Amos 5
5
Pilee Joomiraaɗo faa mbuuron
1Kettindee jimol maayde ngol jimanammi on ngool, onon Israa'iila'en.
2Israa'iila surbayel saamii,
wooɗi ummitataako katin.
Inan na waalii dow leydi muuɗum
fay gooto ummintaa ɗum.
3Inan ko Laamɗo Joomiraaɗo wi'i:
Galluure yaarannoonde sordaasiiɓe ujunere konu ndeen,
worɓe hemre tan heddodotoo,
Israa'iila jaarannooɗo konunkooɓe hemre oon du,
worɓe sappo tan keddantoo ɗum.
4Inan ko Joomiraaɗo wi'i dow Israa'iila:
Pilee kam faa mbuuron.
5Ammaa taa pilowee kam ley wuro Baytila,
taa njehee sakkirde galluure Gilgal,
taa naatowee faa ley nokkuure Beerseba seniinde ndeen,
sabo Gilgal yaarete leydi njanandi
Baytila du, laatoto winnde.
6Pilee Joomiraaɗo faa mbuuron,
onon ƴuwdi Yuusufi,
taa o laatanoo on hono yiite
de nge nyaama on,
tawa ley Baytila toon fuu walaa baawɗo nyifude nge.
7Oɗon loomtinira dartaare e tooke,
oɗon paɗɗa sariya goonga e leydi.
8Taguɗo Ɗaccuki e Neɗɗooje,
battitiroowo nimre tekkunde e pooyngol fajiri,
gaɗoowo nyalooma niɓɓina laatoo jemma,
noddoowo diyeele maayo de saaka ɗe dow leydi oon:
Innde muuɗum wo Joomiraaɗo.
9Wo o caaminoowo halkere dow jom semmbe
de nde halka galluure semmbinɗinaande.
10Oɗon mbanyi kaaloowo goonga ley sariya,
oɗon kafii kaaliroowo e laaɓal.
11Wooɗi du, saabe oɗon njaaɓa talkaaɓe e leydi,
oɗon njaɓa lampo alkama muɓɓen,
oɗon nyiɓira cuuɗi mooɗon e kaaƴe mawɗe cehaaɗe
ammaa on njooɗataako ley majji.
On aawii gese mooɗon inabooje lobbe
ammaa on njarataa inaboojam majje.
12Sabo miɗo anndi no lutti mooɗon ɗuuɗiri,
no hakkeeji mooɗon poti.
Oɗon torra dartiiɓe,
Oɗon njaɓa ceede oonyiiɓe
de ɗalon talkaaɓe goonga ley cuuɗi sariya.
13Wo saabe ɗuum de wakkatiiji hono ɗii,
jom hakkillo na deƴƴinoo, sabo wakkati oo, wo bonɗo.
14Ndelle tewtee ko wooɗi, taa pilee ko boni, faa mbuuron,
de Joomiraaɗo, Laamɗo Jom Kammu e Leydi wonda e mooɗon
fodde no mbi'oton noon.
15Mbanyee ko boni, njiɗon ko wooɗi,
njinganon dartaare ley cuuɗi mooɗon sariya.
Ndeen na hasii Joomiraaɗo, Laamɗo Jom Kammu e Leydi oon
yurmoto ko heddii e lenyol Yuusufi.
16Saabe ɗuum de inan ko Joomiraaɗo, Laamɗo Jom Kammu e Leydi oon wi'i:
Bullaali nanete nokku fuu.
Dow laabi fuu yimɓe peekoto na mbi'aa:
«En mbonii! en mbonii!»
Remooɓe noddete ngara mbulla,
woyooɓe maayɓe du, ngara mboya.
17Bullaali nanete ley gese inabooje fuu
nyannde pantumi hakkunde mooɗon.
Noon Joomiraaɗo wi'i.
Haala hoolaade kujje ɓole
Nyalaande nimre
18Bone woodana on, onon heɗiiɓe nyalaande Joomiraaɗo ndeen!
Ɗume keɗoriɗon nyalaande Joomiraaɗo ndeen?
Nde laatato nyannde nimre ɓaleere, wanaa nde annoora.
19Nde nanndan e gorko dogguɗo laddeeru
de hawri e huunde ladde ɓurnde bonde.
O hooti ɓaade makko,
o tiigii juuɗe makko e kokuwol,
de mboddi soppi o.
20Yalla nyalaande Joomiraaɗo ndeen wo annoora naa?
Yalla nde wanaa niɓɓunde nde yaynaa naa?
Ayyo, wo nde nyalaande nimre ɓaleere.
Haala iidiiji ɓoli
21Miɗo wanyi iidiiji mooɗon ɗiin, iɗi nyiddinii kam,
Mi yiɗaa nanande kawrite mon ɗeen katin.
22Fay si cakkanɗon kam sadakaaji buleteeɗi
e ɗi conndi fuu,
mi saloto ɗum'en.
Sadakaaji mon dewral e gorri mon payɗi ɗiin fuu,
mi taykataako ɗum'en.
23Ndelle mboɗɗinee kam jimi mooɗon mettuɗi ɗiin.
Mi yiɗaa heddaade na nana olko kolli ɗiin katin.
24Ammaa sariya goonga wubbira hono diyeele.
Dartaare heewira hono gooruwol iloowol ni.
25Israa'iila'en, yalla ley duuɓi 40 ɗi tawaɗon ley ladde yoornde ɗiin,
on ngaɗanii kam sadakaaji maa dokke naa?
26Ndelle on kooƴan tooru Sikkut, kaananke mooɗon,
tawti Kiyun, natal hoodere alla mooɗon,
kujje ɗe ngaɗanɗon ko'e mooɗon ɗeen
27de mi yaara on maccungaaku faa yeeso Damas!
Noon Joomiraaɗo wi'i. Innde makko wo Laamɗo Jom Kammu e Leydi.
Currently Selected:
Amos 5: FBF
Highlight
Share
Copy
Want to have your highlights saved across all your devices? Sign up or sign in
© SIM International 2012, 2022
