Yuunusa 1
1
No Yuunusa doggiri Joomiraaɗo
1Joomiraaɗo haaldi e Yuunusa ɓii Amitay, wi'i ɗum:
2— Ummaa njahaa ngalluure mawnde wi'eteende Niniwe, ƴeewnoɗaa yimɓe wonɓe ley mayre, mbi'a ɗum'en hakkeeji muɓɓen keewii sanne faa njottake yeeso Joomiraaɗo.
3Ammaa Yuunusa ummiii doggiri ngalluure Tarsis faa woɗɗoo Joomiraaɗo. O nanngi laawol o yehi to laanaaji ndiyam ndarotoo ley ngalluure Joffe. Toon o tawi laana ndiyam njahoowa Tarsis. O yoɓani yaade Tarsis, o naatidi e yimɓe wonɓe ɗoon ɓeen faa o woɗɗoo e Joomiraaɗo. 4Ammaa Joomiraaɗo neli henndu semmbiɗindu sanne dow maayo ngoon. Bempeƴƴe mawɗe ngaɗi dow maggo, henndu fiyi ndiyam ɗaam ummini ɗam faa laana kaan ɓadi helude. 5Ndeen dorbotooɓe laana kaan ɓeen fuu kuli, mono fuu ina wulloo alla muuɗum. Ɓe paɗɗi dolle maɓɓe gonɗe nder makka fuu ley maayo faa ɓe ɓuyta teddeefi makka. Tawi le, Yuunusa yehiino fukkii faa ley laana kaan, ina ɗaanii ɗoyngol teddungol. 6Mawɗo laana kaan yehi to Yuunusa wi'i ɗum:
— Gorko a ɗaanii naa? Ummaa ŋaaraa alla maaɗa, yalla o hettindante, o walla en taa kalken. 7Ndeen dorbotooɓe laana kaan ɓeen mbi'onduri:
— En ngaɗa cumnal, ndaaren moy waddani en halkere nde. Ɓe ngaɗi cumnal ngaal, de ngal sappii Yuunusa. 8Ɓe mbi'i mo:
— Miɗen njiɗi kollaa min moy waɗi ko bone oo fuu hewtii min? Hollu min ɗume ngollata? Toy ƴuuruɗaa? Toy woni leydi maaɗa? Ngole woni lenyol maaɗa? 9Yuunusa jaabii ɓe wi'i:
— Wo mi Ibraninkeejo, kulɗo Laamɗo Joomiraaɗo gonɗo dow kammu, taguɗo maayo e leydi. 10Ndeen o fillanii ɓe kabaaru makko. Nde worɓe ɓeen nannoo kabaaru wo Laamɗo o doggata fu, kuli kulol manngol. Ɓe ƴami mo:
— Ko saabii ngaɗirɗaa ni?
11Ɓe ƴami mo katin, ɓe mbi'i:
— Ɗume min kaani waɗude ma faa maayo ngoo deƴƴinanoo min? 12O wi'i ɓe:
— Adee kam paɗɗee nder maggo ndeen ngo deƴƴinantoo on. Miɗo anndi wo saabe am waɗi bempeƴƴe mawɗe ɗeen ummanii on. 13E noon fuu, ɓe keddii iɓe ndorboo laana ndiyam kaan faa ɓe njottoo hunnduko maayo. Ammaa ɓe kunngii, sabo maayo ngoon ina ummanoo ɓe e semmbe sanne. 14Ndelle ɓe ƴeewni daaɗe maɓɓe to Joomiraaɗo, ɓe mbi'i:
— Wayyoo, Joomiraaɗo, miɗen ŋaaree, taa accu min kalka saabe neɗɗo oo! Taa accu ƴiiƴam makko du warta dow ko'e amin, sabo wo aan woni Joomiraaɗo, ngaɗoowo ko weli ɗum. 15Ndeen ɓe kooƴi Yuunusa ɓe paɗɗi ɗum nder maayo ngoon, de ngo deƴƴini siw. 16Caggal ɗuum, dorbotooɓe laana ɓeen kuli Joomiraaɗo sanne. Ɓe cakkani mo kirsamaaji, ɓe ngaɗi mo kunayeeje mawɗe.
Currently Selected:
Yuunusa 1: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
