Fuɗɗoode 13
13
1Abram dilli Misira, hoɗowi horɗoore leydi Kanaana, kam e jom suudu muuɗum e ko jeyi fuu. Luudu ina wondi e makko.
No Abram e Luudu ceediri
2Abram na woodunoo jawdi sanne. Imo jogii daabaaji e cardi e kaŋŋe faa heewi. 3O waɗi egga-hoɗa gilla leydi horɗoore faa Baytila, to hukum makko wonnoo arande toon. Ɗum woni hakkunde Baytila e Ayi 4to o nyiɓunoo sakkirde arande toon de o du'orii innde Joomiraaɗo.
5Luudu, jaadoowo e makko oon du, ina joginoo daabaaji mawɗi e pamari e hukumuuji. 6No jawdi maɓɓe foti heewude de nokkuure ndeen wari heƴaay ko ɓe njooɗodoo. 7Hamre waɗi hakkunde durooɓe Abram e durooɓe Luudu. Tawi wakkati oon Kanaaninkooɓe e Perisinkooɓe njooɗinoo ley leydi ndiin. 8Abram haaldi e Luudu, wi'i ɗum:
— Taa hamre waɗa hakkunde meeɗen, taa durooɓe maa e durooɓe am du kaɓa, sabo en sakiraaɓe. 9Inan leydi ndi fuu yeeso maaɗa. En ceeda. Si a rewii faro nano, miin mi rewan faro nyaamo. Si a rewii faro nyaamo du, mi rewan faro nano.
10Luudu ɓanti gite muuɗum ndaari njaayri Urdun yi'i no feewiri hono ngesa leɗɗe Joomiraaɗo, hono leydi Misira heedde Sowar fadde Joomiraaɗo e halkude gure Sodoma e Gomoora. 11Luudu suɓii njaayri Urdun ndiin fuu, faro lettugal toon. Nii ɓe ceediri. 12Abram heddii ley leydi Kanaana, de Luudu du hoɗowii ley gure mawɗe gonɗe e njaayri ndiin. O tonti hukumuuji makko faa hewti Sodoma. 13Ammaa yimɓe Sodoma wo bonɓe, waɗooɓe hakkeeji bonɗi yeeso Joomiraaɗo.
14Gaɗa ko Luudu seedi e Abram ɗuum, Joomiraaɗo haaldi e Abram, wi'i ɗum:
— Ɓantu gite maa, ndaaraa gilla nokku ɗo ngonɗaa ɗoon faa yaade soɓɓirre e horɗoore e lettugal e gorgal. 15Leydi ndi nji'ataa ndiin fuu, wo aan e ƴuwdi maaɗa kokkammi ndi faa abada. 16Mi waɗan ƴuwdi maa ɗuuɗa faa fay gooto waawataa limude ndi. Si njaareendi na waawi limeede fu, ƴuwdi maa ndiin du waawete limeede. 17Umma, njiiltoɗaa e leydi ndiin, ndaaraa njuuteefi mayri e njaajeefi mayri sabo wo aan kokkammi ndi.
18Abram eggi, darnoyi hukum muuɗum ley leɗɗe mawɗe ɗe Mamre, ley Heberon. Toon o nyiɓani Joomiraaɗo sakkirde.
Currently Selected:
Fuɗɗoode 13: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
