Fuɗɗoode 40

No Yuusufi fiirtiri koyɗi kasunkooɓe ɗiɗo

1Caggal ɗuum, gollanooɓe Fira'awna ɗiɗo lutti de ɗuum mettini ɓernde muuɗum. Gooto wo mawɗo hokkooɓe njaram, gooto du wo mawɗo defanooɓe mo. 2Fira'awna ɓernani battaa'en muuɗum ɗiɗo ɓeen, kokkoowo njaram e kokkoowo nyaamdu oon. 3O yamiri ɓe uddee ley suudu hooreejo kasu, to Yuusufi kasaa toon. 4Hooreejo kasu oon halfini ɓe e juuɗe Yuusufi faa reena ɓe. Battaa'en ɓeen ɓooyii e kasu seeɗa.

Haala koyɗi battaa'en

5Jemma gomma gollooɓe kaananke Misira ɗum woni kokkoowo njaram e defoowo neema koyɗi ley kasu toon. Mono fuu e koyɗol muuɗum. Koyɗol fuu e maanaa muuɗum. 6Nde weetunoo fu, Yuusufi wari to maɓɓe, tawi iɓe ɓalinii.

7O ƴami ɓe wi'i:

— Ɗume metti on hannden?

8Ɓe njaabii mo, ɓe mbi'i:

— Min koyɗii koyɗi de fay gooto waawaa fiirtude ɗi.

Ndeen Yuusufi wi'i ɓe:

— Yalla wanaa Laamɗo woni piirtoowo koyɗi naa? Kaalanee kam ɗi!

9-10Mawɗo hokkooɓe njaram oon haalani Yuusufi koyɗol muuɗum wi'i:

— Mi hoyɗii inaboohi ki liccoy tatoy ina darii yeeso am. Ki waɗi piindi de bukki ɗiin ɓenndi. 11Miɗo jogii yardude Fira'awna. Kooƴumi bukki inabooje ɗeen, ɓoosumi ɗi ley yardude Fira'awna ndeen, ngattumi nde e juuɗe makko.

12Yuusufi wi'i mo:

— Inan ko koyɗol ma ngool hollata: Liccoy tatoy koy wo balɗe tati. 13Ley balɗe tati garooje ɗee, Fira'awna ɓantete. O soƴƴinte nokku maa, de kokkaa o yardude e juuɗe makko hono no mboowrunoɗaa noon. 14Ammaa miɗo ŋaare, nde keɓtoyɗaa hoore maaɗa fu, miccoɗaa miɗo wondunoo e maaɗa, ngaɗanaa kam moƴƴere, kaaldaa e Fira'awna heɓa mi ƴuwa e nokku oo. 15Si goonga, wo mi gaddiraaɗo doole gilla leydi Ibraninkooɓe, wooɗi fay e leydi ndi du, walaa ko ngaɗumi ko hewti mi wattee ley kasu.

16Nde mawɗo defooɓe oon yi'unoo Yuusufi fiirtii koyɗol ngool, wooɗi maanaa maggol na wooɗi fu, wi'i:

— Miin du, mi hoyɗii. Ley koyɗol ngol nji'umi miɗo ronndii kandeeje tati kebbinaaɗe buuru. 17Sii nyaamduuji keewɗi ɗi Fira'awna nyaamata fuu ina ngoni ley hanndeere dowuure ndeen. De pooli ina coppa nder mayre.

18Yuusufi jaabii o wi'i:

— Inan ko ngol fiirti: Kandeeje tati ɗeen wo balɗe tati. 19Ley balɗe tati Fira'awna senndan hoore maa e daande maa. O jorfete e lekki de pooli coppa teewu maaɗa.

20Nyalaande tataɓerde ndeen ina hawra e nyalaande rimeede Fira'awna. O defani gollooɓe makko ɓeen fuu. O teddini kokkoowo njaram oon e kokkoowo nyaamdu oon hakkunde maɓɓe. 21O soƴƴini mawɗo hokkooɓe njaram oon nokku muuɗum, de fuɗɗiti ina tummba horde njaram e junngo makko katin. 22Ammaa mawɗo hokkooɓe nyaamdu oon kaa, o haɓɓi ɓoggol e daande muuɗum, o ɓili ɗum hono no Yuusufi fiirtirnoo koyɗol mum ngool noon.

23Ammaa kokkoowo njaram oon yeggiti Yuusufi, miccitaaki haalande Fira'awna haala muuɗum.

Currently Selected:

Fuɗɗoode 40: FBF

Highlight

Copy