Luka 5

Yeshu ukwihana bandongesha bakutatika

(Mateo 4:18-22; Mako 1:16-20)

1 # Mat 13:1-2; Mako 3:9-10; 4:1. Mutena wamina, Oho Yeshu emanine ha shibumbo sha Liziba lya Ngeneshaleta, bantu babengi bamubumbililile na kuyuvwa lizu lya Nyambi. 2Wamonene mato abili hinga afuwama mu livwe, ngoboni bakakushashila bafuminemo, bekalile na kuyowesha tunyanzi twabo. 3Yeshu wenginine mu wato wa Shimoni niho amulombele ngayi afuwule shashishe kufuma ku shibumbo. Niho Yeshu ekalile mu wato, pe walongeshele bantu.

4Oho amanishile kwamba, wambile kuli Shimoni ngayi, “Henyenenu ku mema amatali, mumanyike tunyanzi, pe mu kuziha zinci.”

5 # Yowa 21:3. Shimoni wakumbwile ngayi, “Hekulu, tunakabakana wushiku nimwawo, shilolo tuzihe zinci, ngoboni ndaba ya lizu lyobe nikumanyika tunyanzi.” 6#Yowa 21:6. Oho batendele eshe ambile, bazihile zinci zazingi, kami tunyanzi twabo twatatikile kutabuka. 7Niho balabizile baminabo bekalile mu mato amina ngayi beze na ku bayavwa. Bezile, pe benzalishile mato abili na zinci kami ashingile kutewa. 8Oho Shimoni Pita amonene shuma eshe, wawile ku manungo a Yeshu, pe wambile ngayi, “Fuma kukwami, obe Mwene! Nili muntu wamubi!”

9Shimoni na baya bekalile nendi nimwabo bakomokele ndaba ya zinci zazingi bazihile. 10Kami Yakoba na Yowano, bana ba Zebende baya bekalile na Shimoni nanibo kami bakomokele. Yeshu wambile kuli Shimoni ngayi, “Hinga utina, kufuma hano ukenga mukakushashila bantu.”

11Oho baletele mato wabo ku livwe, bashiyile nimwabyo, pe bamukonkele.

Yeshu ukunyongomanisha mulume wa bimakwa

(Mateo 8:1-4; Mako 1:40-45)

12Oho Yeshu ekalile mu munzi wamina, kwezile mulume wakolelenga bimakwa. Oho amonene Yeshu, waliwishilile hanci, pe wamulombele ngayi, “Mwene, ndi ukushinga, ukutwesha kunyongomanisha.”

13Yeshu wolwele liboko lyendi, wamukwatile, pe wambile ngayi, “Nikushinga, nyongomana!” Wanguwangu mukabimakwa wanyongomanine. 14#Bal 14:1-32. Yeshu wamutintikile ngayi, “Hinga utongwezako muntu, ngoboni yanga kuli mukankombela akakuzilulule, pe ukatupule ntupu ngonehe mwayila Ndayano za Moshesha akakumoneshe ku muntu nimwendi ngayi unanyongomana.”

15Ngoboni mpupo ya Yeshu yatumbalalile shikuma na wingi wa bantu bakungulukile mu kumuyuvwa na kunyongomanishiwa ku malweli wabo. 16Niho afumine, wayile ku mwanya kwaninkayendi mu kulombela.

Yeshu ukunyongomanisha mulume wa kalepa

(Mateo 9:1-8; Mako 2:1-12)

17Ha mutena wamina oho Yeshu alongeshelenga, kwekalile Bafwalishi na bakakulongesha ndayano, baya bafumine ku minzi nimwayo ya mu Ngalileya na Yundeya na ku Yelushalema. Ngovu za Mwene zekalile mumwendi ngayi anyongomanishe bakakukola. 18Balume bamo baletele mulume ha wulili wakolelenga wulweli wa kalepa. Bashingile kumwingiza mu litala ngayi bamuyake kumbili ya Yeshu. 19Oho babulile kuwana nzila ya kumwingiza mu litala ndaba ya likunge lya bantu, bamukandamishile hayilu ya litala. Batubwile litubwa niho bamushezumwishile ha wulili wendi mukati ka bantu kumbili ya Yeshu. 20Oho Yeshu amonene kukulupila kwabo, wambile ku mulume wa kalepa ngayi, “Muhoni, wubi wobe unayatiwili.”

21Baka ku longesha ndayano na Bafwalishi batatikile kungunguta mu mitima yabo ngayi, “Kati yani ou ukwamba bya lihandu? Yani ukutwesha kuyatila wubi, kaliha Nyambi tuhu ndi?”

22Ngoboni Yeshu walimukile bihanganiko byabo, pe wambile kukwabo ngayi, “Kati shumangani mu kuhanganika mu mitima yenu? 23Shawangu shiti, kwamba ngayi, ‘Wubi wobe unayatiwili,’ hinge kwamba ngayi, ‘Katuka wende?’ 24Haya nikumimonesha mwanga mulimuke ngayi Mwana Muntu uli na ngovu hano hanci za kuyatila wubi.” Niho ambile ku mulume wa kalepa ngayi, “Nikwamba kukwobe ngayi, katuka, shimba wulili wobe uye ku litala lyobe.”

25Wanguwangu wakatukile oho bantu nimwabo hibamumona, washimbile wulili wendi, pe wayile ku litala lyendi hayemeza Nyambi. 26Bantu nimwabo bakomokele, niho bayemezele Nyambi. Bekalile na bowa, pe bambile ngayi, “Byuma tunamono lelo bya kukomokesha!”

Yeshu ukwihana Levi

(Mateo 9:9-13; Mako 2:13-17)

27Kunyima yanebye, Yeshu watutikilile ha munkanda, pe wamonene mukakutelesha mutelo lizina lyendi Levi, hinga ekala mu litala lyendi lya kuteleshela. Wambile kukwendi ngayi, “Nkonke.” 28Levi wakatukile washiyile byuma nimwabyo, pe wamukonkele.

29Niho Levi apingilile Yeshu shimbo shashinene sha mayambwayambwa mu litala lyendi. Balile na likunge lyalinene lya bakakutelesha na bantu bamina obo bekalile nabo. 30#Luka 15:1-2. Ngoboni Bafwalishi na bakakulongesha ndayano bangungutile ku bandongesha bendi ngayi, “Kati shumangani mu kulya na kunwa hamo na bakakutelesha na bakawubi?”

31Yeshu wakumbwile kukwabo ngayi, “Bantu banzimba kushinga nganga bafwako, ndele bakakukola tuhu. 32Kaliha nezile mukwihana bakakwoloka, ngoboni mukwihana bakawubi ngayi batenguluke.”

Liyipu lya ha kuzila kulya

(Mateo 9:14-17; Mako 2:18-22)

33Bantu bambile kuli Yeshu ngayi, “Bandongesha ba Yowano ba kuzila kulya bikati byabingi na kulombela na bandongesha ba Bafwalishi. Ngoboni bandongesha bobe ba kulya na kunwa.”

34Yeshu wambile ngayi, “Kati bahoni ba mukashinawenga ba kuzila kulya oho mukashinawenga ushili nabo ndi? 35Ngoboni shikati shikeza oho mukashinawenga akafumishiwa kukwabo, niho bakazile kulya.”

36Yeshu watongwezele eye nguli ngayi, “Kowa muntu ukutabula shitabu ku shivwalo shashipya ha kushitopeka ha shivwalo sha mwaka. Ndi ukatenda noho shivwalo shashipya shikatabuka, kami shitabu shashipya kwendelela hamo na shivwalo sha mwaka shifwako. 37Kami kowa muntu wakulongela waine yayipya mu mbokoshi ya mwaka. Ndi muntu ukwinga noho, pe waine yayipya yikatabula mbokoshi iyo, kami waine yikayitika na mbokoshi yikabipa. 38Ngoboni waine yayipya yayakiwanga mu mbokoshi yayipya. 39Kami kowa muntu oho wanwakale waine ya mwaka ha kushinga kami yayipya, ndaba ukamba ngayi, ‘Waine ya mwaka yayiwahe.’ ”

Currently Selected:

Luka 5: LLK

Highlight

Copy