IWUKA 2

Ifeo lya Mose

1Mndu umu o kanyi ko Lewi kakure kaalika mana o Lewi. 2 Mka ulya kakapika kafee mana, nao kekiwona nyi kimana kicha kakiṟika ko meri iṟaṟu. 3Kiheri alewona aidima ikiṟikasepfo, kamsungusia kisanduku kya natsi kakishia kimia, kawikapfo kimana kilya, kakiwika maṟenyi ha mbai ya meda fo Nili. 4Mshiki o kimana kilya kahoṟoka haleshe nawone kindo kechimmbutikia. 5Nahong'u mana o kika o Farao kasoka, nasambe kulya madenyi, arianyi na shisinga shake wakachumia mbai ya meda; nao kawona kisanduku kilya maṟenyi, kaduma kisinga kyake nahende ikiende. 6Kakipfunguo, kawonapfo kimana, ambuya, mana ulya naifihiṟa. Nahong'u kamsaṟia, kahamba, “Ichu nyi umu o wana wa Kiebri.” 7Kyasia, mshiki o mana ulya kawia mana o Farao, “Ngesa! Njihende ilaha momlela kiidi kya waka wa Kiebri, nache na kopfo nakuonzie kimanaki?” 8Mana o kika o Farao kambia, “Ee! Henda.” Mana ulya okika kahenda kalaha mae o kimana kilya. 9Mana o Farao kambia, “Duo manachu, njikanyia imwonza, na inyi njechikuinenga wueri wopfo.” Mndu mka ulya kaduo kimana kilya, kakionza. 10 Mana ulya kang'ana, mae kamwende na ko mana o kika o Farao, kawa mana oke. Kamdumbuya rina lyake nyi Mose, kahamba, “Nyi ili alewuto mṟingenyi.”

Mose adichiya orukenyi lo Wamedi

11 Nalyo mafiri halya, Mose kekiwa mndu ashitsie, kakure nahende ko wana wa mae, Waebri, kawona maṟio hawo. Kawona Mmisri kechikapa Mwebri, umu o wana wa mae. 12Kyasia, kaambuya ipfo na ipfo, nao kekiwona ke kwuipfopfo, kakapa Mmisri ulya kambaha kamṟika. 13Kakure ili lya ngama, ambuya, wandu wawi wa Kiebri waikapana. Kawia ulya aiwonyia odoye, “Nki ili uikapa odoo?” 14Ulya kahamba, “Nyiu akuwikie nowe mnene odu, na mletsi odu? Ngesa! Nokundi injiwaha inyi chandu kulewaaha Mmisri ulya?” Mose kaowuo, kahamba, “Ate! Mbonyitsi tsilemanyika wai?” 15 Nahong'u Farao kekimanya mbonyitsi, kakusaṟa iwaaha Mose; kyaindi Mose kadicha ashangunyi lo Farao, kakaa orukenyi lo Wamedi, kadamia kufui na ṟungu lya mṟinga. 16Kyasia, mkohanyi o Wamedi nawewode wana wa waka mfungade, nawo wakacha idahia mṟinga, wakaichuṟa nungu tsa mṟinga, waidime irutsa ipo lya shuma shawo mṟinga. 17Walisi wakacha wakawafuna; kyaindi Mose kahoṟoka katarama wanawo, karutsa ipo lilya mṟinga. 18Wekishika ko ndeawo Reueli, kahamba, “Nkyawa kida ili mowuya mudi owinyi inu?” 19Wakahamba, “Nyi Mmisri umu aluashuo mawokonyi ha walisi-wo, ngoseṟa yaisho, kaludahia mṟinga, karutsa shuma shadu.” 20Ndeawo kawia wana wake, “Nku ai wulalu? Nki ili moda mndu cho? Mlahenyi nache ilya kelya.” 21Mose kaidikia kakaa ko mnducho, nao kainenga Mose mana oke o waka, Sipora nawe mka oke. 22Icho kambonyia mana o womi kamdumbuya rina lyake nyi Gershomu , kipfa nalehamba, “Njilewa mhenu; orukenyi luhenu.”

Kieṟeṟo kya Waisraeli wusingenyi

23Numa ya mafiri halya hafoi mangi ya Misri kapfa; wana wa Waisraeli wakasumukia kipfa kya wusinga wulya; wakafuha, kieṟeṟo kyawo kikashika huye ko Ruwa kipfa kya wusinga wulya. 24 Ruwa kaicho isumukia lyawo, Ruwa kakumbuo mkundano foke alefuwika na Abrahamu na Isaki na Yakobo. 25Ruwa kawona wukiwa wo Waisraeli, kawasaṟia.

Currently Selected:

IWUKA 2: KIM2

Highlight

Copy