LUKA 15
15
1 Wesana okamba na wanyamaṟi, iwa wose nyi wawekemchea, kundu wamwadanyie. 2Wafarisayo na walaanyi wa shitapu wakarihinyika wakahamba, “Ichu nyi ekeambia wanyamaṟi na ilya kalya nawo.” 3Nao kawawia ifano-li kahamba. 4“Nyi mndu uhya o konu awode machondi hake ihana, limu-ho lideke, alechida halya makumi kenda na kenda ipfo patenyi nahende iwatiṟa lilya lidekie itane aliwona? 5Nao kameliwona, kalihekia makoso-hu hake amchihiye. 6Kamecha na kanyi kalaha wambuya na wa mṟasa kawawia, ‘Kechihiyonyi-wo kimu na inyi, kipfa ngamewona ichoondi lilya lyako liwedekie.’ 7Ngamuwia, ‘Na wudo kochiwada sia kulya ruwehu kya mndu umu mnyamaṟi adumbuya kota kya wandu wecha makumi kenda na kenda walasaṟie idumbuya.’”
Mfanano fo shilingi idekye
8“Ang'u nyi mndu mka uhya awode shilingi tsake ikumi, ikadeka-ho imu, alechiatsa taa naahie ipfo mba, napfule wo-laalya itane aiwona? 9Na kameiwona kalaha wambuya wake na waka wa mṟasa kawawia, ‘Ke chi-hionyi-wo hamu na inyi, kipfa ili ngamewona shilingi iya yako iwedekie.’ 10Na inyi nyi ngamuwia, ‘Na wudo kochiwa sia ko wamalaika wa Ruwa kya mndu umu mnyamaṟi adumbuya.’”
Mfanano fo mana adekye
11Kahamba-se, “Mndu awewode wana wake wa womi wawi. 12Ulya manawo kahenda iwia ndee, ‘Wande, njinenga ohawi loko lo masaa lulya luwechinjisumhanyia.’ Nao kawahawia shindo shilya shake. 13Kukaida mfiri sa mwangu, mana ulya lyamkeku kakungura shindo shilya shose kahenda-samia oruka lo kuleshe. Kundu kulya kaola-ola masaa halya hake kui shindo sha seṟeṟia, kawa mseṟeṟi. 14Nao kekimaa yola-ola shose, kukacha njaa ing'anyi kulya orukenyi. Nao kawooka iwuṟa shetawulya moo pichu. 15Kahenda ikuwada na msuṟi umu o walya wa kulya orukenyi; nao kamduma mdemenyi foke, nahende ilisa nguwe. 16Kalanga iihutsa ndeu yake na makanda hekelio nyi nguwe tsilya, indi nalainengo nyi mndu. 17Kawuya itawuka mrima kahamba, ‘Nyi waikelei wenga wa wande oko wawode kando kawo kaingiki, na inyi njipfiia njaa kunu wai! 18Njechikure njihende ko wande oko njimbie, Wande, njilenyamaṟia ruwehu na sumuhana na iyo. 19Ma njikisumhanyi ilaho nyi mana opfo-sepfo; kekunjihaluye umu o waikelei wapfo.’” 20Naalyo kakure kahenda kulya ko ndeye. Akeri handu sa haleshe alameshika, ndee kambona, kamwichio wukiwa, kakambia, “Kamchunguṟia nzingonyi, wakahekiana momu. 21Mana kambia, ‘Wande, nyi njilenyamaṟa huye ruwehu na sumuhana na iyo; ma njikisumhanyi ilaho nyi manopfosepfo.’ 22Kyaindi ndeye kawia masinga hake, ‘Kambienyi owinyi muhende yende nguwo ya wuitoṟi iya ichihiye tsingi mumṟike, muwembika na rachi ipfo kimnyonyi kyake na shaadu ipfo madende. 23Muhende yende na ihache lilya linoru mulishinjie,’ lulye, luchihio. 24Kipfa mana-chu oko nyi awepfie kawuya iṟuka, nyi awedekie, kawuya iwoneka. Naho wakawooka ichihiyo. 25Kyaindi mana ulya oke mbee nyi mdemenyi aweei; achepfo ashikie kufui na kanyi, kaicho shinanda na ṟingi. 26Kalaha-ho ileu limu kaliwesa, ‘Nkiki ikyo?’ 27Nalyo likambia, ‘Nyi mananu acha na ndeyo kashinja ihache lilya linoru, kipfa kya ili awuya imbona ai na oru.’ 28Nao kaichuo nyashi, nalakunde ma iida napfo. Kyasia ndee kaida na ipfo nja kamlemba-lemba. 29Nao kahaluo, kawia ndee, ‘Keambuya; kiṟa mbeikuṟundia maka ifoi ido, na inyi njilemetehiye ma wuwawaso wopfopfo, ma iyo kulemennenge wudahina wo wuoṟo njihende ma ikuchihiṟanyia na wambuya wakopfo. 30Kyaindi wulalu omekewona mana-chu opfo ache ichu aolye masaa hapfo ai na shisaya na weṟuhuyo, ate o nyi omshinjia ihache lilya linoru!’ 31Nao kambia, ‘Manoko, iyo nyi ukeri na inyi shiheri shose, na ishi njiwode na shapfo shose. 32Kyaindi nyi kiwewaṟi ichihio na ikeseka, kyamba mana-cho oko nyi awepfiie kawuya iṟuka, nyi awedekie kawuya iwoneka.’”
Mwiṟichi mṟango
Currently Selected:
LUKA 15: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
