LUKA 17
17
1Kyasia Yesu kawia walya wa kiloshionyi kyake, “Na kukaki kochida kulacha madekeshopfo, indi ochia lo ulya echihaende! 2Nanga kapfungio iho lya iseo ipfo tsingonyi kapfuluyo ipalyipalyinyi, nlyondo kiwechichia kota ili adekesha umu o watutu. 3 Kuṟisenyi Kokoya manomayo akudekio, kemdedie! Kakutochia, mhooṟie. 4Na kakudekio ka-mfungade mkonu fumu, nao kawewuya icha na-kopfo ka -mfungade ihamba, ngamedumbuya, kewemhooṟie.”
Wuidiki
5Wasu walya wakambia, “Mndumii, luengeṟie pfinya yeidikia Ruwa.” 6Mndumii kahamba, “Kokoya mbewode iidikia ma litutu cha mbeu ya haradali, na muwechiwia mkuyu fu, kuṟuka iya, nokudonge ipalyipalyinyi!” Nafo nyi fuwechimwidikia.
Kindo kiwaṟi mṟundi
7“Indi nyiiu onu awode isinga lyake lyedema na mtambo fodema, ang'u molisa, nao kiheri acha awuka demenyi nambie, Kenjo owinyi nodamie? 8Chi echimbia, ‘Njiomoya kando njilye! Kupfunge nonjihidie mṟasa njimae ilya na inyo; ngammaa ilya, nokulieng'u iyo kumonyi na inyo noweku nyooya. 9Alae nyi awechiwia isinga lilya haika kipfa lyaṟunda kilya lyawawasio? 10Kyasia, nanyo na wudo, mukamemarisa iwuta shose mui wawawasie hambenyi, So nyi masinga halechiwa; shilya luwutie nyi shilya shiluwaṟi iwuta tupu.’”
Yesu aheṟemtsa wandu ikumi wawodo nyi saka
11Naalyo kukashika, lilya mandi awerie njia yehenda Yerusalemu, kaida kiidi kya Samaria na Galilaya. 12Kekiida na kimṟinyi kimu, naaho wasoṟo ikumi mawawodo nyi saka wakamkumbuhana; wakahoṟoka aleshe. 13Wakairia ṟu wakahamba, “Yesu! Mwaria! Kelusaṟie wukiwa!” 14 Nao kekiwawona kawawia, “Kuhendyenyi mukuloṟe kulya ko wakohanyi.” Wadi wechihenda-pfo wakaheṟemka. 15Na umu owo-ho awona ke amchia, kawuya kaichimbira Ruwa na ṟu ling'anyi. 16Kacha, kamhoya na kyamu alya madendenyi hake kamwana. Nao nyi-we o Samaria. 17Yesu kahaluo kahamba, “Walya waheṟemka chi ikumi; a walya kenda nyiku waya? 18Kowoneka-se-ho ma sa wawuya wache iichika Ruwa shile na mhenu-chu tupu?” 19Kambia, “Kure nokuhendie kanyi, nyi iidikia lyapfo lyakukiṟa.”
Icha lya wumangi wo Ruwa
(Mat 24:23-28,37-41)
20Lilyandi aleweso nyi Wafarisayo ke wumangi wo Ruwa nyi wochicha indi, kawahaluo kahamba, “Wumangi wo Ruwa wochicha wochikuloṟa-loṟa na wandupfo. 21Manya wechihamba, aiwu iya, ang'u awulya kulyapfo; kipfa wumangi wo Ruwa nyi ipfo kidi kyanu wui!” 22Kyasia, kawia walya wa kiloshionyi kyake, “Nyi kochikaa kuche shiheri, nyilyondo mochilanga iwona mfiri fumu fo Mana o mndu, manya mulechifuwona. 23Na sa wechimuwia, Ambuyenyi iya, ambuyenyi ipfo; ma mlakure handu mui muhendepfo. 24Kipfa chando mbawa yekewaṟuka ikawooka ora-lu likakooya ora lungi, ikalimikia shose shii kunu shi ya ruwehu, nyi wudo na kya Mana o mndu kechiwa mkonu-fo foke echicha nafo. 25Kyaindi kuwooka nyi kimbaṟi ituuro mnu na ileho nyi wandu wa oshari-lu. 26 Na chando kulewa shiheri shilya sha Noe, na wudo kochikaa kuwe mkonu iya ya Mana o mndu. 27 Nyi wawei ilya, wakawenyio, wakaalika, wakaaliko, itane mkonu fulya Noe aleida na kulya ngalawenyi, kukacha mra fukawakombetsa wose piu piu. 28 Nyi wudo shiwefananyi na kiheri kya Loti, nyi waweilya, wakawenyo, wakawehuṟa, wakawekumba, wakawewaaya, wakawewika mba. 29Kyaindi mkonu Loti alewuto kulya sodoma, kukaoloka modo fo kibiriti-biriti ipfo ruwehu fukawarumatsa wose piu. 30Na wudo-ng' tichi kochikaa kuwe mkonu fulya Mana o mndu echitarambuyo. 31 Mkonu fulya, ma mndu ai kai na masaa hake hai wanda, ma nalawone kesoka ihaira. Na wudo namndu ai mdemenyi, ma nalawuuye shii numa. 32 Kekumbuonyi-wo mka o Loti! 33 Orio mndu akundi ineneka mrima foke, nyi echifudetsa, na mndu alakundi ifunenekia, nyi echifuinutsia kipuo wyoo. 34Ngamuwia, kio kilya kilya, wandu wawi walee kitaṟehu kimu, umu-ho nyi echiiroho, na icho ungi nadeoho. 35Na waka wawi waisea handu hamu, umuho nyi echiiroho, na ungi nadeo-ho. [ 36Wawi wechikooyo wai demehu, umu-ho nairoho, na odoe nadeo-ho.]” 37Wakahaluo wakambia, “Nyiku Mndumii.” Nao kawawia, “Handu hai mnying'a, nyi'hondo mtonyi (mosuṟa) yekekuwumbia.”
Mfanano fo mka mkusu na moanduo
Currently Selected:
LUKA 17: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
