MATEU 6
6
1Babalenu mubuli kuhana yamukunkulu yenu kulonda ayimoni kudi antu. Neyi mukwila ochu himwakamona wufwetu kudi Tata yenu wudi mwiwuluku.
2Dichi neyi wukuhana yamukunkulu, bayi wimbisha mpùŋa kuwukuya, neyi chelaŋawu anfwikiji mumashikola nimunyikwakwaku, nawu atiyakani mpuhu kudi antu. Nukuyileja chalala nami anatambuli dehi wufwetu wawu. 3Ilaŋa eyi, neyi wukuhana yamukunkulu, chikasa cheyi chachimunswa bayi chiluka chikwila chikasa cheyi chachidiiluku; 4kulonda yamukunkulu yeyi yiikali yakumbadi, niTata yeyi wamonaŋa kumbadi wakakwinka wufwetu weyi. 5Neyi mukulomba, bayi mwilaŋa neyi chelaŋawu anfwikŋuku, muloŋa wena afwila kwimana nakulomba mumashikola, hela kumaakenu anyikwakwa, kulonda ayimoni kudi antu. Nukuyileja chalala nami anatambuli dehi wufwetu wawu. 6Ilaŋa eyi chiwukulomba, iŋilaku mwitala deyi damukachi, wenzeluku, wulombi kudi Tata yeyi wudi kumbadi, niTata yeyi wamonaŋa kumbadi wakakwinka wufwetu weyi. 7Chimukulomba, bayi muhitulula nakutenatena mwamukunkulwayi, neyi chelaŋawu aJentiluku; muloŋa wena atoŋojokaŋaa nawu akuyitiya nanochu chakuvulishawu mazu. 8Dichi enu bayi mwikala neyi wenaku; muloŋa Tata yenu neluki yuma yimunabuli himuchidi kanda mulombi kudi yena. 9Tiyenu chimukulombaŋa; lombenuŋa nenu, Tata yetu wekala mwiwulu, ijina deyi dijili. 10Wanta weyi winzi. Muchima weyi awili hamaseki neyi chawilaŋawu mwiwulu. 11Twinki kudya kwetu kutukukeŋa lelu. 12Twanakeni nyikudi yetu, neyi chituna anakeni akweti nyikudi nanetu. 13Bayi wututwala mukwesekaku, ilaŋa twamwini kukutama, muloŋa wanta wekala weyeyi, niŋovu, ni kulema, haya nyaka. Amena. 14Muloŋa neyi mukwanakena antu nyiloŋa yawu, niTata yenu wamwiwulu wakayanakena ninenu nawa. 15Neyi mukubula kwanakena antu nyiloŋa yawu, Tata yenu niyena hakayanakena nyiloŋa yenuku.
16Chimukujiŋa nakuleka kudya, bayi mwikala neyi anfwikiji adihombaŋa kumesuku; muloŋa wena atamishaŋa kumesu awu kulonda ayimoni kudi antu nawu anajiŋi nakuleka kudya. Nukuyileja chalala nami anatambuli dehi wufwetu wawu. 17Ilaŋa eyi, chiwukujiŋa nakuleka kudya, wayishaku namutu weyi, welaku kumesu eyi, 18kulonda antu abuli kukumona nawu wunajiŋi nakuleka kudya, chiŋa achimoni kudi Tata yeyi wudi kumbadi, niTata yeyi wamonaŋa kumbadi wakakwinka wufwetu weyi.
19Bayi mudilumbikilaŋa maheta hanu hamasekuku; hamaseki hadi tububu nindala yanoŋeshaŋa, hadi amakombi alokolaŋa matala nakwiya. 20Chiŋa mudilumbikila maheta mwiwulu, mwabula tububu hela ndala yanoŋeshaŋa, mwabula amakombi alokolaŋa matala nakwiya. 21Muloŋa kukwikala maheteyi, diku kuwukusha nimuchima weyi nawa. 22Inoŋu damujimba disu, dichi neyi disu deyi dikutalaŋa mumu ho-o, mumujimba weyi wejima mwakatooka to-o. 23Iteŋa neyi disu deyi dikutama, mumujimba weyi wejima mwakela mwidima bwi. Dichi neyi chejeji chidi mudeyi chikwikala mwidima, o mwidima chiwukusweja!
24Kwosi muntu natweshi kukalakela anyanta ayeduku; chiŋa yohelahu wumu, akeŋahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.
25Dichi nukuyileja nami, kwakama wumi wenu nenu tukudyadi? hela nenu tukunwadi? hela mujimba wenu nenu tukuvwaladi? bayi mwakama mwokuku. Wumi hiwabadika kudyaku? Hela mujimba hiwabadika yakuvwalaku? 26Talenu chachiwahi atujila ahaluzwizu, hiyakuwaŋaku, hiyamunaŋaku, hiyaloŋaŋa munkalaŋaku, ayidiishaŋa kudi Tata yenu wekala mwiwulu. Enu himwayibadika nankashi kulemaku? 27Mwinenwinyi wukwila akame-e, anuŋa kuchiminu chindi chikunku chakweseka munkotweli yachikasa yimu? 28Indi dinu, mwaakaminaŋadi yakuvwala. Toŋojokenu wuluya wamwisaŋa chiwakulaŋa; hiwakabakanaŋaku, hiwashintaŋaku; 29ami nukuyileja nami mwalemeneniyi Solomoni mwejima, havweli chakweseka hela nawuluya iwu wumuku. 30Dichi Nzambi wavwikaŋa matahu amwisaŋa chochichi, akwila lelu adi kwoku kumadiki hiyakuyinatila mukesi, abuli kuyivwikenu chakubadika, enu mukweti kukuhwelela kwantesha? 31Dichi kwakama nenu, Tukudyadi? tukunwadi? hela nenu, Tukuvwaladi? bayi mwakama mwokuku. 32Muloŋa yuma yejimiyi diyi yakeŋaŋawu aJentili; Tata yenu wamwiwulu neluki chimunakaankili yuma yejimiyi. 33Ilaŋa sambilenu kukeŋa wanta windi nikuloŋa kwindi, niyuma yejimiyi akayishilaku.
34Dichi bayi mwakama ifuku dakumadikuku, muloŋa ifuku dakumadiki dikudakama dadeni. Kurama kwefuku dimu kunawani.
Currently Selected:
MATEU 6: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
