Fuɗɗoode 39

1Yuusufi yaaraa Misira. Nde o yaaranoo toon fu, Misiranke bi'eteeɗo Potifaar, mawɗo sordaasiiɓe Fira'awna, soodi mo e juuɗe Ismaa'iilankooɓe wadduɓe mo ɓeen. 2Joomiraaɗo ina wondi e Yuusufi, huunde fuu na gasana ɗum. O jooɗii ley ɓaade joomiiko Misiranke oon. 3Oon taykii, yi'i Joomiraaɗo ina wondi e makko. Ko wattaa e junngo makko fuu, Joomiraaɗo ina barkina ɗum. 4Yuusufi heɓi hoolaare yeeso joomum oon. Oon ɓattini mo e muuɗum, waɗi o kayboowo ɓaade muuɗum e jawdi muuɗum fuu. 5Nde Yuusufi waɗanoo kayboowo jawdi ndiin fu, Joomiraaɗo barkini ɓaade Misiranke oon saabe muuɗum. Barke oon heddii dow jawdi makko, dow wuro makko e gese makko fuu. 6Ndelle ko o jogii fuu, o halfini ɗum Yuusufi. Walaa fuu ko o ndaaranta sanaa ko o nyaamata tan.

Tawi le Yuusufi wo jom ŋari, belɗo ndaarude.

7Nde ɓooynoo seeɗa fu, dee joomiiko oon taykii ŋari makko de wi'i o:

— War, pukkodoɗen.

8Yuusufi salii, wi'i dee joomum oon:

— Ndaar, jooman ɓattinii kam hoore muuɗum, o accii huunde fuu ko woni e ɓaade nde e juuɗe am. 9O ɓuraa kam teddeengal ley ɓaade nde. Walaa fuu ko o haɗi kam ley mayre, sanaa aan taan, sabo wo a jom suudu makko. Ndelle noy ngaɗiranmi bonanda mawɗo o, mi lutta Laamɗo?

10Nyannde fuu debbo oon ina haalda e makko heɓa o fukkodoo e muuɗum, ammaa Yuusufi jaɓaay fay wondude e makko ley nokku gooto. 11Nyannde gomma Yuusufi naati ley suudu faa golla golleeji muuɗum, tawi fay gooto walaano toon.

12Ndeen, debbo oon nanngi saayo makko, wi'i mo:

— Fukkoda e am!

Yuusufi yoppidi mo e saayo ngoon de doggiri yaasin.

13Nde o yi'unoo Yuusufi yoppidii mo e saayo ngoon de doggiri yaasin fu, 14o noddi gollooɓe ɓaade ndeen, o wi'i ɗum'en:

— Ndaaree! En ngaddanaama Ibraninkoowel faa fijira en. O warii faa o fukkodoo e am, de toownumi daande am, kalɓumi. 15Nde o nannoo ƴeewniimi, kalɓumi fu, o yoppi saayo makko ɗakkol am de o doggiri yaasin.

16O fukkini saayo Yuusufi ngoon ɗakkol makko faa goriiko warti. 17O haalani ɗum haala kaan, o wi'i:

— Maccuɗo Ibraninke mo ngaddanɗaa min oon, warii to am faa semtina kam. 18Nde ƴeewninoomi, mbullumi fu, o yoppi saayo makko ɗakkol am de o doggiri yaasin.

19Nde joomiiko oon nannoo deekum na wi'a «Inan ko maccuɗo maa oon waɗi kam» ndeen, ɓerni sanne. 20O waɗi Yuusufi nanngaa, wattaa ley kasu to kasunkooɓe kaananke ngoni toon.

Yuusufi ley kasu

Wo noon Yuusufi kasiraa 21ammaa Joomiraaɗo wondi e makko, waɗani o moƴƴere. O waɗi hooreejo kasu oon du yiɗi Yuusufi, laatanii ɗum moƴƴuɗo. 22Oon halfini kasunkooɓe ɓeen fuu Yuusufi. Huunde fuu ko golletee toon wo kam gollinta. 23Hooreejo kasu oon ndaarantaa fay huunde e ko Yuusufi halfinaa ɗuum, sabo Joomiraaɗo ina wondi e Yuusufi. Ko o anniyii fuu, Joomiraaɗo na gayna ɗum.

Currently Selected:

Fuɗɗoode 39: FBF

Highlight

Copy