Fuɗɗoode 15
15
No Laamɗo waɗiri amaana hakkunde muuɗum e Abram
1Caggal ɗuum, konngol Joomiraaɗo wari e Abram, wi'i:
— Taa hulu Abram! Miin woni wawaade maaɗa, mbarjaari maa mawnan sanne.
2Abram jaabii, wi'i:
— Yaa Laamɗo Joomiraaɗo, ɗume kaajaɗaa hokkude kam? Inani kam, mi walaa ɓiɗɗo. Donoowo suudu am wo Eliyeser jeyaaɗo Damas.
3Abram ɓeydi, wi'i:
— A hokkaay kam ƴuwdi. A yi'i, janano bammbaaɗo e suudu am oon ronata kam.
4Ndeen konngol Joomiraaɗo wari e makko, wi'i:
— A'aa, wanaa oon ronete. Donoowo ma oon e maaɗa jaati yaltata.
5Joomiraaɗo wurtini mo yaasin, wi'i:
— Ndaar kammu, de limaa koode si aɗa waawi.
O ɓeydi, o wi'i:
— Noon ƴuwdi maaɗa ɗuuɗirta.
6Abram goonɗini Joomiraaɗo, de saabe ɗuum Laamɗo ndaardi o wo o ponnditiiɗo.
7Joomiraaɗo haaldi e makko, wi'i:
— Miin woni Joomiraaɗo jaltinɗo ma wuro Uur, leydi Kaldiya faa hokke leydi ndii, ndonaa ndi.
8Abram ƴami o, wi'i:
— Laamɗo Joomiraaɗo, maande ndeye annditirammi mi ronan ndi?
9Laamɗo jaabii, wi'i:
— Waddanam wiige tatiiwe e mbeewa nga duuɓi tati e njawdiri tatiiri e nyaabal e wuugaandu.
10Abram hooƴi daabaaji ɗiin fuu, seeli ɗi hakkunde. O huccunduri pecce ɗeen ammaa pooli ɗiin kaa, o feccaay ɗum'en. 11Jigaaje njippii dow kujje kirsaaɗe ɗeen ammaa Abram riiwi ɗe.
12Nde naange yanunoo fu, ɗoyngol teddungol nanngi Abram. Nimre mawnde suddi o, o huli kulol manngol. 13Joomiraaɗo haaldi e Abram, wi'i:
— Paamaa ƴuwdi maa ndiin laatoyto yananɓe ley leydi njananndi. Ɓe laatoyto maccuɓe ley leydi ndiin, ɓe torriree duuɓi 400. 14Ammaa mi jukkoyto lenyol ngol ɓe laatanii maccuɓe ngool de caggal ɗuum, ɓe njaltida e jawdi ɗuundi. 15Aan kaa caggal naywaaku maaɗa mbelngu, a mooɓete, njaha e jam to maamiraaɓe maaɗa. 16Ley jamaanu nayaɓo, ƴuwdi maa ndiin wartan ɗo, sabo etorgal hakkeeji Amorinkooɓe hiɓɓaay tafon sakko mi jukkoo ɗum'en.
17Wakkati naange yanunoo de nimre mawnde waɗi ndeen, duɗal cuurtoowal e doccal peƴƴiti hakkunde daabaaji ceelaaɗi ɗiin. 18Nyannde ndeen, Joomiraaɗo waddi amaana e Abram, wi'i ɗum:
— Wo ƴuwdi maaɗa kokkammi leydi ndii, gilla maayo Misira faa yottoo Efrat, maayo manngo ngoon. 19Ɗum woni leydi Keniyankooɓe e Kenijiyankooɓe e Kadaminkooɓe 20e Hittiyankooɓe e Perisinkooɓe e Refayinkooɓe 21e Amorinkooɓe e Kanaaninkooɓe e Girgasinkooɓe e Yebusinkooɓe.
Currently Selected:
Fuɗɗoode 15: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
