Fuɗɗoode 14
14
Abram e Kaanankooɓe e Malkisedek
1Ley nyalaaɗe ɗeen, Amrafel kaananke Sinar e Ariyok kaananke Elasaar e Kedar-Layomer kaananke Elam e Tidal kanaanke Goyim 2kaɓdi e Bera kaananke Sodoma e Birsa kaananke Gomoora e Sinabu kaananke Aduma e Semeber kaananke Seboyim e kaananke Bela, ɗum woni Sowar.
3Ɓe fuu ɓe kawritowi naɗɗol Siddim. Kanngol inndirtee maayo Lamɗam. 4Duuɓi 12 ɓe laatorii maccuɓe Kedar-Layomer, ammaa ley hitaande sappo e tataɓerde ndeen, ɓe muurti. 5Ley hitaande sappo e nayaɓerde, Kedar-Layomer e Kaanankooɓe wonduɓe e muuɗum ɓeen ngari njaalii Refayinkooɓe nokku bi'eteeɗo Astarot-Karnayim. Ɓe njaalii Jujinkooɓe ngenndi Ham, tawti Eminkooɓe ley njaayri Kiriyatayim, 6e Horinkooɓe dow waamnde muɓɓen Seyir ndeen faa yottii Eyel-Paran wuro wonngo ɗakkol seeno ngoon. 7Ndeen ɓe ngarti, ɓe oorani En-Mispat, ɗum woni Kaades. Ɓe njaalii leydi Amalekinkooɓe fuu, tawti Amorinkooɓe jooɗinooɓe Hasason-Tamar.
8Kaananke Sodoma oon yaltidi e kaanankooɓe Gomoora e Aduma e Seboyim e Bela, ɗum woni Sowar. Ɓe cegilanii konu ley naɗɗol Siddim. 9Ɓe kaɓdi e Kedar-Layomer kaananke Elam, e Tidal kanaanke Goyim, e Amrafel kaananke Sinar, e Ariyok kaananke Elasaar. Kaanankooɓe nayo na kaɓda e kaanankooɓe njoyo. 10Wakkati oon tawi naɗɗol Siddim ngool ina heewi loopal takkoowal hono taari. Nde kaanankooɓe Sodoma e Gomoora ndoggannoo ndeen caami ley loope ɗeen de heddiiɓe ndoggiri waamnde. 11Kaanankooɓe nayo ɓeen kooƴi jawdi Sodoma e Gomoora fuu. Ɓe adi neema e ko ɓeen ngoodunoo fuu, ɓe ndillidi. 12Ɓe nanngi Luudu, ɓii sakiike Abram, ɓe kooƴi jawdi muuɗum fuu ɓe ndillidi. Ley Sodoma Luudu oon jooɗinoo.
13Woodii dogguɗo daɗi de haalanowi ɗum Abram Ibraninke oon. Ndeen tawi Abram ina hoɗi ley leɗɗe Amorinke bi'eteeɗo Mamre. Oon wo sakiike Eskol e Aner. Aadi ina wonnoo hakkunde maɓɓe e Abram. 14Nde Abram nanunoo sakiike muuɗum oon nanngaama ndeen, ummodii e maccuɓe muuɗum waawuɓe wolde, rimaaɓe ley ɓaade muuɗum, worɓe 318. O taayniti kaanankooɓe nayo ɓeen faa Dan. 15O fecci yimɓe makko ɓeen, de ɓe kippii kaanankooɓe ɓeen ley jemma. O riiwi ɓe, o jokki ɓe faa Hooba, soɓɓirre Damas. 16O teeti jawdi ndiin fuu, o wartiri Luudu sakiike makko e jawdi muuɗum, e rewɓe e nannganooɓe heddiiɓe.
17Nde Abram jaaloynoo Kedar-Layomer e kaanankooɓe wonduɓe e muuɗum ɓeen ley naɗɗol Saawe, ɗum woni naɗɗol bi'eteengol naɗɗol Kaananke ndeen, kaananke Sodoma yalti jaɓɓii o.
18 Malkisedek kaananke Salaam wooɗi du almaami Laamɗo Toowɗo waddani o buuru e inaboojam.
19O barkini Abram, o wi'i:
— Laamɗo Toowɗo taguɗo kammu e leydi,
barkin Abram.
20Jettooje ngoodanii Laamɗo Toowɗo
gattuɗo wayɓe maaɗa e junngo maa.
Abram hokki mo sappoɓerde e ley huunde fuu ko jogii.
21Kaananke Sodoma oon haaldi e Abram, wi'i:
— Hokkam tagaaɓe de njogoɗaa jawdi ndiin.
22Abram jaabii mo, wi'i:
— Mi ɓantii junngo am mi hunorake Joomiraaɗo, Laamɗo Toowɗo, taguɗo kammu e leydi, 23mi hooƴantaa ma fay huunde, fay gaarawol naa ɓoggol paɗe maa, sakko mbi'aa aan waɗi Abram laatii jom jawdi. 24Mi hooƴataa fay huunde si wanaa ko yimɓe am ɓeen nyaami e ngeɗu yaadooɓe e am. Ɓeen ngoni Aner e Eskol e Mamre, accaa ɓeen kaa kooƴa ngeɗu muɓɓen.
Currently Selected:
Fuɗɗoode 14: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
