Amos 8
8
Haala hanndeere heewnde ɓiɓɓe leɗɗe
1Inan ko Laamɗo Joomiraaɗo holli kam: Hanndeere heewnde ɓiɓɓe leɗɗe ɓennduɗe. 2O wi'i:
— Ɗume nji'uɗaa Amos?
Njaabiimi o mbiimi:
— Hanndeere heewnde ɓiɓɓe leɗɗe ɓennduɗe.
Ndeen Joomiraaɗo wi'i kam:
Timmoode yottanake Israa'iila.
Lenyol am ngool ɓenndii.
Mi accataa ngol katin.
3Nyannde ndeen jimi laamordu mbaylitorto uumaali.
Noon Laamɗo Joomiraaɗo wi'i.
Ɓalli maayɓe heewɓe paɗɗete nokkuuje fuu!
Ngaɗee siw!
4Kettindee haala kaa, onon torrooɓe talkaaɓe.
Nanee, onon ittooɓe yonkiiji lokkaaɓe ley leydi.
5Oɗon mbi'a:
Faa ndeye iidi darorɗe lewru oon faltotoo,
faa keɓen connen alkama meeɗen!
Faa ndeye nyalaande fowteteende ndeen faltotoo,
faa keɓen omten beembe meeɗen!
En ɓuytan taasaaje meeɗen ponndirɗe,
en ɓeydan cogguuji sonnoore meeɗen,
en oonyan ponndirɗe faa njamboɗen.
6Ndeen en coodiran talkaaɓe e buuɗi cardi.
Coggu talkaajo gooto ɓuraay buuɗi ɓornannde paɗe.
En connan fay nyaande alkama meeɗen.
7Joomiraaɗo mo Yaakuuba mantortoo oon hunorake innde muuɗum wi'ii:
Mi yeggitataa huunde fuu ko ɓe ngaɗi faa abada.
8Yalla ɗum saabantaako leydi dimmbaade,
de yimɓe mayri mbulla yonkiiji muɓɓen naa?
Leydi ndiin fuu ɓantortoo hono maayo Misira nder ndunngu
de lokkitoo hono maggo ley keeɗu.
No nyalaande Joomiraaɗo ndeen laatortoo mettorgal
9Laamɗo Joomiraaɗo wi'i:
Nyannde ndeen, mi waɗan naange saama hakkunde nyalooma.
Nimre huuran adunaaru hakkunde naange.
10Mi wattitiran hiirooji mooɗon e nyalaaɗe bojji,
mi waɗan jimi mooɗon fuu mbaylitoroo bullaali cattuɗi.
Mi waɗan taadoɗon bootooji
de ko'e mooɗon fuu pemmbee.
Mi wattan leydi ndiin fuu ley mettorgal
hono maayraaɗo ɓiyum gooto mo woodunoo,
ɗum fuu ɗum timmiran hono nyalaande mettorgal.
11Laamɗo Joomiraaɗo wi'i:
Nyalaaɗe ngarowan, ɗe neldammi rafo ley leydi ndiin.
Yimɓe ndafete de wanaa saabe nyaamdu,
ɗomɗete du, de wanaa saabe ndiyam.
Ammaa wo rafo e ɗomka saabe nanude konngol Joomiraaɗo.
12Ndeen ɓe njiiloto hakkunde maayooji,
ɓe njaha gilla soɓɓirre faa lettugal.
Nokkuuje fuu, ɓe piloto nanude konngol Joomiraaɗo.
Ammaa ɓe keɓataa nanude ngol.
13Nyalaande ndeen, surbaaɓe ŋarɗuɓe e jokolɓe fuu pekkoran saabe ɗomka.
14Hunortooɓe tooru semtiniindu wonndu Samariya
na mbi'a: «E inde alla maaɗa, aan Dan!»
«Saabe teddeengal maaɗa aan Beerseba!»
ɓeen fuu caaman de ummitataako faa abada.
Currently Selected:
Amos 8: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
