IWUKA 3

Ruwa alaha Mose

1Kyasia Mose cho nawekelisa ipo lya ndee o mka oke Yetro, mkohanyi o Midiani; kalisiṟa ipo lilya ora lo kyukanyi lo nuka iya, kashika mṟasa fumvunyi lya Ruwa kulya Horebu. 2 Malaika o Mndumii-Ruwa kamchea, kiidi kya olewo lo modo fuweiaka makidi hawi ha kingeṟa Mose kaambuya, ate! Kingeṟa kilya kiweaka modo, nakyo manya kilasenekie. 3Mose kahamba, “Njiembeṟuka wulalu, njiambuye kiwonesio ki king'anyi, na nki kitewe kingeṟa ki kilaisenekia.” 4Mndumii-Ruwa kekiwona ke nahaluka naambuye, Ruwa kamlaha kuwuka makidi hawi ha kingeṟa kilya kahamba, “Mose! Mose!” Kahamba, “Aichu njii a.” 5Nao Mndumii-Ruwa kahamba, “Manya kulatikirie iya; wuta shadu shapfo ipfo; madendenyi hapfo; kyamba iya handu uhoṟoki nyi handu haele.” 6Kahambase, “Inyi nyi Ruwa o ndee, Ruwa o Abrahamu, Ruwa o Isaki, na Ruwa o Yakobo.” Mose kashikia kyamu kyake; kyamba naleowuo iambuya Ruwa. 7Mndumii-Ruwa kahamba, “Nkya lohi ngamewona matuuro ha wandu wako wai Misri na inyi ngameicho kieṟeṟo kyawo kipfa kya walya weke wahoṟokia, 8na inyi ngasoka njicheiwaashuo mawokonyi ha Wamisri. Njechiwawutapfo njiwadose kuwuka orukalo tane oruka lucha, na lusalari; oruka luichuo wuki na maruwa; oruka lo Mkanaani, na Mhiti, na Mwamori na Mperizi, na Mhivi, na Myebusi. 9Kyasia, ambuya, kieṟeṟo kya wana wa Waisraeli kyamenjishikia; na ngamewonase matuuro ho hawo sa Wamisri waiwatuura. 10Kyasia, njechikuduma wulalu ko Farao, kundu noidime iwuta wandu wako wana wo wa Waisraeli wawuke Misri.”

11Mose kawia Ruwa, “Inyi nyiu, tane ngahenda ko Farao, njiwute wana wa Waisraeli wawuke Misri?” 12Na Mndumii-Ruwa, kahamba, “Nkya lohi njechikaa hamu na iyo na kichano ke nyi inyi ngakuduma nkyo iki; komemarisa iwuta wanduwo ipfo Misri, mochiindia Ruwa kunu fumvunyi.” 13 Mose kawia Ruwa, “Ambuya, ili njechishika ko wana wa Waisraeli, na iwawia, Ruwa o ndeanu nanjiduma konu; nawo wakanjiwesa, Rina lyake nyiu? Njiwawie njida?” 14 Ruwa kawia Mose, “INYI NJIIPFO MSA NJIIPFO. Nyi wudo ochiwawia wana wa Waisraeli; INYI NJIIPFO nanjiduma konu.”

15Ruwa kawiase Mose, “Wia wana wa Waisraeli madedo ha, MNDUMII Ruwa o ndeanu, Ruwa o Abrahamu, Ruwa o Isaki, Ruwa o Yakobo nanjiduma konu; ili nyilyo rina lyako tane mlungana, nalyo nyi ngumbuo yako tane marika hose. 16Henda, sanyia wameku wa Waisraeli handu hamu nowawie Mndumii-Ruwa o ndeanu, Ruwa o Abrahamu, Ruwa o Isaki, Ruwa o Yakobo, nalenjichea, kanjiwia, nkya lohi ngamuchease, njilewonase isho muiwutio ipfo Misri. 17Na inyi ngahamba, Njechimudosa kuwuka kiidi kya matuuro ha Misri na imuduo orukenyi lo Mkanaani, na Mhiti, na Mwamori, na Mperizi, na Mhivi, na Myebusi, njechiwaduo orukenyi luichuo maruwa na wuki. 18Nawo wechiicho ṟu lyapfo; na iyo nochihenda, iyo na wameku wa Waisraeli ko mangi ya Misri, nommbie, Mndumii-Ruwa o Waebri nakoyana naso, ko ikyo wulalu lokuterewa, luienge momu luhende ohendo lo mkonu iṟaṟu kulya nuka, luhende iwutiapfo Mndumii-Ruwa odu kidaso.”

19Na inyi njiichi ke Mangiyo ya Misri echimwinenga momu muhende manyale-pfo, mṟasa kui owoko loko lo pfinya. 20Na inyi njechihoṟuo owoko loko, na ikapa Misri kui ṟiho tsako tsose, njechitsiloṟa kiidi kyake, na numa nechimwinenga momu muhende 21 Na inyi njechiinenga wanduwo iidikio oshangunyi lo Wamisri; na kechiwa, mandi mochikuhendia mochihenda na mawoko ha wulyapfo; 22kyaindi orio mndu mka nechiterewa ko wamṟasa, na ko icho, akeri nao kanyi, shihia sha fesa, na shihia sha sahabu, na maṟao; nanyo mochiṟika wana wanu na wana wanu wakisoṟo na wa kika, koikyo mochiduo Wamisri wawe wapfungo wanu wa shida.

Currently Selected:

IWUKA 3: KIM2

Highlight

Copy