LUKA 18
18
1Kawawia ifano lyehamba, n'kimuwaṟi iterewa kitsitsi mlechilemo. 2Kahamba, “Kundu ko mṟinyi kuweepfo mchili modumbuo mondu, alaweowoye Ruwa ma ikusaṟa kya mndu ma uhya. 3Kuweepfo-se na mka mkusu kulya mṟinyi, kawa mohenda-henda ko mchili ulya modumbuo mondu kahamba, ‘Dumbuo-wo mondu foko na mosile chu oko!’ 4Nao nalakunde, kambetesa haleshe. Numa kawuya ihamba ipfo mrimenyi koke, ‘Ngakaa njilaowoye Ruwa, na ikusaṟa kya mndu ma uhya. 5Kyaindi ili mka-chu anjichungia-chungia adi kitsitsi, na njimweke idumbuo mondu foke, kundu nalawone kefurumia icha injiraha-raha kyamu.’” 6Mndumii kahamba, “Keadanyenyi mchili-chu modumbuo mondu kilasumhanyi chando ahamba. 7Aka Ruwa awechidumbuo mondu fo iwo awasambuṟie, iwo wekemfuhia mfiri na kio? A ngesa nyi echiwawetesa? 8Nyi ngamuwia, nyi echikambiṟa idumbuo mondu fowo owinyi. Nyi mohamba muda? Ili Mana o mndu echicha na echiwona ofoṟo orukenyi?”
Mfanano fo Mfarisayo na msanyi o okamba
9Kuweepfo wandu wawekusaṟye kyawo wawenyi ke nyi wai wecha wasumuhanyi, wakapiṟa wengi; kawawia ifano-li, 10“Wandu wawi waledo na hekalunyi iterewa Ruwa; umu nyi Mfarisayo, na o kawi nyi mosana okamba. 11Mfarisayo ulya kahoṟoka, katerewa mrimenyi koke adi, ‘Ruwa ngakuichika, kipfa ili njilafananyi na wandu wengi, wasoki, wa ukika, waṟuhui, ma ndafananyi na msanyii-cho o okamba. 12Mfungade fumu nyi njekekuotoya kawi, na shilya njiwode shose, ngawedambika kenga kya ikumi.’ 13Kyaindi msanyi ulya o okamba kahoṟoka haleshe, nalakarie ma iiria meso huye ruwehu, indi kakukapa kipeeta kahamba, ‘Hoi Ruwa, kenjisaṟia-wo inyi mokudekio!’ 14 Kyasia nyi ngamuwia, ‘Ichu nyi alesoka na kanyi koke amsumuhantse kota ulya.’ Chakipfa orio mokung'anyisha amonyi, nyi echinyiiṟo, na mokunyiiṟa amonyi, nyi eching'anyisho.”
Yesu awikia ona wana watutu
(Mat 19:13-15; Mar 10:13-16)
15Wakamwendie na shiwana, kundu nashipaaye. Walya wa kiloshionyi wekiwawona, wakawatukia. 16Yesu kawalaha wache na koke kahamba, “Kelekenyi shiwana shikucheye na koko, ma mulashiime; cha kipfa wumangi wo Ruwa nyi wo iwo wai chasho. 17Nyi kya lohi ngamuwia, ‘Mndu alaambia wumangi wo Ruwa ai cha mana nechishika-pfopfo.’”
Mndu umu msuṟi
(Mat 19:16-30; Mar 10:17-31)
18Kuwei-pfo mndu ang'anyi, kambesa kahamba, “Mlosha mcha, ngawika njida, njioṟe moo fo mlungana?” 19Yesu kambia, “Nyikipfa-ki ili onyiilaha Mcha? Kuipfo mchapfo, shile Ruwa amonyi. 20 Mawawaso na uhaichi ke, ‘Ulaṟuhuye; Ulawaahe; Ulaiwe; Ulairie sha wongo; India ndeyo na mayo.’” 21Nao kahamba, “Isho shose nyi njishiwode wookia wututu woko.” 22Yesu aicho ado kambia, “Utsiheṟe kindo kimu henda kumba isho uwode shose nohawie wakiwa, nlyondi ochiwada kisa kulya ruwehu. Komemarisa, nocheng'u nonjioshe.” 23Kekiicho ado kasokio mnu nyi fowa kakuinadia mnu, kipfa nyi awesuṟie mnu.
24Yesu kekimbona ado kahamba, “Ambuyenyi chando kiumie wasuṟi ida na wumanginyi wo Ruwa! 25Kipfa nyi kyangu ngamia iide ṟochenyi lya sindanu kota mndu msuṟi iida wumanginyi wo Ruwa.” 26Walya waleicho wakahamba, “Aka nyi mndu ada echikiṟo?” 27Kahamba, “Isho shilechiidimika ko wandu, ko Ruwa nyi shechiidimika.” 28Petro kahamba, “Ambuya, so nyi luleda shindo shadu shose, lukakuosha.” 29Yesu kawawia, “Nyi kya lohi ngambia, Kuwode mndu aleda mba ang'u mka, ang'u wanawamae, ang'u iwo wamfeye, ang'u wana, kipfa kya wumangi wo Ruwa. 30Aleekaa nawihiṟio sha ngeria kafoi shiheri-shi shekaa iya wanda, na shiheri shechicha, nasumbo moo fo mlungana.”
Yesu ahamba lya kaṟaṟu kya opfu loke na iṟuka lyake
(Mat 20:17-19; Mar 10:32-34)
31Kyasia kasanza walya ikumi na wawi handu hamu kawawia, “Ambuyenyi, nyi lukeri-ng'u ido luhende kulya Yerusalemu, na shilya shii shiṟehie kya Mana o mndu nyi waikimbi wa Ruwa, nyi shechihoya shose. 32Kipfa nyi echihenda idambikio wandu wawicho, wamwisaluche, na imruma, na imwiselia mnyeri. 33Wawemkapa na ngowa tsiwode msha, numa wambaahe. Nao mfiri fo kaṟaṟu nawuye iṟuka.” 34Na iki walakimanyie ma kitung'tu. Idedo-lyo likawaṟikikia, walalimanye kimaduma, walamanye kilya lyahamba.
Yesu achiṟa mndu mpfu meso
(Mat 20:29-34; Mar 10:46-52)
35Lilya aweshikie kufui na Yeriko, adi a ichu mndu kipfupfuṟe adamie mbarinyi ya njia kechiterewa shiinengo. 36Aicho tendemra ya wandu yechiida, kawesa, nkyo kiki ikyo? 37Wakamwongoya ke nyi Yesu o Nasareti aiida. 38Nao kakoṟoṟoma ilaha kahamba, “Hoi Yesu, mana o Dawidi, njisaṟia-wo wukiwa.” 39Walya wawesonguo wakamkanga natsie. Kyaindi o kaengeṟa ilaha, “O mana o Dawidi, njisaṟiawo wukiwa mmbe!” 40Yesu katirima, kawawasa naendo na alyando ai. Kekishika-ho, kambesa. 41“Nyi kiki ukundi njikuwutie?” Nao kahamba “Nyi njiwuye yambuo-se Mndumii.” 42Yesu kahamba, “Ambuo-se; nyi iidikia lyapfo lyakukiṟa.” 43Naalyo kaambuo, kahenda nao kechiidapfuma Ruwa. Na wandu walya walewona, wakang'anyisha Ruwa.
Yesu na Sakayo
Currently Selected:
LUKA 18: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
