo, akatsikwingila nńumba jya Simoni. Akatsivona unkwive va Simoni undala imungu jimbwene ńongosu sitso. Pwu vakambutsa vakata: Tugahage ndeti nave? 39Pwu umwene akatsikumwinamila akatanila nimungu pwu jikandeka. Pwu umwene undala akasisimukila ṅani akavagegela isinu.

40Mańa vwu lisema ilitsuva pwu voni avale navatamu uvutamu vwoni vakavagega kumwene. Pwu umwene akavavika amavoko uju mwene uju mwene akavaponya. 41Natsene imepo imbivi tsikahuma mbanu avongosu, tsikilanga vwu tsihuma tsikata: Uve vi nswambe va Nguluve. Umwene akatanila akata: Mulanzovaga ukuta mumańile ukuva vi Kilisiti uńe.

42Vwu vukye pavusiku pwu UJesu akasisimuka ukubiha ndukungu. Pwu avanu ikipuga kyoni vakandonda, vakatsisika upwu alepwo vakata: Tunkilivule alakimbilaga mmyavitu umu. 43Mańa umwene akavavula akata: Mańa inongwa innonu tsa ludeva lwa Nguluve tsitsitsi tsu upita nditsitsovage mbutsenge mwoni nambunge vuvule. Mańa tsu tsitso ndisuṅilwe. 44Pwu akatsikutsitsova mwoni nńumba jya kwisajilamwo nkilunga kya mu-Galilai.

Currently Selected:

Luka 4: Kinga

Highlight

Copy