Amos 1
1
1Inan konngol ngol Amos, gooto e durooɓe ley wuro Tekowa haali dow Israa'iila. O hollaama ɗum wakkati laamu Ujjiya, kaananke Yahuuda e laamu Yerobo'am ɓii Yehowas, kaananke Israa'iila. Wakkati oon dimmbagol leydi manngol na heddii duuɓi ɗiɗi.
2O wi'i:
Riggaango Joomiraaɗo ƴuurii Siyona,
daande makko felnyii gilla Urusaliima.
Durduɗe durooɓe laatake yurmeende,
seɓtoodu waamnde Karmel yoorii.
No Joomiraaɗo feliri Israa'iila e lenyi piiliiɗi ɗum
Haala Siiriya
3Inan ko Joomiraaɗo wi'i:
Saabe Damas waɗii hakke dow hakke,
de mi fiirtataa ko anniyiimi dow muuɗum ɗuum,
sabo ɓe cokkirii yimɓe Galaad e jamɗe ceeɓuɗe.
4Mi neldan yiite dow suudu Hajayel,
nge nyaama laamordu Ben-Hadad.
5Mi helan leɗɗe pale dammbuɗe Damas,
mi fiɗɗa yimɓe Bikat-Awen,
mi lallina tiigiiɗo sawru laamu Bayti-Eden oon.
Yimɓe Aram nanngete njaaree leydi Kir.
Noon Joomiraaɗo wi'i.
Haala Filistiya
6Inan ko Joomiraaɗo wi'i:
Saabe Gaaja waɗii hakke dow hakke,
de mi fiirtataa ko anniyiimi dow muuɗum ɗuum,
sabo ɓe nanngii lenyol muɓɓol ɓe ngattii e junngo Edom.
7Mi neldan yiite dow kokuwol Gaaja,
nge nyaama laamorɗi muuɗum.
8Mi fiɗɗan jooɗiiɗo dow jooɗorgal laamu Asdod
mi yoppataa Askelon tiigiiɗo sawru laamu oon du.
Mi ummanto yimɓe Ekoron,
de Filistiyankooɓe heddiiɓe fuu kalka.
Noon Laamɗo Joomiraaɗo wi'i.
Haala Tiir
9Inan ko Joomiraaɗo wi'i:
Saabe Tiir waɗii hakke dow hakke,
de mi fiirtataa ko anniyiimi dow muuɗum ɗuum,
sabo ɓe nanngii lenyol muɓɓol ɓe ngattii e junngo Edom,
ɓe njeggitii amaana sakiraagu hakkunde maɓɓe.
10Mi neldan yiite dow kokuuji Tiir,
nge nyaama laamorɗi muuɗum.
Haala Edom
11Inan ko Joomiraaɗo wi'i:
Saabe Edom waɗii hakke dow hakke,
de mi fiirtataa ko anniyiimi dow muuɗum ɗuum,
sabo riiwiri sakiike muuɗum e kaafaahi,
hunngake yurmaade ɗum,
tikkere makko na heddii na seeka,
imo heddodii e tikkere faa abada.
12Mi neldan yiite dow wuro Teman,
nge nyaama laamorɗi Bosora.
Haala Amon
13Inan ko Joomiraaɗo wi'i:
Saabe Amoninkooɓe ngaɗii hakke dow hakke
de mi fiirtataa ko anniyiimi dow muɓɓen ɗuum,
sabo ceekii deedi debereeduuɓe leydi Galaad
faa njaajina leydi muɓɓen.
14Mi neldan yiite dow kokuuji Rabba,
nge nyaama laamorɗi muuɗum,
hakkunde olkooji konu nyannde wolde,
ley kenhenam ƴuwoonde mawnde.
15Kaananke maɓɓe nanngete,
kam e howruuɓe muuɗum njaaree leydi ngonndi.
Noon Joomiraaɗo wi'i.
Currently Selected:
Amos 1: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
