MATAYO 16
16
1 Kyasia kukacha napfo Wafarisayo na Wasadukayo wecha mhesha wembesa nawaloṟe kiṟingishio kiwuka ruwehu. 2Nao kahaluo kawawia, “Ili koila nyi mokehamba, ‘Ngama nyi kochiwaa kipfa ili ipfo ruwehu kofana samu.’ 3Na ngamenyi mukahamba, ‘Inu nlya nzinde nyi ili ipfo ruwehu kofana samu kukaṟiṟimaa fana ya ipfo ruwehu kyayo mukaidima iletsana, kya indi shiṟingishio sha maheri kyasho mulamanye. 4 Mbaṟi i ya wandu ii mbicho idahye na wameluki nyi ishiha kiṟingishio. Nayo ma yechiinengo kiṟingishioyo, chi kokoya nyi kiṟingishio kya Yona.’” Nalyo kawada-ho kahenda.
Mtarang'ao fo Wafarisayo na Masadukayo
(Mar 8:14-21)
5Naho walya wa kiloshionyi wakaambadya oruka lo kulya mbele ya ipalyipalyi wahadimye iduo mkate. 6 Kyasia Yesu kawawia, “Keambuyenyi mukuṟise mdi foshimbiṟa mkate ifu fo Wafarisayo na Wasadukayo.” 7Nawo wakadeda-deda na mrima yawo injenyi wehamba, “Nyi kipfa ili luladuo mkate.” 8Kyasia Yesu kekimanya kahamba, “Nyi ki ili mwideda na mrima yanu mui wandu wa iidikya litutu. 9 Nyi mulametawuka imanya ma mlakumburie mkate iya itanu ya wandu walya washikye shiku shitanu na mkunja iya muleiraho chando iwefoi? 10 Ma mulakumburie ma mkate iya mfungade ya wandu walya washikye shiku shiina na shikunja shilya muleira-se chando shiwefoi? 11A nyi wuda kii-se ili mulakunda ma imanya ke chi kya mkate ngadeda nanyopfo. Kya indi kekuṟisenyi mdi foshimbiṟa mkate fo Wafarisayo na Wasadukayo.” 12Nalyo wakamanya kilya awawia wakuṟise ke nyi kilakeri kya mdi fo mkate fo Wafarisayo na Wasadukayo chila na kya mloshie fo Wafarisayo na Wasadukayo.
Petro aṟingishia ke Yesu nyi Mana o Ruwa
(Mar 8:27-30; Luk 9:18-21)
13Kyasia Yesu kashika kulya shihongonyi sha kulya Kaisaria ya Filipo. Kawesa wa kiloshionyi kyake kahamba, “A wandu wekededa wada kya Manomndu nyi akeri nyi wu?” 14 Nawo wakahamba, “Iwo wengi nyi Elia na iwo wengi nyi Yeremia ang'u nyi o waikimbi umu-ho.” 15Kawawia, “A kyanu nyo mokehamba njikeri nyi wu?” 16 Naho Simon Petro kahaluo kahamba, “Iyo nyi ukeri Kristo Mana o Ruwa ichu menyi moo.” 17Kyasia Yesu kahaluo kambia, “Ungusu iyo Simon Petro, kipfa manya chi nyama ma samu shakudambuya ishipfo chila na Wande o ipfo ruwehu.” 18Kyasia na inyi ngakuwia, “Iyo nyi Petro (mndu ai iho) na iho nyilyo njechilihekya siṟi yako. Nayo na shichumi sha Gehena shechiidima ifoyapfo. 19 Njechikuinengya njopfunguo tsa wumangi wo ruwehu, na kindo opfunga kunu orukenyi kyose kiwekaa kikipfunge; na orio kindo omepfunguo kunu orukenyi kyose na kulya ruwehu na kyekaa kiwei kipfunguo.” 20Nalyo kakekedya walya wa kiloshionyi walawie ma mndu ke nyi akeri Kristo.
Yesu ahamba kya Opfu loke
(Mar 8:31–9:1; Luk 9:22-27)
21Nalyo kiwokia-lyo Yesu kawoka iloṟa wa kiloshionyi kyake ke na nahende kulya Yerusalemu na ihenda iliso wukiwa wunyanyi nyi wasongoru wa wandu na Wakohanyi wanene na walosha wa mawawaso na imbaha wawembaha na ili mfiri fo kaṟaṟu naṟuke. 22Na Petro kamonduo na ndenyi koke kawoka imdedya kahamba, “Kyakyo Ruwa nakiitse kuleshe Mndumii, kiti kindo kido kechikuhoya!” 23Nao kainduka kawia Petro, “Kewuya na numaa-ko, Satana, nyi onjiendye wusutsu. Nyi kipfa chando uihia chi kya Ruwapfo nyi kya wandu.” 24 Nalyo Yesu kawia walya wa kiloshionyi kyake, “Ichu echikunda icha na inyi iya num-ko naa nakukane amonyi nakudike na msalaba foke nache oshana na inyi. 25 Kipfa ichu echikunda iletsa moo foke kikawa nyi kipfa kyako inyii nyi echifuwona. 26Kipfa iki mndu echiira-ho kya wowina woke nyi kiki kokoya nyi awinyia wuyana wose kawuwona kadetsya-ho moo foke? Ang'u kindo mndu echiwika kiwe ndalai ya moo foke nyi kiki? 27 Kipfa nyi kochikaa Manomndu nache ai wusuṟinyi wo Nde arianyi na wasu wake wa ruwehu. Nalyo nainengye orio mndu ose kyake kimsumhanye ipfo mawutyenyi hake. 28Na kya lohi ngambia, ‘Wandu-wa wahoṟoki iya kuwepfo sa waangu-ho wekaa walasaha opfu na watane wawona Manomndu kecha ai na wumangi woke.’”
Yesu ailachika fana
(Mar 9:2-13; Luk 9:28-36)
Currently Selected:
MATAYO 16: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
