Tindinoowo 12
12
Haala soƴƴagol neɗɗo to Laamɗo
1Miccitoɗaa Taguɗo maa ley njokollaaku maa,
gilla nyalaaɗe tiiɗuɗe ɗeen ngaraay,
wooɗi du gilla kitaale ɗe mbi'ataa
a walaa seyo e muɓɓen ɗeen ɓadaaki,
2gilla naange e jayngol e leelewal e koode niɓɓanaay ma,
gilla duule ngartaay caggal ƴuwoonde de ɓeydane nimre,
3nyannde doomooɓe suudu maa ndiwnata,
worɓe maa semmbinɗinɓe du turoo,
garsooɓe maa seeɗa ɓeen cela garsude,
yuurnotooɓe feneetere du kunngoo yi'ude#12:3 Doomooɓe suudu maa ɗo na waawi maandinde juuɗe maa, worɓe semmbinɗinɓe ɓeen du balaaje maa, garsooɓe ɓeen hono nyiiƴe maa, ƴuurnotooɓe feneetere ɓeen du gite maa.,
4wakkati mo gampuuje ɗakkiiɗe e laawol ommbaa
de duko wowru leeƴi,
wakkati mo sawtu pooli findinta ɗaaniiɓe,
de daaɗe yimooɓe du pamɗiti,
5wakkati mo neɗɗo hulata to toowi,
hula hawrude e masiiba dow laawol,
wakkati mo lekki findata pinndi ndaneeri far,
e nde mbaɓɓattu du teddata,
ko welnata fuu maatataake.
Sabo ndeen ɓii-Aadama fonndii suudu tabitooru
de woyooɓe du na njiiltoo dow laawol na mboya.
6Ayyoo, miccitoɗaa taguɗo maa gilla callalel cardi taƴaay,
kaakol kaŋŋe du helaay, loonde mornyitaaki to ƴoogetee,
ɓoggol cawgal du taƴaay ley ɓunndu,
7sollaare yeccaaki e leydi to ƴuurunoo,
yonki du soƴƴaaki to Laamɗo kokkuɗo ki oon.
8Ɓolum e ɓolum! Wo ɓolum tan!
Tindinoowo wi'i: «Ɗum fuu wo ɗum ɓolum!»
Timmoode haala
9Tindinoowo o wo jom hakkillo, de wanaa ɗuum tan, o jannginii yimɓe anndal makko, imo eta banndi, imo hiinya ɗi, imo fonndita ɗi faa heewi. 10Imo filoo konngi goongaaji belɗi nanude, koolniiɗi binndaaɗi no fonnditorii.
11Konngi hakkilante'en na nanndi e cabbi doolɗirɗi,
wooɗi hawrundurɓe anndal du na nanndi e jamɗe tontaaɗe faa wooɗi.
Ɗi fuu ɗi ƴuuri e duroowo gooto.
12Ɓiyam, kakkilaa taa ɓeydaa fay gootum dow majji.
Winndude dewte ɗuuɗɗe timmataa,
wooɗi du si jannde heewii fu tampinan ɓanndu.
13Jonkaa ɗum fuu ɗum nanaama,
inan timmoode haala ka:
Kulaa Laamɗo de kaybaa jamirooje muuɗum,
sabo ɗuum woni fuu ko neɗɗo haani waɗude.
14Sabo Laamɗo saroto gollal fuu
fay cuuɗiingal,
yalla wo lobbal naa bonngal.
Currently Selected:
Tindinoowo 12: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
