Mareka 7

1AFwarisi nawansoneki amakwawu afumini kuYerusalema hiyakumupompela. 2Amweni atumbanji twindi adi nakudya yakudya yawu namakasa amajilu, wowu makasa akadi kwisuka. 3Muloŋa aFwarisi nawaYudeya ejima, kudya chiŋa esuka kumakasawu chalala, enda ahemba chaaku chawawakulumpi. 4Elaŋa chakufumawu kuwulandilu, kudya chiŋa awela. Kudi niyuma yi kwawu yayivulu yanatambuluwu kuhemba, yakukosa mpasa namamiŋu niyuma yawuneŋu. 5AFwarisi nawansoneki hiyakumwihula nawu, Atumbanji tweyi alekelaŋadi kwenda mwaya chaaku chawawakulumpi, chadyaloŋawu yakudya yawu namakasa amajilu? 6Hakuyila nindi, Komana mwaprofweteliyi Isaya chayiteneniyi enu anfwikiji mwalala, ichi chanasonekuwu nawu, Antu awa anlemeshaŋa nanyivumbu yawu, ilaŋa nyichima yawu yidi kwakulehi nanami. 7Komana chadifukulaŋawu kudami, hikudifukula kwamukunkulwayi, chalejaŋawu yijila yawantu. 8Mwalekaŋa kuleja kwaNzambi, himukukakela chaaku chawantu.

9Hakuyila nindi, Chalala mwenda muleka kuleja kwaNzambi kulonda muhembi chaaku chenu. 10Muloŋa Mosi welili nindi, Lemeshaku tata yeyi namama yeyi; nindi, Muntu wukutena tata yindi hela mama yindi chatama, chalala akafwi hohu. 11Hakwila enu nenu, Neyi muntu wukumwila tata yindi hela mama yindi nindi, Ichi chadiŋi chakukukwashaku nachu chinekali dehi Korabani, chaya mukwila nawu nachinki dehi Nzambi; 12himukumulekesha kumwilila tata yindi hela mama yindi chuma; 13mwenda mupepesha mazu aNzambi nachaaku chenu chimunaleji antu. Himukwila niyuma yi kwawu yidi neyi iyi.

14Hakutambika cheŋi izaza dawantu, hakuyila nindi, Ntiyililenu wejima wenu mushinshiki. 15Hikudi chuma chafumaŋa hanzi yamuntu cheŋilaŋa mudi yena chikutwesha kumutamishaku; yuma yikufuma mudi muntu diyi yikumutamisha. 16Muntu wukweti matu akutiya, atiyi.

17Chanashiyiyi izaza dawantu, hakwijila mwitala, atumbanji twindi hiyakumwihula chishimu ichi. 18Hakuyila nindi, Ninenu nawa saŋa mwayambila tahindi? Mweluka dehi yuma yafumaŋa hanzi yeŋilaŋa mudi muntu hiyatweshaŋa kumutamishaku. 19Muloŋa hiyeŋilaŋa mumuchima winduku, yeŋilaŋa kwamwivumu hohu, yafumaŋamu yayaloŋa mumpata. Watookesheli nachu yakudya yonsu. 20Welili nindi, Chuma chafumaŋa mudi muntu dichi chatamishaŋa muntu. 21Muloŋa mukachi, mumuchima wamuntu, dimu mwafumaŋa yitoŋojoka yatama, nikubajama, 22niwukombi, niwubanji, niwuvumbi, nilwisu, nikwila yatama, nimakasu, nikufwila yatama, nidisu datama, nikutukana, nikudinka wanta, niwusupi. 23Yuma yatama yejimiyi yafumaŋa mukachi, diyi yatamishaŋa muntu.

24Hakunyamuka kwenoku, hakuya kumutamba waTira naZidoni. Hakwijila mwitala dimu, hakeŋeli muntu kuchilukaku, ilaŋa kutwesha kumusweka nehi. 25Kwadiŋi mumbanda wumu wadiŋi namwanindi wamumbanda wanyanya wazakukaŋa demoni wazonda, chanamutiyiyi, hohenohu hakwinza nakudinata kunyendu yindi. 26Mumbandowu wadiŋi kaHeleni, wakumuza waSirofwenisa. Hakumulembelela nindi afumishi demoni mudi mwanindi. 27Yena hakumwila mumbanda nindi, Yileki anyana asambili kwikuta; hichinawahi kunona mankendi awanyana nakunatila tutuwaku. 28Mumbanda hakumwakula nindi, Eŋa Mwanta, hela tutuwa ekalaŋa mwishina damesa adyaloŋa nkúuku jawanyana. 29Yena hakumwila mumbanda nindi, Ochu chiwunahoshi ochu yaloŋa kweyi; demoni nafumi dehi mudi mwaneyi. 30Owu mumbanda hakuya kwitala dindi hakuwana mwanindi nakami dehi hakadidi, demoni nafumi dehi mudi yena.

31Hakufuma cheŋi kuŋinza jaTira, hakuhita muZidoni; chanahitiyi mukachi ketuŋa daDekapoli, hakushika kwijiya daŊaliliya. 32Hiyakumuletela muntu wajika matu wakukumaŋa; hiyakumulembelela nawu amunaŋiki chikasa. 33Yena hakumufumisha mwizaza dawantu, hakumutwala kumbadi kwakanka wawu, hakwiŋija nyinu mumatu indi, hakufwija mazeŋi, hakukunka idimi dindi; 34hakutala kwiwulu, hakudishishimuna, hakumwila nindi, Efwata; chaya mukwila nawu, Jikukaku. 35Matu indi ajikuka nikujikuka, kalaka kindi kaketuka nikuketuka, hakuhosha chalumbuluka. 36Yesu hakuyikaanda nindi, Bayi muleja muntuku. Chaswejehyi kuyikaanda, wena asweja nikuchishimununa nankashi. 37Hiyakusweja kuhayama nankashi nawu, Neli yuma yejima chachiwahi hohu; hela wajika matu hakumutiyisha; hela kamama hakuiruhoshesha.

Currently Selected:

Mareka 7: MW62

Highlight

Copy