IWUKA 4

Ruwa ainenga Mose pfinya tsiṟihishiye

1Mose kahaluo kahamba, “Kyaindi, ambuya, wechinjiidikiapfo, manya wechiicho ṟu lyakopfo, kipfa wechihamba, Mndumii-Ruwa alekucheapfo.” 2Mndumii-Ruwa kambia, “Nki ki ikyo uwode ipfo owokonyi lopfo?” Kahamba, “Nyi ndichi.” 3Kammbia, “Ikumbe wanda;” kaikumba wanda, nayo ikahaluka njoka; Mose kadicha oshangunyi loyo. 4Mndumii-Ruwa kawia Mose, “Hoṟuo owoko lopfo, noiwade mhasifo; (kahoṟuo owoko loke kaiwada, nayo ikahaluka ikawa ndichi owokonyi loke), 5kundu wawuteho iidikia ke Mndumii-Ruwa, Ruwa o Abrahamu, Ruwa o Isaki, Ruwa o Yakobo amekuchea.” 6Mndumii-Ruwa kambiase, “Wulalu wika owoko lopfo o kipeta kopfo. Kawika owoko loke alya kipeta koke; nao kekiluwutaho, ate! Owoko loke luwodo nyi saka, lukoila weṟu cha makuṟeṟa ha mtsudu. 7Kahamba, Wikase owoko lopfo o kipeta kopfo.” Kaluwikase alya kipeta koke, nao kekiluwuta alya kipeta koke, ate! Lomewuuya fana iya ya mbihu foke. 8Kyasiang'u kechiwa walamekuidikie, manya iadanyia ṟu lya kichano kya kuwoka, wechiadanyia ṟu lya kichano kya kawi. 9Nahong'u kokoya walameidikie manya shichano shi shishiwi, manya iadanyia ṟu lyapfo, kyasia, ira mṟinga fo medenyi nofupusuye orukenyi handu hahadutsu, na mṟinga fo ofuira medenyi fochiwa samu alya orukenyi handu hahadutsu.

10Mose kawia Mndumii-Ruwa, “Hoi Mndumii, wokia kacha inyi chi mndu mokidedapfo, manya wokia mandi ulewooka ideda na mṟundiopfo, kyamba inyi njimwangu idedapfo, na olimi loko luulemeri” 11Mndumii-Ruwa kambia, “Nyiu awikie dumbu lya mndu o wandu? Ang'u nyiu ekewika mndu pipi ang'u mpfu madu, ang'u msa awonyi, ang'u kipfupfuṟe, Chi inyi Mndumii-Ruwa? 12Kyasiang'u wulalu, henda, na inyi njechikaa handu hamu na dumbu lyapfo, na ikulosha isho ochihamba.” 13Mose kahamba, “Ee-wo Mndumii, ngakuterewa, duma mndu ungi.” 14Nyashi ya Mndumii-Ruwa ikado kipfa kya Mose, kahamba, “Ngesa! Kuipfo Aroni ichu mano mayo Mlewi? Njiichi ke o neidima ideda necha. Handu hamu na isho ambuya, nao naicha ikuambia; nao ili echikuwona, nechichihio mrimenyi foke. 15Na iyo nochideda nao, na iwika madedo dumbunyi lyake; na inyi njechikaa handu hamu na dumbu lyapfo, na handu hamu na dumbu lyake, na imulosha madedo mochiwuta. 16Nao nechiwa modeda handu hapfo ko wandu, nao nechiwa handu ha dumbu lyapfo, na iyo nochiwa ofano lo Ruwa ipfo koke. 17Na iyo nochiambia ndichi ii owokonyi lopfo, na kui ndichi ii nochiloṟa shichano shilya.”

Mose awuya na Misri

18Naho Mose kahenda kawuya na ko Yetro ndee o mka oke, na immbia, “Ngakuterewa, nnenga momu njihende, njiwuye na ko wana wa wama wako wai Misri; njiwaambuye kokoya na wai na moo mṟasa inu.” Yetro kawia Mose, “Ee, kuhendie na ofoṟo.” 19Mndumii-Ruwa kawia Mose kulya Midiani, “Ee, henda, wuya na Misri, kyamba wandu walya wose waweiṟinjawia moo fo fopfo walemepfa.” 20Kyasia Mose kaira mka oke na wana wake, kawadosia mhongohu fo nzoi, na kawuya tane Misri; na Mose kaduo ndichi iya ya Ruwa owokonyi loke. 21Mndumii-Ruwa kawia Mose, “Mandi ochishika Misri, ambuya nowute ṟiho tsilya tsose oshangunyi lo Farao, tsilya njiletsiwika owokonyi lopfo; kyaindi njechiumiṟa ngoo yo yake, nao echiinenga momu wanduwo wakuhendiepfo. 22Na iyo nowie Farao, Mndumii-Ruwa nahamba adi, Israeli nyi mana oko, mana oko mmbee; 23 Na inyi ngakuwia, ‘Inenga manachu oko momu nakuhendie, kundu naidime injiṟundia, na iyo koleha imnenga momu nakuhendie; kyasia ambuyang'u, inyi njechiwaaha mana opfo, mmbee.’” 24Kikashika mandi wawei njienyi handu helaa, Mndumii-Ruwa kakumbuhana nao akundi imbaaha. 25Nalyo Sipora kawada iho liumu kadina nalyo mana oke, kapaya madende ha Mose kahamba, “Kya lohi iyo nyi ui mndumii o walyi o samu koko inyi.” 26Naho Mndumii-Ruwa kamlekia. Nyi, lyondi mkacho oke alededa, “Ui mndumii o walyi o samu, kipfa kya idino.”

27Mndumii-Ruwa kawia Aroni, “Henda kulya nuka uwonane na Mose.” Nao kahenda, kamkoya fumvunyi lya Ruwa, kamhekia momu. 28Mose kawia Aroni madedoho hose ha Mndumii-Ruwa sa alemduma nahende naho, na ṟihotso tsose alembawasia.

29Mose na Aroni wakasanyia wameku wose na wana wa Waisraeli. 30Aroni kawawia madedoho hose Mndumii-Ruwa alededa na Mose, kawuta na ṟiho tsilya oshangunyi lo wandu. 31Wandu wakaidikia, na lilya waleicho ke Mndumii-Ruwa nachea wana wa Waisraeli, na ke nalewona matuuro hawo, wakaaramtsa mdo yawo wakaadapfuma.

Currently Selected:

IWUKA 4: KIM2

Highlight

Copy