Amos 6
6
Ndeenaagu fewreewu
1Bone woodanii on, onon jooɗiiɓe Siyona e jam,
e onon wuurduɓe hoolaare dow waamnde Samariya,
onon tedduɓe ley lenyol ɓurngol keddiiɗi,
ɓe suudu Israa'iila yowi jikke muuɗum dow muɓɓen ɓeen.
2Njehee wuro Kalne de ndaaron,
njottoɗon faa Hamat, galluure mawnde ndeen,
de njippitoɗon Gat, galluure Filistiyankooɓe ndeen.
Yalla iɗe ɓuri laamuuji mooɗon ɗiɗi ɗiin naa?
Yalla leydi maɓɓe na ɓuri ndi mooɗon manngu?
3Oɗon piloo woɗɗinde nyalaande bonnde ndeen,
de oɗon pooɗa laamu doole.
4Oɗon pukkii dow leese gaɗiraaɗe nyiiƴe nyiibi,
oɗon poortii dow jooɗorɗe ɗigguɗe,
oɗon nyaama jawɗi baggi
e ga'i cuɓaaɗi,
5oɗon njima, oɗon piya kolli.
On ngaɗanii ko'e mooɗon munkaruuji kesi hono Daawda.
6Oɗon njarira inaboojam e kaake mawɗe,
Oɗon mbujoo nebbeele ɓurɗe wooɗude,
ammaa on killaaka e masiiba kewtiiɗo lenyol Yuusufi.
7Wo saabe ɗuum de on laatoto artotooɓe nanngee njaaree faa leydi mboɗɗundi.
Ndeen weltaareeji mon dow jooɗorɗe ɗiin timman.
Haala halkere Samariya
8Laamɗo Joomiraaɗo hunorake innde muuɗum wi'i:
— Inan konngol am, miin Joomiraaɗo Jom Kammu e Leydi:
Miɗo hutii mawninkinaare Yaakuuba.
Miɗo hafii laamorɗi makko.
Mi wattan galluure makko mawnde ndeen
e ko woni e muuɗum fuu ley juuɗe wayɓe makko.
9Fay si worɓe sappo keddii ley suudu wooturu, ɓe fuu ɓe maayan.
10Nde sakiike waraaɓe ɓeen warowi faa wurtina ɓalli muɓɓen ley suudu nduun wulowa yaasin fu, ƴaman keddiiɗo faa lohooji suudu nduun wi'a: «Yalla aɗa heddodii e goɗɗo naa?» De joomum jaaboo wi'a: «A'aa, fay gooto.» Ndeen o wi'a ɗum: «Ngaɗaa siw, sabo wanaa wakkati mo innde Joomiraaɗo noddetee.»
11Sabo Joomiraaɗo na hokka jamirooje.
O yamiran suudu mawndu nduun halkee faa laatoo kelte kelte,
de o waɗa famardu nduun duu pecce pecce.
12Yalla pucci na ndogga dow tunte naa?
Na'i le, na mbargoo dow tefaare naa?
Ndelle saabe ɗume de oɗon mbattitira kiite goongaajo e tooke?
Oɗon loomtina dartaare e ko haaɗi!
13Oɗon ceyoroo teetude wuro Lo-Debar#6:13 Lo-Debar na fiirta «faa'e».
Oɗon mbi'a: Yalla wanaa e semmbe meeɗen teetirɗen wuro Karnayim#6:13 Karnayim na fiirta «luwe ɗiɗi». ngoon naa!
14Wo saabe ɗuum de inan konngol am, miin Joomiraaɗo, Laamɗo Jom Kammu e Leydi:
Mi umminanan on, onon suudu Israa'iila lenyol torroowol on
gilla Lebo-Hamat faa hewta pogowol njaayri Araba.
Currently Selected:
Amos 6: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
