Luka 3

Kushikila kwa Yowano mukakuzubilisha

(Mateo 3:1-12; Mako 1:1-8; Yowano 1:19-28)

1Mu mwaka wawulikumi na mutanu wakulela kwa Nkeshali Timbeliyashi, oho Pontiyashi Pilato engile kalela wa Yundeya na Helonda wengile kalela wa Ngalileya mukonzo wendi Fwilipu wengile kalela wa litunga lya Yituleya na litunga lya Tilakonitishi. Lishaniyashi wengile kalela wa Abilene 2na Anashi na Kayafwashi bengile Bakulwane ba Bakankombela Nimwabo, ha shikati shiyo lizu lya Nyambi lyezile kuli Yowano mwana Zakaliya mu libelelengwa. 3Yowano wapitile mu litunga nimwalyo lyazingulukile Mushinzi wa Yondana washimikilenga ngayi, “Tengulukenu mu mitima, pe muzubilishiwe ngayi Nyambi amiyatile wubi wenu.” 4#Isha 40:3-5. Nehi kwatikitiwile mu libuka lya muluwe Ishaya ngayi,

“Lizu lya mukakubilika mu libelelengwa ngayi,

‘Wahishenu mukwakwa wa Mwene,

ololenu zinzila zendi.

5Tungulungwa nimwato tukabuwiwa,

mapili nimwawo na binkanda bikawululiwa.

Na mikwakwa ya kukontama yikoloka,

na zinzila zazibi zikalembululiwa.

6Bantu nimwabo bakamona kulamwina kwa Nyambi.’ ”

7 # Mat 12:34; 23:33. Niho Yowano ambile ku makunge a bantu baya bezile kukwendi mu kuzubilishiwa ngayi, “Enu bana ba bampili! Yani namishiwululu ngayi mupanze ku wukali ukwiza? 8#Yowa 8:33. Yimenu mikabo yiku monesha ngayi munatenguluku. Hinga mutatika kwamba mukati kenu ngayi, ‘Tuli na tatiyetu Abulahama.’ Haya nikumitongweza ngayi, Nyambi ukutwesha kufutula awa mamanya kwinga bana ba Abulahama. 9#Mat 7:19. Kazembe kanayakiwi ku mipishi ya mitondo, nohobene mutondo nimwawo ukubula kuyima mikabo yayiwahe ukatemiwa na kuyumbiwa mu mundilo.”

10Bantu bepwile Yowano ngayi, “Haya tukenga nahiti?”

11Yowano wakumbwile ngayi, “Ou uli na bikobelo bibili, apanikeko minendi shimo uya nabulu, ou uli na byakulya, atende noho kami.”

12 # Luka 7:29. Bakakutelesha bamo bezile kukwendi mu kuzubilishiwa, bamwipwile ngayi, “Mulongeshi, kati tuku fwanina kwinga nahiti?”

13Wabatongwezele ngayi, “Hinga mutelesha kupitakana ebye bikushingiwa.”

14Banzita nabo bamwipwile ngayi, “Kati tuku fwanina kwinga nahiti?”

Waba kumbwile ngayi, “Hinga mupukula sha muntu, hinga mubangila muntu, wahililenu nanebye mu kutambula.”

15Bantu batatililile na nyumwa, pe nimwabo bacincokele mu mitima yabo hali Yowano ngayi kampe niye Kilishitu. 16Yowano waba kumbwile nimwabo ngayi, “Nikumizubilisha na mema, ngoboni ou ukwiza munyima yami ukumpitakana, ku fwanina ku shobola mishulo ya makatulo wendi nifwako. Niye ukamizubilisha na Moyo wa Kuyela na mundilo. 17Luhebe lwendi lwa kupepesha luli mu liboko ngayi akapepe loto lwendi. Ukabungika loto mu shishete shendi, ngoboni muzungu ukawuhokesha mu mundilo wakubula kuzima!”

18Na zinzila zamina zazingi Yowano washimikilile ncango zaziwahe ku bantu, kami wabatongwezele ngayi batenguluke. 19#Mat 14:3-4; Mako 6:17-18. Ngoboni Yowano wakalihilile Mwene Helonda, ndaba ya kuyeka Helondiyashi mukaza mukonzo wendi na byabibi nimwabyo biya atendele. 20Niho Helonda atendele shuma sha shibi shikuma ha kuyaka Yowano mu tolongo.

Kuzubilishiwa kwa Yeshu

(Mateo 3:13-17; Mako 1:9-11)

21Oho bantu nimwabo bazubilishiwile, Yeshu kami wazubilishiwile. Oho alombelenga, liyilu lya shinkulukile, 22#Shit 22:2; Nyi 2:7; Isha 42:1; Mat 3:17; Mako 1:11; Luka 9:35. na Moyo wa Kuyela washulumukilile hahendi mu shifwekesha sha litela. Pe kwezile lizu lyafumine muyilu ngayi, “Obe Mwanami nahaka, ukungwahililisha shikuma.”

Muhoko wa mazina a lupashi lwa Yeshu

(Mateo 1:1-17)

23Oho Yeshu atatikile mulimo wendi, wekalile na myaka ya kushinga kulingana makumi ahatu. Wengile mwana ngonehe bantu bahanganikile ngayi mwana Yoshefwa, ou wengile mwana Heli, 24mwana Matati, mwana Levi, mwana Meleki, mwana Yananayi, mwana Yoshefwa, 25mwana Matatiya, mwana Amoshi, mwana Nahumi, mwana Eshili, mwana Nangayi, 26mwana Maati, mwana Matatiya, mwana Shimeni, mwana Yosheki, mwana Yonda, 27mwana Yowanani mwana Lesha, mwana Zelumbambelu, mwana Shelatiyele, mwana Neli, 28mwana Meleki, mwana Andi, mwana Koshamu, mwana Elimandame, mwana Ela, 29mwana Yoshuwa, mwana Eliyeza, mwana Yolima, mwana Matati, mwana Levi, 30mwana Shimiyoni, mwana Yunda, mwana Yoshefwa, mwana Yonamu, mwana Eliyakimu, 31mwana Meliya, mwana Menina, mwana Matata, mwana Natani, mwana Ndavita, 32mwana Njeshi, mwana Ombendi, mwana Mbowazi, mwana Shalimoni, mwana Nahishoni, 33mwana Aminandabe, mwana Andimini, mwana Alini, mwana Heziloni, mwana Pelizi, mwana Yunda, 34mwana Yakobo, mwana Ishaki, mwana Abulahama, mwana Tela, mwana Nahole, 35mwana Shelungi, mwana Leu, mwana Pelengi, mwana Emba, mwana Shela, 36mwana Kayinani, mwana Alifwashandi, mwana Shemu, mwana Nowa, mwana Lameki, 37mwana Metushela, mwana Enoki, mwana Yalendi, mwana Mahalale, mwana Kayinani, 38mwana Enoshi, mwana Sheta, mwana Andama, mwana Nyambi.

Currently Selected:

Luka 3: LLK

Highlight

Copy