Amos 9
9
No Israa'iila halkiraa
1Nji'umi Joomiraaɗo na darii ɗakkol sakkirde. O wi'i:
Fiyu hoore bimmbeeje suudu sakkirde ndeen,
faa dammbuɗe mayru ndimmboroo semmbe,
kelaa ɗe dow ko'e tawaaɓe ley toon ɓeen fuu.
Mi wardan heddiiɓe ɓeen e kaafaahi,
fay gooto maɓɓe heɓataa dogga,
kisoowo fuu walaa.
2Fay si naati ley nokku maayɓe,
junngo am ittan ɓe,
si ɓe ƴeenyii dow kammu du,
mi jippinan ɓe.
3Si ɓe cuuɗake dow seɓtoodu waamnde Karmel,
mi filoyto ɓe de mi nannga ɓe,
si ɓe miilii ɓe lallan e gite am,
fay ɓe muti faa ley maayo,
mi yamiran mboddi soppa ɓe toon.
4Si ɓe ɓoɓtaama ɓe njaaraama yeeso wayɓe maɓɓe,
mi yamiran kaafaahi warowa ɓe toon.
Mi wattan hakkillo am e maɓɓe,
wanaa saabe waɗande ɓe ko wooɗi,
ammaa faa mi waɗa ɓe ko boni.
5Joomiraaɗo, Laamɗo Jom Kammu e Leydi oon meeman leydi de ndi dimmboo.
Jooɗiiɓe e mayri fuu ngondan e mettorgal.
Ndi fuu ndi ummorto hono no ndiyam maayo Misira ley ndunngu
de ndi lokkitoroo hono no muuɗum ley ceeɗu noon.
6Laamɗo nyiɓii laamordu muuɗum dow kammu,
o waɗii njaayri na jiima leydi,
imo nodda diyeele maayo
de o sankita ɗe dow leydi.
Innde makko wo Joomiraaɗo.
7Inan ko Joomiraaɗo wi'i:
Onon Israa'iila'en,
yalla wanaa oɗon nga'i hono Etiyopiyankooɓe yeeso am naa?
Yalla mi wurtinaay Israa'iila'en ley leydi Misira
hono no mburtinirmi Filistiyankooɓe ley ndi Kaftor
e Siiriyankooɓe ley ndi Kir noon naa?
8Gite Laamɗo Joomiraaɗo na njiima laamu leydi ngaɗoori hakke ndiin.
Mi halkan ndi, mi waɗan ndi lalla e duuniyaaru.
Ammaa mi halkidintaa ƴuwdi Yaakuuba ndiin fuu.
Noon Joomiraaɗo wi'i.
9Inan mi yamiran lenyol Israa'iila dimmbee hakkunde lenyi adunaaru fuu
hono no njaareendi seɗirtee ni,
tawa hayre fay wootere saamaay e leydi.
10Waɗooɓe hakke hakkunde lenyol am ngool fuu maayran kaafaahi,
Kamɓe wi'ooɓe: «A'aa, masiiba oon ɓattataako min,
o saamataa dow amin» ɓeen.
No Laamɗo iirtinirta Israa'iila
11Nyalaande ndeen, mi umminan hukum Daawda caamunooɗo oon.
Mi sukkan jule makko.
Mi darnitoto kokuuji makko.
Mi nyiɓtorto o hono no o worrunoo noon.
12Ndeen Israa'iila'en keɓtan Edom e leyɗe keddiiɗe
ɗe innde Joomiraaɗo noddanoo dow muɓɓen ɗeen fuu.
Noon Joomiraaɗo tabintinoowo ɗum oon wi'i.
13Inan ko Joomiraaɗo wi'i:
Nyalaaɗe ngarowan nde demoowo rewtata gaɗa taƴoowo,
nde ɓoosoowo inabooje rewtata cankitoowo aawdiri,
nde inaboojam wubbata dow baamle,
nde tile fuu njoolotoo ley inaboojam ɗaam.
14Mi yeccinan Israa'iila'en yaaranooɓe ley leydi mboɗɗundi ɓeen,
ɓe nyiɓtoto galluuje kalkanooɗe de ɓe njooɗoo e majje.
Ɓe aawan gese maɓɓe inabooje de ɓe njara inaboojam,
ɓe ngaɗan sardiŋeeji de ɓe nyaama barke majji.
15Mi teeŋinan ɗaɗi lenyol am ngool e leydi muuɗum,
ɓe ɗoofataake katin e leydi ndi kokkumi ɓe ndiin.
Noon Joomiraaɗo, Laamɗo mooɗon oon wi'i.
Currently Selected:
Amos 9: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
