Amos 7
7
Ko Laamɗo holli Amos
Holleede baɓɓatti
1Inan ko Laamɗo Joomiraaɗo holli kam: Imo wurtinannoo ornde baɓɓatti wakkati huɗo heso fuɗtannoo gaɗa ko kaananke wa'aantee koon. 2Wakkati baɓɓatti ɗiin timminannoo huɗo leydi ndiin mbiimi:
— Laamɗo Joomiraaɗo, miɗo ŋaare njaafoɗaa. Noy Yaakuuba waawiri heddaade na darii dow? Kanko lokkaajo oo!
3Joomiraaɗo, mimsiti de wi'i:
— Ɗuum waɗataa.
Holleede yiite
4Inan ko Laamɗo Joomiraaɗo holli kam: Imo gooynannoo ko o hiitorto yiite. Yiite ngeen hoortinii diyeele mawɗe de nyaami gese leydi Israa'iila. 5Ndeen mbiimi:
— Laamɗo Joomiraaɗo, miɗo ŋaare, ndarnaa ɗum! Noy Yaakuuba waawiri heddaade na darii dow? Kanko lokkaajo oo!
6Joomiraaɗo, mimsiti de wi'i:
— Ɗuum waɗataa.
Holleede njamndi teddundi
7Inan ko o holli kam: Joomiraaɗo na darinoo ɗakkol kokuwol dartiingol, imo tiigii ɓoggol ponndirgol e junngo makko. 8Ndeen o wi'i kam:
— Ɗume nji'ataa, Amos?
Njaabiimi o mbiimi:
— Ɓoggol ponndirgol.
Ndeen Joomiraaɗo wi'ii kam:
— Mi wattan ponndirgol ngool ley Israa'iila, lenyol am ngool faa mi fonndira dartaare muuɗum, sabo ley ko warata mi accataa faa'e faltoo ɓolum.
9Nokkuuje Isiyaaka cakkirɗe kalkete.
Nokkuuje Israa'iila ceniiɗe laatoto bille.
Mi ukkorto suudu Yerobo'am e kaafaahi.
No Amos riiwiraa Baytila
10Ndeen Amasiya almaami wuro Baytila neli Yerobo'am, kaananke Israa'iila wi'ee:
— Amos na wondi anniya umminande ma fitina hakkunde suudu Israa'iila. Yimɓe leydi ndiin mbaawaa heddaade na nana haalaaji makko ɗiin. 11Inan ko Amos oon wi'i:
«Yerobo'am wardete kaafaahi,
Israa'iila'en nanngete njaaree leydi mboɗɗundi.»
12Ndeen Amasiya wi'i Amos:
— Aan ji'oowo oon, dillu ɗoo de njaha leydi Yahuuda. Toon aɗa waawi heɓirde nyaamdu e annabaaku maaɗa. 13Ammaa taa hedda aɗa waɗa annabaaku ley Baytila sabo wo suudu kaananke seniindu. Wooɗi du wo nokkuure Israa'iila'en seniinde.
14Amos jaabii Amasiya wi'i:
— Miin mi wanaa annabaajo, mi wanaa ɓiyum. Miin wo mi duroowo na'i, mi demoowo leɗɗe ƴibbe. 15Ammaa Joomiraaɗo hooƴii kam gaɗa coggal na'i de wi'ii kam: «Yahu kaaldiraa yimɓe am Israa'iila'en ɓeen e annabaaku.» 16Ndelle joonin oo, kettinoɗaa ko Joomiraaɗo wi'i, aan biiɗo:
«Taa haaldu e annabaaku ley Israa'iila,
taa mbi'aa ko boni dow suudu Isiyaaka.»
17Saabe ɗuum de inan ko Joomiraaɗo wi'i:
«Deeka laatoto woykuuru ley galluure.
Ɓiɓɓe maaɗa worɓe e rewɓe mbardete kaafaahi.
Nokkuuje maaɗa ponndirte ɓoggol de njeɗondiree.
Aan e hoore maaɗa a maayowan ley leydi heeferɓe,
de Israa'iila'en nanngee njaaree faa leydi mboɗɗundi.»
Currently Selected:
Amos 7: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
