MATAYO 17
17
1Kyasia komida-ho mfiri iṟandaṟu nalyo Yesu kaduo-ho Petro na Yakobo na manomae Yohane. Kahenda nawo kado kundo ko fumwuhu lii lileshe hando ha kisekenyi. 2Nalyo kailachika kawada fana ya sa wawonyi. Kyamu kyake kikawa ngeela cha mnengeṟi na nguwo tsake tsikaila weṟu cha sa. 3Naho kudi a walya Mose na Elia wakakuloṟa nawo wechiongoyana nao mbonyi. 4Kyasia Petro kahaluo kawia Yesu, “Ale Mndumii. Iya nyi haluchihia hekukaya. Komkunda na inyi njiwike mahema haṟaṟu kunu, limu nyi lyapfo na limu nyi lya Mose na limu nyi lya Elia.” 5 Kededa kudi a ili ipuchi liwode ngela likacha wawikya maṟishe, nalyo a lilya na ṟu lyawuka alya kiidi kya ipuchi likahamba, “Aichu Manoko a mkunde ichu njii mchihie nyio! Nyio mochimwadanya.” 6na walya wa kiloshionyi wameicho wado wakaho wanda na kyamu wakaowuo mnu muowoe ingi. 7Nalyo Yesu kacha na hando wai kawapaya kahamba, “Kekurenyi ma mlaowuo!” 8Wakairia meso hawo naho walakiwone-se ma mndu na Yesu amonyi. 9Kyasia ili walesoka kulya fumvunyi Yesu kawatutuma kahamba, “Ma mlawone mochihamba kiwonesyo kyo na muwede Mana o mndu natane aṟuka awuka ko wafu.” 10 Nalyo walya wa kiloshionyi wakambesa wakahamba, “Kikeri-ng'u kida ili walosha wa mawawaso wehamba ke Elia na nasonguo icha kuwoka?” 11Nao kahaluo kahamba, “Macheenyi ha Elia na ekaa nache nawihiṟe shindo shose wuhya. 12 Kyaindi inyi ngambia, ‘Elia nyi alemecha, na wandu walamanye indi wakamtana chando wawekundi. Na Manomndu na wudo nawekaa naliso wukiwa nyiwo.’” 13Nalyo walya wa kiloshionyi wakatawuka imanya ke nyi aideda nawo kya Yohane mpatisi.
Yesu achiṟa mana awodo nyi mṟufu mmbicho
(Mar 9:14-29; Luk 9:37-43a)
14Kyasia ili walekoya mamwingi fulya fo wandu naho mndu kacha napfo kampfirya-ndi. 15Kahamba, “Hoi Mndumii, kesaṟya mana oko wukiwa, nyi awodo nyi osuko lo meri kawawio mnu iki kiwicho-wicho. Nyi kifa kafoi awa moho modonyi na kafoi nyi mṟingenyi. 16Na inyi ngamende na ko iwo wa kiloshionyi kyapfo nawo walaidime ma imchiṟa.” 17Yesu kahaluo kahamba, “Mui mbaṟi ya wandu ilawode iidikya muhendye na mkika, akashika njekaa nanyo njishike indi? A njimduo njishike indi? Mendenyi na handu njii!” 18Na Yesu kamdedya kya imwowesha nalyo mṟufu fulya mbicho fukambuka. Na mana ulya kachia kiwokia saa na iya. 19Nalyo walya wa kiloshionyi wakacha na hando Yesu ai kundu kulai wandu wakahamba, “Nkili so lulaidima ifufuna?” 20 Nao kawawia, “Nkipfa ili muwode mudo kiidikyo kyangu. Kifa nkya lohi ngambia, ‘Kokoya nyi muwode idikya ling'anyi cha mbeu ya haradali na mochiwia fumvu li, kure aa hando ukeri uhende alya. Nalyo na lyeteshuka. Naho ma kulekikaa-se ho kindo mlechiidima.’ [ 21Kyamba mbaṟi ii ya mṟufu mbicho yewukayo chila nyi kui pfinya ya iterewa na ikwotoya.]”
Yesu ahamba-se kya opfu na iṟuka lyake
(Mar 9:30-32; Luk 9:43b-45)
22Kyasia wakeri iida-iida kulya Galilaya warianyi handu hamu wose nalyo Yesu kawawia, “Manomndu akeri ihenda idambikyo mawokonyi ha wandu. 23Nawo iwaha wambahe, indi ili mfiri fo kaṟaṟu naṟuke.” Nawo wakasokyo mnu nyi fowa ing'anyi.
Itaa mwano hekalunyi
24 Kyasia ili washika kulya Kapernaumu, nalyo walya wesana shilingi iya ya okamba lo hekalu wakachea Petro wakahamba, “Alae mlosha onu nekelekya shilingi ya okamba lo hekalu ngesa?” 25Kahamba, “Na echiwika.” Kyasia amida na mba nalyo Yesu kasonguo imbesa kahamba, “Nyi uihia-ho kuda Simon? Wamangi wa masanga wandu wekewawesa njokamba na kodi nyi waki? Ngesa nyi wana wa kanyi kowo ang'u nyi iwo wa kundu kungi ngesa?” 26Ili ahaluo, “Na iwo wa kundu kungi.” Yesu kambia, “Nahong'u wana wakawa-ng'u nyi wai wawute-pfo. 27Kya indi nyi kundu lulawaendye wusutsu kehenda-ng'u kulya ipalyipalyinyi ukumbe kimenya kedeha makunga. Na ikunga-lyo lyechisonguo ido uliwade. Nalyo kotambaṟuo dumbu lyalyo nyi ochiwonaho fesa. Nayo uduo uhende iwainengya handu hako na iyo.”
Ang'anyi wumanginyi wo Ruwa
(Mar 9:33-37; Luk 9:46-48)
Currently Selected:
MATAYO 17: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
