LUKA 16
16
1Kyasia kawia na walya wa kiloshionyi kyake, “Kuwekeri-pfo mndu msuṟi awewode mwiṟichi oke momringia kanyi, o kakumbo koke ke nyi ekeola-ola masaa hake. 2Kamlaha kambia, ‘Nyi kiki iki ngaicho kyapfo; kenjiloṟa itala lya shindo sha wuiṟichi wopfo, kipfa nyi njiwonyii ochiidima-se injihidiapfo.’ 3Mhidi ulya kahia ipfo mrimenyi koke, ‘Nyi wuda njechiwika ngesa, ili mndumii oko anjifuna wuhidinyi? Idema njechiidimapfo, na yeṟeṟa nyi njechiwado nyi sonu tseeṟeṟa. 4Hoo! Ngamemanyia chando njechiwika, kundu ili njechiwuto wuhidinyi wanjiambie, wanjiitse na mba kowo.’ 5Kyasia kalaha wasile wa mndumii oke wose umu-umu kawia ulya o kuwooka, ‘Nyi sile ya kiki uwode ya mndumii?’ 6Nao kahamba, ‘Nyi matanaki ihana ha mafuda.’ Nao kambia, ‘Ambia paruo yapfo nodamie, noṟehie-ho owinyi fara makumi hatanu,’ 7Kawia na ulya ungi, ‘A iyo nyikiki uwode?’ Nao kahamba, ‘Nyi mkunja ihana ya ngano.’ Nao kambia, ‘Nga paruo yapfo noṟehiye-ho makumi nyanya.’ 8Kyasia mndumii ulya kaṟumisha mwiṟichi ulya awenyamaṟie, kipfa lilya alewuta ado na wuṟango; kipfa wana wa wuyana-wu wo wulalu nyi wa-waṟango kota wana wa sa ipfo sumuhana na kishari kyawo wawenyi.” 9Nyi wudo-ng'u na inyi ngamuwia, “Kehenda kuwadienyi mbuya na shindo sha mamona ya wuwicho, kundu ili shechishika isenekia, wamwambie, wamdamiṟe alyando kochikao mlungana mandi-ho masaa hanu hechimdekia. 10Ichu ai mhendeli o shindo shangu, nechiwa na mhendeli o shindo shifoi. 11Na ichu atahacha kindo sa kitutu, nechiwa motahacha na kindo king'anyi? 12Akashika mkada mlaiwahendeli kya mamona ya wuwicho, ichu echimasia sha lohi nyiiu? 13 Nanyo mulamewa wahendeli kya shindo sha wengi, aka-shika ichu echimwinenga shii shanu nyiu.”
Madedo maata ha Yesu
(Mat 11:12-13; 5:31-32; Mar 10:11-12)
14Kwipfo mṟundi echidima ipfuṟukanyia womi wawipfo. Kipfa nyi wudi kechihendeka, “Nyi echisuo ichu o kuwooka, nakunde ulya o kawi, ang'u nakuwade na ichu o kuwoka, naisaluche ichu o kawi; Mochiima iṟundia iwa wawi; Ruwa na Mamonapfo. 15Kyasia Wafarisayo walya waicho wado nawo nyiwe-wandu wawelangie mnu mapesa, wakakutsinyia kyake. Nao kawawia, ‘Nyo nyi mokekuhaluo wecha wasumhanyi oshangunyi lo wandu muwenyi, kyaindi Ruwa nyio aichi ngoo tsanu; cha-kipfa wutumbe wo ki-wandu nyi kindo kisuikie ko Ruwa.’ 16 Mbonyi tsa wuwawaso na tsa waikimbi nyi tsileedio itane Yohane acha, na kiwokia-lyo nyi kokeongoyo mbonyi njicha tsa wumangi wo Ruwa, na orio mndu nyiekepario-pfo na pfinya. 17 Nyi kyaangu ruwehu na sanga shisaramaye, kota kimṟeho kimu kya wuwawaso kechideka. 18 Orio mndu alekana na mka oke kaalika ungi nyaṟuhuya; na ichu echialika ulya alekana na mii, nyi aṟuhuya.”
Msuṟi na mkiwa Lasaro
19“Kuwekeri mndu msuṟi awekeṟaa nguwo tsa king'aring'ari na tsa kimamile tsa owiṟo pang'a, kawa mokukesekia na shiweṟe mkonu yose. 20Na mndu mkiwa, rina lyake nyi Lasaro awe-mkumbe alya mongo koke, nao nyi awewodo nyi matiinga, 21kalanga ikuihutsio nyi shipeṟengu-sho shechioloka ipfo mese-hu ya mruṟi ulya. Kyaindi na shite itane shacha shikamkomba-komba matiiga halya. 22Kukashika, mkiwa ulya kapfa, kahenda-dao nyi wamalaika kulya nndenyi tsa Abrahamu. Na msuṟi ulya kawepfa, kaṟiko. 23Msuṟi ulya akeri kulya kundu ko wapfu mawukiwenyi, kairia meso kawona Abrahamu kuleshe, na Lasaro ai ipfo nndenyi tsake. 24Kalesha ṟu, kamlaha kahamba, ‘Hoi wande oko Abrahamu! Kenjisaṟia-wo wukiwa, nokeduma Lasaro nakape kimdo kya kimnyo kyake mṟingenyi nache injioloṟa olimi-lu; kipfa ili njiilya mnu wukiwa kunu ngumienyi ya modo-fu.’”
25Abrahamu kahamba, “Manoko, kekumbuo-wo chando iyo kuwei-yambia mecha hapfo lilya mandi uwei na moo orukenyi, na Lasaro kyake kaambia mawawio tupu na wuale, nao wulalu iya nyi aiwihiṟyo moo na iyo kowawiṟo. 26Ma koda isho shose, kunu kiidi kyadu nanyo nyi kung'alawukie-ho pichi lya ngolokio ing'anyi, kundu iwo wakundi yambadia ipfo konu walaidime, na iwo wa konu walaidime yambadia kodu. 27Nao kahamba, ‘Kyakusiia, indi ngakuterewa, ndeyako, nokekumdumia kulya kanyi ko wande. 28Kipfa nyi njiwode wanawawama wako watanu, nakehenda iwakekedia, kundu wo walawone wechicha-se na kundo-ku ko mawukiwa.’ 29Abrahamu kahamba, ‘Na wawode Mose na waikimbi wa Ruwa, leka wawaadanyie-wo.’ 30Nao kahamba, ‘Ote-wo, Abrahamu oko, ndeako, indi kokooya wacheyo nyi mndu o kunu ko wapfu, nalyondi wechidumbuya mrimenyi yawo.’ 31Abrahamu kambia, ‘Wakamda walaadanyia Mose na waikimbi wa Ruwa, na nokoe mndu awechiṟuka awuka ko wapfu, wawechiidikishopfo.’”
Madekesha
(Mat 18:6-7,21-22; Mar 9:42)
Currently Selected:
LUKA 16: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
