MATAYO 18

1 Kyasia saa na iya walya wa kiloshionyi wakacha na handu Yesu ai wakahamba, “Alewo mnene o wodoe ipfo wumanginyi wo ruwehu nyi o ku?” 2Nao kalaha naho kimana kakiwika oo kidi kyawo. 3 Kahamba, “Na kya lohi ngambia, ‘Mukada mulahaluka’ mukawa cha shiwana ma mochikoya wumangi wo ruwehu muide naho-pfo. 4Kyasia-ng'u ichu mokunyinyiṟa amonyi kawada mbaṟi ya kimana-ki nyio awa mnene o wodoe ipfo wumanginyi wo ruwehu. 5Na kimana kidi cha iki mndu kakyambya ipfo kanyi koke kikawa nyi kipfa kya rina lyako nyio inyi anjiumbya.”

Madekesha

(Mar 9:42-48; Luk 17:1-2)

6“Na iwa watutu wakusirye koko inyi ma ichu umuho mndu kamendye wusutsu kyake iki kichakicha-ho nyi wei ihenda ipfungyo iseo nzingonyi nahende olotso kulya ipalyipalyinyi makidi hawi kundo kuṟungukye kukahenda wanda. 7Ochia nyi lo wuyana kipfa kya mbonyi tsiendye wusutsu tsikeri-ho. Nyi kipfa mbonyi tsiendye wusutsu icha na tsiche. Kyaindi ochia nyi lo mndu-chu mbonyi tsa wusutsu tsechicha nao. 8 Kikuendye wusutsu kokoya nyi kuwoko kopfo ang'u kudende kopfo kumanye ukukumbe aleshe. Nanga iyo koida ipfo kwenyi moo kui kileta ang'u kui kiricheche kota ili owode mawoko hawi na madende hawi kohenda kumbo kulya modonyi fo mlungana. 9 Na kikuendye wusutsu kokoya nyi riso lyapfo likuṟuo nolikumbe aleshe. Nanga iyo koida na ipfo kwenyi moo kui njeche kota ili owode meso hawi kohenda kumbo kulya modonyi foaka mlungana.”

Mfanano fo ichoondi lidekie

(Luk 15:3-7)

10 “Ambuyenyi ma mulamine iwa watutu ma ichu umu-ho. Kipfa ngambia, ‘Wasu wawo wa ipfo ruwehu nyi wailungana iwona kyamu kya Wande o ipfo rewehu. [ 11Nyi kipfa mana o mndu nyi achee nakiṟe iki kidekye.] 12Nyi mwihia-ho muda? Kokoya ma mndu awode machondi ihana kawona limu lideka-ho chi echida-ho halya makumi kenda na kenda kulya shitonyohu kahenda pfula lilya lidekye? 13Kokoya keliwona, na kya lohi ngambia kyalyo echiengeṟa ichihio kota na kya halya makumi kenda na kenda haladekye. 14Na wudo kindo kilakikunde nyi Wande o ipfo ruwehu nyi iwa watutu kudekye-ho ma ichu umuho.’”

Ihooṟiana

15 “Indi kokoya manomayo akunyamaṟye na iyo uhende umhoṟye deko lyake mukeri-ho nyo nao muwawi. Kokoya kekwadanya hoo nyi okuwonya manomayo. 16 Indi kada alakwadanya iyo uhende onduo mndu umu uche nao ang'u wawi, na orio kidedo kededo-ho kyose kundu kehoṟoka kiwange kui dumbu lya wakaṟa wawi ang'u waṟaṟu. 17Indi kada alaadanya iwo nohende ikyongoya siṟi. Kada alaadanya siṟi naho nakuwie cha o mbaṟi njihenu na msanyi o okamba.”

Iidikiana na ilekiana

18 “Nyi kya lohi ngamuwia, ‘Orio kyose momepfunga kunu orukenyi na ipfo ruwehu na kikae-ho kiwei kipfunge. Na orio kindo kyose momepfunguo kunu orukenyi na ipfo ruwehu kekaa-ho kiwei kipfunguo.’ 19Na kingi-se ngambia, ‘Nyo mui wawi ang'u waṟaṟu-ho kombona wamidikyana kimu kya kindo ma kida ma kida wakiterewa na wechikiwona wainengo nyi Wande o ipfo ruwehu. 20Cha kipfa kundu komsanza wawi ang'u waṟaṟu kuirina lyako inyi napfondo mbei ipfo kiidi kyawo.’”

Mfanano fo isinga lilalekunda ihooṟia manomaalyo

21 Nalyo Petro kacha naho kammbesa, “Ale Mndumii! Manowama nyi echinjinyamaṟya-nyamaṟya nashike indii na inyi njimhooṟie shilya anyamaṟie? 22 Ngesa njishike kamfungade naho-ngu?” 23Yesu kambia “Ngakuwia manya chi mfungade ochishikapfo shila nyi makumi mfungade ka mfungade.” Kyasia-ng'u kyamba nyi wudo kii wumangi wo ruwehu nyi wafananyi na mndu mangi awekundi itala na masinga hake sile tsake hawode. 24Kewoka itala nao kaendyo mndu awode sile yake ya talanta shiku ikumi. 25Nao alawode ketaa Mndumii ulya kawawasa wahende kumbo wuhuru na mka na wana na shose awode kuwoneke shetaa. 26Kyasia msoṟo ulya kakuhutsa wanda kamolokya ndenyi kahamba, “Kenjile-heṟuo-leheṟuo-wo na inyi njikutae shose.” 27Kyasia Mndumii ulya kalia isinga lilya makulili kalilekya katana amdea na sile iya piu. 28Kyasia isinga lilya lyekihenda ipfo nja kawona msinga wodoe lilya limu-ho liwode sile yake ya dinari ihana. Kamchinga oṟoo kambia, “Njitaa sile yako uwode!” 29Isinga lilya odoe likakuhutsa wanda na kyamu likamterewaterewa likahamba, “Kenji-leheṟuo-leheṟuo-wo na njekaa njikutae.” 30Nalakunde. Kahenda kamkumba kulya kipfungonyi na namtae sile iya awode. 31Kyasia masinga halya wodoe hekiwona kiwe kido naho hakasokyo mnu nyi fowa ing'anyi. Hakahenda ongoya Mndumii ulya oho kilya kyawa kido kyose. 32Nalyo Mndumii oke kamlaha kambia, “Kui isinga iwicho. Sile iya yako uwewode na inyi ngakudea yose piu kipfa lyandi onterewa. 33A iyo chi kiwewekusumuhanye isaṟia isinga odoo na chando inyi ngawekusaṟya iyo? 34Na Mndumii oke karihinyika nyashi kamdambikya walya wetuura na natane ataa sile iya yake awode yose. 35Na Wande o ipfo ruwehu na wudo echimbika nyo mkada mlahoṟyana kui mrima mndu na odoe shilya mnyamaṟyanyi.”

Currently Selected:

MATAYO 18: KIM2

Highlight

Copy