Mareka 6

1Wafumini kwenoku, hakuya kwituŋa dindi yomweni; atumbanji twindi hiyakumulondela. 2Sabata chiyinashiki, hakutachika kulejaantu mushikola; antu amavulu chanamutiyuwu hiyakuhayama nawu, Muntu iwu nawani yumiyi kudihi? Indi maanawa anamwinkuwu muntu iwu anka? Indi nyidimu yaŋovu yishikaha yakukoŋayi namakasindi yaya mudihi? 3Hidiyi mukwakusona mapitu, mwana kaMariyaku? Hidiyi mana kwaYakoba naYosesi naYuda niShimonaku? Ahelindi hitudi nawu kunuku? Amweni mudi yena chuma chakuyidimbwisha. 4Yesu hakuyila nindi, Kaprofwetu hiyamudiwulaŋaku, kumudiwula chiŋa mwituŋa dindi yomweni, nikudi awusoku windi, nimwitala dindi. 5Kwenoku wakaŋenyi kwila nyidimu yaŋovu, wakuminini dakunanika makasindi hadi antu akata antesha hakuyikolesha. 6Wahayamini chabuliluwu kwitiya. Wendoleli munyikala yakwenoku nakuleja antu.

7Watambikili owu ikumi nayedi, hakutachika kuyitemesha munyikala, ayedi ayedi; hakuyinka Ŋovu yansaŋu yawademoni azonda. 8Hakuyileja nindi, Bayi musenda yuma yakuya nachu munjilaku, chiŋa kwambwechi hohu; yakudya nehi, ipakumuna nehi, mali muchikwama nehi; 9Ilaŋa vwalenu nkwabilu; bayi muvwala yi kovwelu yiyeduku. 10Hakuyila nindi, Kwejima kumukuya mwakashakama mwitala dimwakashikena, kufumamu chiŋa himukunyamuka. 11Mukala wukubula kuyitambula, hela kuyitiya, chimukufumamu mukuditotomona lunkuŋu ludi kumadachilu enu, kulonda kuyikonkolola nachu. 12Hiyakuya, hiyakushimuna nawu, Balumukenu mumuchima. 13Hiyakufumisha ademoni amavulu; hiyakuwayisha manji antu amavulu adiŋi akata, hiyakuyikolesha. 14Mwanta Herodi hakuchitiya, muloŋa ijina dindi dinatiyakani dehi; hakwila nindi, Yowanu Mpapatishu nasaŋuki dehi mudi afu, dihu hanafumi kukoŋa nyidimu iyi yaŋovu mudi yena. 15Ilaŋa makwawu nawu diyi Elija. Amakwawu nawu hikaprofwetu, wudi neyi kaprofwetu wumu. 16Ilaŋa Herodi chachitiyiliyi, nindi Yowanu naketwili namutu diyi Nasaŋuki dehi. 17Muloŋa yomweni Herodi diyi watemesheli antu, nindi akwati Yowanu amushi mukaleya hansaŋu yaHerodiya, iŋodamana kwindi Fwilipu anasumbuliyi. 18Muloŋa Yowanu wamwilili Herodi nindi, Kusumbula iŋodamana kweyi chinjila. 19Herodiya hakumushila nkunyi, hakukeŋa kumujaha, Ilaŋa kutwesha nehi; 20Muloŋa Herodi wamutiyili Yowanu woma, welukili nindi hiiyala waloŋa, wajila; hakukumina dakumuhemba chachiwahi. Chamutiyiliyi hakujinoka nankashi; hakutiya kuwaha kumutiya.

21Ifuku dadiwahi chidinashiki, Herodi hakuteleka chawija chakudiisha ayilolu jindi nawawakulumpi anjita amaneni nawantu alemena muŊaliliya, ifuku dakwanuka kuvwalika kwindi. 22Mwana kayomweni Herodiya wamumbanda, cheŋililiyi nakuhaŋana hakumutiyisha Herodi kuwaha, hamu nanowu ashakaminiyi nawu nakudya. Mwanta hakumwila owu chaŋadima nindi, Nlombi yuma yejima yiwunakeŋi nikwinki. 23Hakumusanyikila nindi, Yuma yejima yiwukunlomba nukukwinkayu, hela kukubalwila wanta wami hakachi. 24Hakwidika hakuya nakwihula mama yindi nindi, Nukulombadi? Yena nindi, Lombaku neyi, Nyinki namutu waYowanu Mpapatishu. 25Henohu eŋila nimudi mwanta lufuchi, hakulomba nindi, Nakeŋi wunyinki katataka namutu waYowanu Mpapatishu hacheŋa. 26Mwanta hakuneŋa nankashi; ilaŋa ochu cheliliyi yena nasanyiki dehi, nichamweniyi owu anashakami nakudya, hamweni hakumukanishilaku. 27Hohenohu mwanta atemesha niishidika wahadi awa amuhembelaŋa, hakumuleja nindi, Letaku namutu windi. Dichi hakuya, hakumuketula namutu windi omu mukaleya. 28Hakuleta namutu windi hacheŋa, hakumwinka chaŋadima, chaŋadima hakumwinka mama yindi. 29Atumbanji twindi chanachitiyuwu, hiyakuya nakunona chivuvuma chindi, hiyakuchiika mwijamu.

30Apostolu hiyakupompela kudi Yesu; hiyakumuleja yuma yejima, niyeliluwu niyadiŋi nakulejawu antu. 31Yena hakuyila nindi, Inzenuŋa enu aweni kwakanka wenu mwisaŋa, munookuhu chanti. Muloŋa kwadiŋi antu amavulu, awa nakwinza, awa nakuya, hiyamweni hela hakudiilaku. 32Dichi hiyakufuma kwenoku muwatu, hiyakuya mwisaŋa mwakanka wawu. 33Chayilaŋawu ochu, antu adiŋi nakuyimona, amavulu elukili, hiyakufuma munyikala yejima, hiyakuyaku lufuchi hamaseki, hiyakuyaloŋahu dehi. 34Yesu chanedikiyi muwatu, hakumona izaza deneni, hakuyitiyila wushona muloŋa adiŋi neyi anyikoku akadi kabiŋa; hakutachika kuyileja yuma yayivulu. 35Chelili itaŋwa hidikuya nakuteŋuluka, atumbanji twindi hiyakwinza kudi yena nawu, Munu mwisaŋa itaŋwa dahita dehi; 36yimwaŋi antu ayi mumaha nimunyikala yanyeŋumukaku, akadipawili yakudya yawu. 37Ilaŋa yena hakuyakula nindi, Enu aweni yinkenu yakudya. Wena hiyakumwila nawu, Tuyi nakulanda mankendi amali makulakaji ayedi twakayinki adiyi, tahindi? 38Hakuyihula nindi, Mukweti mankendi aŋahi? yenu mutali. Chanelukuwu hiyakwila nawu, Atanu, ninshi jiyedi. 39Hakuyileja nindi antu ejima ashakami hamatahu atuuta, izanvu aha, izanvu aha. 40Hiyakushakama nyikuku yankulakaji niyamakumi atanu. 41Hakutambula owu mankendi atanu ninoju inshi jiyedi, hakutala mwiwulu, hakukisula nkisu, hakuyinka atumbanji ayinki antu, ninoju inshi jiyedi hiyakuyanjaŋena wejima wawu. 42Wejima wawu adiili ekutili. 43Hiyakunonahu yibalu ikumi damabaŋu namabaŋu ayedi ambe, ninshi nawa. 44Antu adiili mankendi adiŋi amayala makombakaji atanu.

45Henohu hakukanjikŋa atumbanji twindi nindi epili muwatu, ayaloŋahu dehi kwishinadi kuBeteseda, hadiŋi yi wuchidi kwendesha antu ayi kwawu. 46Cheliliyi nadishaliki dehi nawu, hakufumaku, hakuya hampidi nakulomba. 47Chikuneli melela, watu hiwudi mukachi kejiya, yena kanka windi kumpata. 48Chanayimoniyi adi nakukabakana nakuvuwa, Muloŋa mpepela yadiŋi nakufuma kwakuyawu, hakuya kudi wena nakwenda hewulu dameji, chikuneli neyi himuchilu chawufuku chamuchiwana; hakwila neyi wukukeŋa kuyipandakana. 49Ilaŋa wena chamumwenuwu nakwenda hewulu dameji, hiyakutoŋojoka nawu himuŋamu, hiyakukaloka; 50muloŋa amumweni wejima wawu, hiyakwakama. Ilaŋa yena hakuhosha nawu hohenohu, hakuyila nindi, Tiyenu kuwaha, yami; bayi mutiya womaku. 51Hakukandama muwatu mwadiŋuwu, mpepela yimwena nikumwena; wenahiyakuhayama nankashi munyichima yawu; 52muloŋa abulili kwiluka mwayili nsaŋu yamankendi, nyichima yawu yachinchikili.

53Chanazambukuwu hiyakushika kwituŋa daGenesareta, hiyakukuŋika watu kuchi kumu. 54Chanafumuwu muwatu, hohenohu antu amwiluka nikumwiluka. 55Hiyakuya lufuchi kumutamba wejimowu ndo, hiyakutachika kweleka akata hatudidi twawu, hiyakuyitwalatwala kwamutiyiluwu. 56Mwayilaŋayi mwejima, hela munyikala yanyanya, hela munyikala yamaneni, hela mwisaŋa, hiyakutenteka akata kuwulandilu, hiyakumulembelela nawu akumini dakukunka hela kumukundulu wehina dindi; antu ejima amukunkili akoleli.

Currently Selected:

Mareka 6: MW62

Highlight

Copy