MATEU 7
7
1Bayi musompeshaŋa akwenuku, kulonda abuli kuyisompesha ninenu. 2Muloŋa kusompesha kumukusompesha akwenu diku kwakayisompeshawu nachu ninenu; chesekelu chimukuyesekela akwenu dichi chakayesekelawu ninenu. 3Wukutaliladi kachibalu kadi mudisu damana kweyi, kwinza chipamba chidi mudisu deyeyi aweni hiwachimonaŋaku? 4Indi wukumwililadi mana kweyi neyi, Tali nikufumishi kachibalu kadi mudisu deyi; indi chipamba chidi mudisu deyeyi aweni? 5Eyi nfwikŋi! Sambilaku kufumisha chipamba chidi mudisu deyeyi aweni, mwaka wumoni chachiwahi kufumisha kachibalu kadi mudisu damana kweyi.
6Bayi mwinka atuwa yuma yajilaku, hela kunatila aŋulu mperola jenu, akenda kajidatola, hiyakuyibalumukila nakuyisansanya.
7Lombenu akuyinka; keŋakeŋenu mukuwana; dondomwenenu akuyenzulwila. 8Muloŋa ejima akulomba akutambula; muntu wukukenakeŋa wukuwana; niwukudondomwena akumwenzulwila. 9Mwinenwinyi wukwila mwanindi weyala namulombi dinkendi, yena amwinki ilola? 10Hela namulombi inshi, amwinki kapela? 11Dichi neyi enu atama mweluka kwinka anyanenu yamukunkulu yayiwahi, Tata yenu wudi mwiwulu abuli kubadika kuyinka akumulomba yuma yayiwahi? 12Dichi yejima yimunakeŋi antu kuyililenu, ninenu nawa yililenu mwomumu, muloŋa dimu mwaya nshimbi niatuprofwetu.
13Iŋililenu kuchisu chanyanya; muloŋa chisu cheneni, ninjila yabwambaŋana yaya kukujilumuka, mweŋilaŋa amavulu. 14Muloŋa chisu chanyanya, ninjila yanyanya yaya kuwumi, ayimonaŋa antesha.
15Babelenu atuprofwetu akutwamba, enzaŋa kudenu avwala yitembi yanyikoku, ilaŋa mukachi hiyatuŋiwidi atuhuka. 16Mukuyilukila kunyikabu yawu. Antu akumunaŋa nyikabu yavinyu kunyiŋa? hela yikuyu kunzonzonzu, tahindi? 17Dichi nyitondu yayiwahi yejima yasoŋaŋa nyikabu yayiwahi, ilaŋa mutondu watama wasoŋaŋa nyikabu yatama. 18Mutondu wawuwahi hiwukutwesha kusoŋa nyikabu yatamaku, nimutondu watama hiwukutwesha kusoŋa nyikabu yayiwahuku. 19Nyitondu yejima yabulaŋa kusoŋa nyikabu yayiwahi ayitemaŋa, ayinatilaŋa mukesi. 20Dichi dinu mukuyilukila kunyikabu yawu. 21Antu ejima akuntenatena nawu, Mwanta, Mwanta; hiyakawanina kwijila muwanta wamwiwuluku, chiŋa muntu welaŋa muchima waTata yami wudi mwiwulu. 22Amavulu amba kaŋila hefuku odu nawu, Mwanta, Mwanta, hitwaprofweteli mwijina deyuku? Hitwafumishili ademoni mwijina deyuku? Hitwakoŋeli nyidimu yaŋovu yayivulu mwijina deyuku? 23Henohu nakayakula nami, Hinayilukili hela ifuku nidimuku; fumenu kudami enu mwakoŋaŋa yakuluwa.
24Dichi antu ejima akutiya awa mazu amami hiyakuyila, akayifwikija neyi mukwamaana watuŋilili itala dindi helola. 25Ninvula yachabumukili, nimabaji enjili, nimpepela jakunkili, jeteli hetalodu; hidahumukiluku, muloŋa adituŋalili helola. 26Niantu ejima akutiya awa mazu amami nákubula kuyila, akayifwikija neyi muntu wabula maana, watuŋilili itala dindi hawusekulula. 27Ninvula yachabumukili, nimabaji enjili, nimpepela jakunkili, jeteli hetalodu; dahumukili, nikuhumuka kwadu kwaswejeli.
28Chelili Yesu nakumishi dehi mazu awa, mazaza awantu hiyakuhayama kuleja kwindi. 29Muloŋa wadiŋi nakuyileja neyi wukweti wanta, bayi neyi ansonekuku.
Currently Selected:
MATEU 7: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
