Mareka 5

1Hiyakushika kwishinadi dejiya mwituŋa dawaGeraseni. 2Chanafumiyi muwatu, hohenohu hakumubulakana muntu wudi nakufuma mumalalu, wazakukaŋa demoni wazonda, 3washakaminaŋa kumalalu. Antu ejima amukaŋanya dehi kumukasa, hela neleŋi kumutwesha nehi; 4muloŋa mukasa dehi kakavulu natuyanda nimaleŋi; maleŋi wayikotoleli kotu kotu, tuyanda watubalwili balu balu; hikwadiŋi muntu wadiŋi naŋovu jakumufwomonaku. 5Wadiŋi nakubilela mafuku ejima, niwufuku nimwaana, nikumalalu nikumapidi, nakudisupola namalola. 6Chanamumoniyi Yesu kwakulehi hakuyaku lufuchi, hakudifukula kudi yena, 7hakubilela nezu daŊovu nindi, Eyi Yesu, Mwana kaNzambi Mukwakubadika, ni kweti nsaŋwinyi naneyi? Nakwili mwijina daNzambi, nami bayi wunkabishaku. 8Muloŋa Yesu namwili dehi nindi, Eyi demoni wazonda, fumaku mudi muntu. 9Hakumwihula nindi, ijina deyi yeyinyi? Yena nindi, ijina dami yami Lejiyoni, muloŋa tudi amavulu. 10Hakumulembelela nankashi nindi, Bayi wuyitemuna neyi afumi mwituŋaku. 11Henohu kumbavu yampidi kudi izanvu dawaŋulu dadeni adi nakudya. 12Hiyakumulembelela nawu, Tutemeshi tuyi mudi aŋulu, kulonda twiŋilumu. 13Hakuyi iteja. Owu ademoni azonda hiyakufuma, hiyakwijila mudi aŋulu; izanvu hidikwanduka hidikukunkumukila mwakunama nankashi, nimwijiya chu-u, afwili mwijiya. Adiŋi kwiji neyi makombakaji ayedi.

14Antu ayidiishilaŋa hiyakutemuka, hiyakuchishimununa mumukala nimwisaŋa. Hiyakwinza nawu amoni chuma chaneluwu. 15Hiyakushika kudi Yesu, kumuwana owu wazakukilaŋa ademoni nashakami navwali chachiwahi, maanindi anamuwani dehi, yoyenowu wadiŋi nalejiyoni; atiya niwoma. 16Antu achimweni hiyakuyileja chamwililuwu owu muntu wazakukilaŋa ademoni, ninsaŋu yawaŋulu. 17Hiyakutachika kumulembelela nawu afumi mwituŋa dawu. 18Chakeŋeliyi kwijila muwatu, yenowu wadiŋi nakuzakuka ademoni hakumulembelela nindi ekali chimu nindi. 19Ilaŋa yena kumwiteja nehi. Hakumwila nindi, Yaŋa kwitala deyi kudi akwenu wuyileji yuma yanakwililiyi Mwanta kutoha, nichanakutiyiliyi luwi. 20Hakuya kwindi, hakutachika kushimuna kuDekapoli yuma yanamwililiyi Yesu kutoha; antu ejima hiyakuhayama.

21Yesu chanazambukiyi cheŋi kwishinadi muwatu, hikukumupompela izaza dawantu dadeni. Yena wadiŋi kwakwihi nejiya. 22Hikukwinza nyuli yashikola wumu, ijina dindi Jayirusa; chanamumoniyi, hakudinata kunyendu yindi, 23hakumulembelela nankashi nindi, Mwanami wamumbanda wanyanya keŋa afwi; nalembi nami winzi mwani, wumunaŋiki makaseyi kulonda akoli, ahandi. 24Hakuya nindi; izaza dawantu dadeni hidikumulonda, hidikumuhumahuma.

25Mumbanda wumu wapwekelaŋa mashi nyaka ikumi nayiyedi, 26henohu wamona dehi kukala nayuma yayivulu yanamoniyi kudi ayimbuki amavulu, namanishi dehi yuma yindi yejima to-o, kuditiyaku nihanti nehi, yosweja nikusweja; 27chanatiyiyi nsaŋu yaYesu, hakwinza munyima yindi mwizaza, hakukunka kwihina dindi. 28Muloŋa welili nindi neyi nukukumina dakukunka kumahinindi nukukola. 29Hohenohu hapwekelaŋa mashi homa nichau; hakutiya mumujimba windi musoŋu wunamufumi dehi. 30Hohenohu Yesu eluka nikwiluka chinafumi Ŋovu mudi yena, hakushetumuka mwizaza nindi, Nakunki kumahinami hinyi? 31Atumbanji twindi hiyakumwila nawu, Wunamoni izaza didi nakukuhumahuma, wili neyi nankunki hinyi? 32Hakutala niniku niniku amoni muntu neli chumochu. 33Ilaŋa yena mumbanda hakutiya woma nikuzaala, neluki dehi chuma chanamwiliyi; hakwinza nakudinata hamaseki kumesu indi, hakumuleja nsaŋu yejima. 34Yesu hakumwila nindi, Eyi mwanami, kukuhwelela kweyi kunakukoleshi dehi; yaloŋa nakuwunda, musoŋu weyi wukufumi.

35Iku wuchidi kuhosha, antu hiyakufuma kwitala danyuli yashikola nawu, Mwaneyi wamumbanda nafwi dehi, wukumukabishiladi nawa Nkuluŋaŋa? 36Ilaŋa Yesu chanatiyiyi mazu anahoshuwu, hakumwila nyuli yashikola nindi, Bayi wutiya womaku, kumina dakukuhwelela hohu. 37Hetejeli muntu kumulondaku, chiŋa aPetulu naYakoba nimana kwaYakoba Yowanu. 38Hiyakushika kwitala danowu nyuli yashikola, hakumona antu adi nakuleta ipumba, hiyakudila nakutumpa chacheni. 39Chanepiliyi mwitala, hakuyila nindi, Mudi nakuleteladi ipumba nikudila? Mwana hanafuku, nakami tulu. 40Hiyakumuseha. Yena chanayiidishiyi wejima wawu, hakutwala tata yamwana nimama yindi ninawa adiŋiyi nawu, hakwijila mwadiŋiyi owu mwana. 41Hakumukwata mwana kuchikasa, hakumwila nindi, Talita kumi; chaya mukwila nawu, Eyi mwana, nakwili nami hindukaku. 42Hohenohu owu mwana yohinduka nikuhinduka, hakwenda; Muloŋa wadiŋi wanyaka ikumi nayiyedi. Hohenohu ahayama nikuhayama kwasweja. 43Hakuyikaanda nankashi, nindi bayi achiluka kudi muntuku; hakuyileja nindi, Mwinkenu yakudya.

Currently Selected:

Mareka 5: MW62

Highlight

Copy