MATEU 5
5
1Chanamoniyi mazaza awantu hakukanduka hampidi; chanashakamiyi atumbanji twindi hiyakwinza kudi yena; 2hakuhosha nakuyileja,
3nindi, Atuzweŋi muspiritu anakooleki, muloŋa wanta wamwiwulu wunekali wawu.
4Adilaŋa anakooleki, muloŋa akayikundeja.
5Ovwaha anakooleki, muloŋa akaswana mpata.
6Atiyaloŋa nzala nampwila yakuloŋa anakooleki, muloŋa akayiikutisha.
7Akwaluwi anakooleki, muloŋa akayitiyila luwi.
8Atooka munyichima anakooleki, muloŋa akamona Nzambi.
9Akwakwambulwila akwawu anakooleki, muloŋa akayitena nawu anyana kaNzambi.
10Akukabishilawu hansaŋu yakuloŋa anakooleki, muloŋa wanta wamwiwulu wunekali wawu.
11Neyi akayihosha chatama, nakuyikabisha, nakuyituŋaula mazu atama ejima, nikuyitwambila hansaŋu yamami, munakooleki. 12Zaŋalalenu, luŋenu chacheni, muloŋa akayisomona masomu amaneni mwiwulu; muloŋa dichi chakabishiluwu niatuprofwetu asambililenu.
13Enu yenu muŋwa wahanu heseki, ilaŋa neyi muŋwa wunasamuki akuwutoweja nanka? Hiwukweti nawa cheŋi mudimuku, wakunata tuhu hanzi, awudatoli kudi antu. 14Enu yenu chejeji champata yamunu mwishina. Mukala wakutuŋila hampidi hiyatweshaŋa kuwujindaku. 15Hela inoŋu hiyadibutulaŋa adisweka mwibaŋuku, chiŋa kudisha hamesa ditoŋekeli ejima adi mwitala. 16Ninenu nawa chejeji chenu chitoŋekaŋa kumesu awantu, kulonda amonaŋa nyidimu yenu yayiwahi, alemeshaŋa Tata yenu wudi mwiwulu.
17Bayi mutoŋojoka nenu ami nenzi nakukisaŋana nshimbi hela mazu awatuprofwetuku; hinenzi nakujikisaŋanaku, nenzi nakujikolesha. 18Nukuyileja chalala nami iwulu namaseki amba kahita, ilaŋa kajotu hela kepaya#5.18 chafwana neyi kamufunda ka ti, nikaditepa ka ti. hikamba kafuma kunshimbuku, chiŋa yuma yejima yinalumbuluki dehi. 19Dichi muntu wukumotoka kachuma kamu kinayileji, hakulejamu ni akwawu, muwanta wamwiwulu akamutena nawu wasweja kukeha; hakwila muntu wukwilamu, hakulejamu ni akwawu, muwanta wamwiwulu akamutena nawu muneni. 20Muloŋa nukuyileja nami, kuloŋa kwenu chiŋa kubadika kwawansoneki nikwawaFwarisi, mukunkulwayi himwakatwesha kwijila muwanta wamwiwulu nihantuku.
21Munatiyi chayililuwu antu ahashankulu nawu, Kujaha muntu chinjila; nawu, yowu wukujaha muntu keŋa ashiki kukusompesha. 22Ilaŋa mi nukuyileja nami yowu wukuzuwa namana kwindi keŋa ashiki kukusompesha; yowu wukusoza mana kwindi keŋa ashiki muchota; yowu wukwila nindi, Eyi chisupi, wudi kwakwihi nakumona kesi kakaluŋa kachinana. 23Dichi neyi wudi nakutwala himulambu weyi kukameŋa, kwenoku hiwukwanuka neyi nidi namuloŋa namana kwami, 24shiyaku himulambu weyi kwenoku kukameŋa, wuyi wusambili kutiyaloŋana namana kweyi; winzi dinu nakuhana himulambu weyi. 25Tiyaloŋana swayi nachilumbu cheyi hiwuchidi nindi munjila, kuchina chilumbu cheyi kukutwala kudi mukwakusompesha, mukwakusompesha hakukuhana kudi kalama, yena hakukusha mukaleya. 26Nukukuleja chalala nami hiwamba kafuma mwokuku, kufumamu chiŋa wunafuti muloŋa wejima, nikadali kanyanya kushalaku nehi.
27Munatiyi cheliluwu nawu, Kwila wuvumbi chinjila. 28Ilaŋa mi nukuyileja nami muntu wukutala mumbanda namesu akumufwila, neli dehi nindi wuvumbi mumuchima windi. 29Neyi disu deyi dachidiilu dikukudimbwisha, ditubuli wudinati; chinawahi chidi cheyi chimu kukisika, hichinawahi kunatila mujimba weyi wejima mukaluŋa kachinanaku. 30Neyi chikasa cheyi chachidiilu chikuku dimbwisha, chiketuli wuchinati; chinawahi chidi cheyi chimu kukisika, hichinawahi mujimba weyi wejima kuya muka luŋa kachinanaku. 31Elili cheŋi nawu, Muntu wukuseŋa Iŋodindi, amwinki mukanda wakumuseŋa nachu. 32Ilaŋa mi nukuyileja nami muntu wukuseŋa Iŋodindi, chiŋa hamuloŋa wawuvumbi hohu, namubalumuni dehi nindi hichivumbi; muntu wukusumbula owu mumbanda analekuwu, neli wuvumbi.
33Cheŋi nawa munatiyi chayililuwu ankakulula ahashankulu nawu, Kusanyika chakudimbana chinjila, chiŋa wumukoŋela Yehova yiwamusanyikilili. 34Ilaŋa mi nukuyileja nami bayi wusanyika nihantuku; helakutena iwulu, muloŋa hiitanda daNzambi dawanta; 35hela kutena iseki, muloŋa hiitanda dakunyendu yindi; hela kutena Yerusalema, muloŋa hiŋanda yaMwanta muneni. 36Bayi wusanyika hela namutu weyuku, muloŋa hiwukutwesha kutookesha lusuki lumu, hela kwiyilishaku. 37Chimukuhoshaŋa, kuminenu dakwila nenu, Eŋa, eŋa; Nehi, nehi; neyi mukushaku mazu eŋi, chinafumi kudi watama.
38Enu munatiyi cheliluwu nawu, Disu nadisu, ŋi neji. 39Ilaŋa mi nukuyileja nami bayi muleta Ŋovu nawatamaku, muntu wukukweta kwikidi dachidiilu, mushetumwini nidikwawu. 40Neyi anakuholokeli kudi muntu nindi atambuli chi kovwelu cheyi, mwiteji atambuli nikahuma keyi nawa. 41Muntu wukukukakela nindi wuyi nindi mpata yimu, yaku nindi ŋijiyedi nawa. 42Muntu wukukulomba, mwinki; muntu wukukeŋa kusondama kudeyi, bayi wumufutalelaku.
43Munatiyi cheliluwu nawu, Keŋaku mukwenu, helaku chilumbu cheyi. 44Ilaŋa mi nukuyileja nami keŋenu ayilumbu jenu, ninawa ayikabishaŋa, yilombelenu; 45kulonda mwikali anyana kaTata yenu wudi mwiwulu, muloŋa yena watuntwishaŋa itaŋwa dindi nihadi atama nihadi amawahi, wanokeshaŋa nvula nihadi aloŋa nihadi áheŋa. 46Muloŋa neyi mukukeŋa antu ayikeŋaŋa hohu, mwakadiila mwodi? Hidimu mwelaŋa ansonkeshuku? 47Neyi mukwimwisha ana kwenu hohu munabadikili akwenu hadihi? 48Hidimu mwelaŋa aJentiluku? Dichi enu chiŋa mwikala antu alala chikupu, neyi chadiyi Tata yenu wamwiwulu niyena walala chikupu.
Currently Selected:
MATEU 5: MW62
Highlight
Share
Copy
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
