Luka 4

Yeshu ukwezekiwa

(Mateo 4:1-11; Mako 1:12-13)

1Yeshu wafumine mu Yondana hinga enzala na Moyo wa Kuyela, pe Moyo wamutwamininine mu libelelengwa, 2wekalile matena makumi anaa hezekiwa kuli Shatana. Ha matena ayo kaliha walile shamina, pe oho matena amanine wayuvwile nzala.

3Shatana wambile kuli Yeshu ngayi, “Ndi uli Mwana Nyambi, tongweza elye limanya ngayi lifutuke linkende.”

4 # Nday 8:3. Ngoboni Yeshu wamukumbwile ngayi, “Kwatikitiwa ngayi, ‘Muntu ku fwanina kuyoya na linkende tuhu wufwako.’ ”

5Niho Shatana amutwalile ha kukankama, ohobene wamumoneshele wene nimwawo wa kaye. 6Shatana wambile kukwendi ngayi, “Nikakupanika eze ngovu nimwazo na wuheti nimwawo, ndaba binapanikiwi kukwami kami nikutwesha kupana nimwendi ou nikushinga. 7Nohobene ndi ukundemesha, nimwabyo bikenga byobe.”

8 # Nday 6:13. Yeshu wakumbwile ngayi, “Kwatikitiwa ngayi, ‘Ukalemesha Nyambi ya Ngula, Nyambi yobe na kumutendela milimo niye tuhu!’ ”

9Niho Shatana atwalile Yeshu ku Yelushalema, wakamwimikile hayilu ha mamaninino a Litala lya Nyambi, pe wambile kukwendi ngayi, “Ndi uli Mwana Nyambi, kilukila hanci. 10#Nyi 91:11-12. Ndaba kwatikitiwa ngayi, ‘Nyambi u ka layelela mangeloyi wendi ngayi baka ku lame shiwahe.’ 11Kwatikitiwa kami ngayi, ‘Baka ku baka na maboko wabo, ku tinisha liwulu lyobe kulituntula ku limanya.’ ”

12 # Nday 6:16. Yeshu wakumbwile ngayi, “Kwatikitiwa ngayi, ‘Hinga wezeka Nyambi ya Ngula, Nyambi yobe.’ ”

13Oho Shatana amanishile kwezeka Yeshu mu zinzila nimwazo, wafumine kukwendi ha shikati shiyo.

Yeshu ukutatika mulimo wendi mu Ngalileya

(Mateo 4:12-17; Mako 1:14-15)

14Niho Yeshu abokele ku Ngalileya na ngovu za Moyo wa Kuyela zekalile mumwendi, mpupo yendi yatumbalalile mu liya litunga nimwalyo. 15Yeshu walongeshele mu mashinangonge abo kami bantu nimwabo bamuyemezele.

Yeshu ukukaniwa ku Nazaleta

(Mateo 13:53-58; Mako 6:1-6)

16Wezile ku Nazaleta oku bamulelelele, ngonehe shengile shiheka shendi wenginine mu shinangonge ha Mutena Wakukatala. Wemanine na kulaba byatikitiwa. 17Bamutabikizile libuka lya muluwe Ishaya. Oho afukwilile libuka wawanine aha hatikitiwile ngayi,

18 # Isha 61:1-2. “Moyo wa Nyambi uli hahami,

ndaba unangwabishi mu ku shimikila ncango zaziwahe

ku bakakushepwa.

Unantumu mu kubilika ku shoboloka ku bantampwa

na kutonesha meho a tushishitwa.

19Kushobolola baya banalyatilili na ku shimikila ngayi

shikati shakumakale oho Nyambi ukalamwina bantu bendi.”

20Wafwikile libuka, walitabikizile ku mukakutwaminina, pe wekalile hanci. Bantu nimwabo bekalile mu shinangonge bamuconcomekele. 21Niho ambile kukwabo ngayi, “Mutena walelo eshe shatikitiwile shengakale sha kupwisha mu matu wenu.”

22Nimwabo bamuwahililile na kukomoka mazu amawahe aya ambile. Bambile ngayi, “Kati ou kaliha niye mwana Yoshefwa ndi?”

23Yeshu wambile kukwabo ngayi, “Mwa shikuma mukamba kukwami nguli eye ngayi, ‘Nganga linyongomanishe obe mwine!’ Nanenu mukamba kukwami ngayi, ‘Ebye twayuvwa ngayi wabitenda mu Kapenauma, bitende kami muno mu litunga lyobe.’ ” 24#Yowa 4:44. Yeshu kami wambile ngayi, “Mwa shikuma nikumitongweza ngayi kowa muluwe wa Nyambi ukutambuliwa mu litunga lyendi.

25 # 1Bamy 17:1. “Mwa shikuma nikumitongweza ngayi, kwekalile bamfwile babengi mu Ishalela ha matena a Eliya, oho liyilu lyashinkiwile myaka yihatu na zingonda mutanu na imo kubula kuloka mvula, oho kwekalile kapande kakanene mu litunga nimwalyo. 26#1Bamy 17:8-16. Ngoboni Eliya kaliha watumiwile kwamina ndele ku Zalefwati mu munzi wa Shindoni ku mbuyama wa mfwile. 27#2Bamy 5:1-14. Kami kwekalile bakabimakwa babengi mu Ishalela ha shikati sha muluwe Elisha. Kowa muntu kukwabo wapolele ku wulweli ndele Naamani waku Shiliya.”

28Bantu nimwabo bekalile mu shinangonge oho bayuvwile awa mazu bapilamine. 29Bakatukile, bamufumishile mu munzi, pe bamutwalile hayilu ya shinkanda haya hazikiwile munzi wabo, ngayi mwanga bamuyumbile mu linzolongoma. 30Ngoboni wapitile mukati ka likunge, pe wayile.

Mulume wa mayimbwe

(Mako 1:21-28)

31Niho Yeshu ayile ku Kapenauma, mu munzi wa mu Ngalileya. Pe ha Mutena Wakukatala walongeshele bantu. 32#Mat 7:28-29. Bantu nimwabo bakomokele ku longesha kwendi, ndaba wambile na ngovu. 33Mu shinangonge mwekalile mulume wekalile na mayimbwe amabi, wabilikizile na lizu lyalinene ngayi, 34“Haya, ukushinga kututenda bishini, Yeshu waku Nazaleta? Kati unezi mu kutunongesha ndi? Nakulimuku lizina lyobe, unengi wa Kuyela wa Nyambi!”

35Ngoboni Yeshu wakalihilile mayimbwe ngayi, “Mwenenu! Fumenu mumwendi!” Niho mayimbwe amuwishile hanci ku meho wabo afumine mumwendi kwakubula kumulemeka.

36Bantu nimwabo bakomokele, bambile mukati kabo ngayi, “Kati mazu awa anahiti? Ndaba na ngovu na nyala ou mulume ukukalihila mayimbwe naniwo akufuma!” 37Pe mpupo ya Yeshu yatumbalalile ku zimbalila nimwazo za mu litunga liyo.

Yeshu ukunyongomanisha bantu babengi

(Mateo 8:14-17; Mako 1:29-34)

38Yeshu wafumine mu shinangonge, wenginine mu litala lya Shimoni. Haya mukowendi Shimoni wa mbeleki wakolelenga mashikashika, pe batongwezele Yeshu bya kukola kwendi. 39Yeshu wemanine kunkumo ya wulili wendi, wambilile mashikashika ngayi afume. Mashikashika amufumine, hohobene wapindukile, pe wabatendelele byakulya.

40Oho mutena walelelenga, bantu nimwabo bekalile na bakakukola malweli a mishoboshobo babaletele kuli Yeshu, wabakambikile maboko, pe wabanyongomanishile. 41Mayimbwe kami afumine ku bantu babengi, abilikizile ngayi, “Wenga uli Mwana Nyambi!”

Ngoboni Yeshu wakalihilile mayimbwe, kami kaliha wetabilile ngayi ambe, ndaba alimukile ngayi wengile Kilishitu.

Yeshu uku shimikila mu mashinangonge

(Mako 1:35-39)

42Oho kwashile lumenemene Yeshu wafumine mu munzi, pe wayile ku mwanya waninkayendi. Bantu bamushingile, pe oho bamuwanine, bamunyepele ngayi hinga afuma kukwabo. 43Ngoboni wabatongwezele ngayi, “Niku fwanina ku shimikila ncango zaziwahe za Wene wa Nyambi ku minzi yamina kami, ndaba nibyo antuminine Nyambi.”

44Yeshu washimikililenga mu mashinangonge amu Yundeya.

Currently Selected:

Luka 4: LLK

Highlight

Copy