Mareka 4

1Hakutachika cheŋi kuyileja kuchi kumu chejiya. Kwamupompeleli izaza deneni nankashi, dichi yena hakwijila muwatu, hakushakama muwatumwijiya; izaza dejima hidikwikala kuchi kumu kwakwihi nejiya. 2Hakuyileja yuma yayivulu nayishimu. 3Mukuleja kwindi wayilili nindi, Tiyililenu. Talenu, mukwakukuwa wayili nakukuwa. 4Chakuwiliyi, jikwawu jaholokeleli kunsa yanjila, atujila hiyakwinza nakujidya. 5Jikwawu jaholokeleli hamalola habulili maseki amavulu, jibaluka nihohenohu, muloŋa habulili maseki amavulu kwishina; 6itaŋwa chidinashiki mwiwulu hijikubabika, hijikuuma, muloŋa jabulili nyiji. 7Jikwawu jaholokeleli mukachi kanyiŋa, oyu nyiŋa hiyikukula, hiyikujika mbutu, hijasoŋeluku. 8Jikwawu jaholokeleli hamaseki amawahi, hijikusoŋa nakukula nakusemunwina; jasoŋeli jikwawu makumi asatu, jikwawu makumi atanu nadimu, jikwawu nkulakaji. 9Hakuyila nindi, Yowu wukweti matu akutiya, atiyi.

10Chadiŋiyi kanka windi, owu adiŋiyi nawu niikumi nayedi, hiyakumwihula mwaya oyu yishimu. 11Hakuyila nindi, Enu anayinki nsaŋu yawanta waNzambi yajindawu, hakwila awa adi hanzi ayililaŋa yuma yejima muyishimu; 12kulonda kumona akamona, akabuli kushinshika; kutiya akatiya, akabulikwiluka; kuchina akubalumuka cheŋi hiyakuyanakena. 13Hakuyila nindi, Chishimu ichi himunachilukuku? Indi mwakeluka ŋahi yishimu yejima? 14Mukwakukuwa wakuwaŋa mazu. 15Awa adi kunsa yanjila kwanakuwuwu mazu, wowu akwila chanatiyuwu, hohenohu Satana hakwinza nakufumisha mazu anakuwuwu mudi wena. 16Chochimu ninawa anakuwuwu hadi malola, wowu akwila chanatiyuwu mazu, hiyakuyitambula namuzaŋalu hohenohu. 17Mudi aweni muji mwosi, ilaŋa akukakelamu chantesha; nkumininaku chikukwinza yihuŋu, hela kuyikabishila nsaŋu yamazu, hiyakudimbuka hohenohu. 18Amakwawu anakuwuwu munyiŋa, wowu akutiya mazu; 19kwakama kwamakonu, nikudimbana kwamaheta, nikufwila yuma yi kwawu, hikukwijila mu, hikukuvumbisha mazu, hiyákubula kusoŋa. 20Awa akuwiluwu hamaseki amawahi, wowu akutiya mazu, hiyakuyitambula, hiyakusoŋa wa makumi asatu, awa makumi atanu nadimu, awa nkulakaji.

21Hakuyila nindi, Inoŋu adiletaŋa kulonda adisweki mwibaŋu hela muchalilu, tahindi? Hiyalondaŋa kudisha hamesaku? 22Muloŋa hikwekala chuma chakusweka nichimu, chakabula kumwekeshawuku; hikwekala chuma chakujinda nichimu, chakabula kwidika hatookaku. 23Muntu wukweti matu akutiya, atiyi. 24Hakuyila nindi, Babelenu yimukutiya; chesekelu chimukwesekela akwenu dichi chakayesekelawu ninenu, ayishilaku nikuyishilaku. 25Muloŋa wukweti akamwinka; wabula akamutambula ninaka kadiyi naku.

26Hakwila nindi, Wanta waNzambi wudi neyi muntu wukukuwa mbutu heseki; 27hakukama, hakuhinduka, niwufuku nimwaana, mbutu hijikubaluka, hijikukula, yena kwiluka mujinakulili nehi. 28Maseki adisoŋeshelaŋa awenawu; kusambila mbali, kulondelamu nyitu, kukuminina hitidiku yayeni munyitu. 29Ilaŋa mbutu chikwiha, hakutwalamu chikwakwa, muloŋa chilaaka chakwaŋula chinashiki dehi.

30Hakwila nindi, Wanta waNzambi tukuwufwikŋa neyi chumanyi? Indi tukuwushimuna nachishimwinyi? 31Wudi neyi kalubutu kamostadi, kelaŋa chakukitumbawu heseki, hela kabadika kukeha hambutu jamunu mwishina jejima, 32chakukitumbawu, hikakukula, hikakutoha chakubadika yisakola yejima, hikakwila ninyitayi yamaneni yakwila atujila ahaluzwizu hiyakushakama muwulelu wayu. 33Wayilejelaŋa mazu nayishimu yayivulu yidi neyi iyi, mwatwesheli kutiyilawu. 34Hahosheli nawu chakadi chishimuku; ilaŋa atumbanji twindi wadiŋi nakuyilumbulwila yuma yejima kumbadi.

35Dena ifuku odu, chikuneli melela, hakuyila nindi, Tuzambukenu kwishinadi. 36Hiyakushiya izaza dawantu, hiyakumutwala tuhu muwatu choche nochu. Wayili namaatu amakwawu nawa. 37Hikukwinza mpepela yeneni nankashi, mankanda hiyakusumpokela muwatu, watu hiwukukeŋa nikwinzala. 38Yomweni wadiŋi kuntoŋi yakunyima, nakami tulu hamusawu. Hiyakumuhindwisha nawu, Eyi Nkuluŋaŋa, hiwunaakami chitukujilumukaku? 39Hakuhinduka, hakuhoshola mpepela, hakumwila ŋiya nindi, Mwenaku, wundaku zo. Nimpepela swi-i, kumwena ninankashi zo. 40Hakuyila nindi, Munatiyi woma wanka? Kanda mukuhweleli nihanu? 41Hiyakutiya woma nankashi, hiyakudila muntu namukwawu nawu, Indi iwu dinu hinyi mwaka amwovwahili nikudi mpepela nikudi meji?

Currently Selected:

Mareka 4: MW62

Highlight

Copy